Тиксии ыалыгар олохсуйбут Сява мэкчиргэ «Орто дойду» зоопаркаҕа кэлэрэ күүтүллэр

    0
    19

    Булуҥнааҕы айылҕа харыстабылын инспекциятын үлэһиттэрэ түлүрбэҕи (мэкчиргэ ууһугар киирэр көтөр) иитэр Мира Гладышеваны кытта көрүстүлэр. Мира бу көтөрү ииппитэ сыл аҥаара буолла. 


    Мира кэпсииринэн, кини мэкчиргэни ааспыт сыл атырдьах ыйыгар Тиксии-3 бөһүөлэк таһыгар сынньана сылдьан булбут. Мэкчиргэ уйата чугаһынан көстүбэт эбит, эбиитин ыалдьыбыт көрүҥнээҕин аһыммыт уонна дьиэтигэр илдьэ барарга санаммыт. Мира бэтэринээр идэлээх буолан көтөрү эмтээбит, көрбүт-харайбыт. Икки нэдиэлэнэн мэкчиргэ түүтэ хойдон, көтө сатыыр буолбут.

    Мэкчиргэ хаһаайына булумньутугар Сява диэн ааты иҥэрбит, дьиэтигэр биир хоһу анаабыт. Сява эт уонна моркуоп аһылыктааҕын бэлиэтээн кэпсиир.

    Олунньу 1 күнүгэр Сяваны «Орто Дойду» зоопаркаҕа аҕалыахтара.