Ньурба куорат баһылыгын дуоһунаһыгар быыбар саҕаланна

    0
    35

    Бүгүн Ньурба куорат баһылыгын быыбара саҕаланна. Сарсыарда 10 чаастааҕы туругунан, 306 киһи куоластаата, болдьоҕун иннинэ куоластаабыттары киллэрэн туран. Быыбардааччы уопсай ахсаана 7781 киһи. Бу туһунан быыбар хамыыһыйатын сэкирэтээрэ Майя Николаева иһитиннэрдэ.


    Ньурба куоратын баһылыгын дуоһунаһыгар кандидаттар түөртэр: Ньурба к. баһылыгын солбуйааччыта Николай Бурнашев («Биир ньыгыл Россия» баартыйаттан), Владимир Герасимов (бэйэтэ туруоруммут, быстах кэмҥэ үлэтэ суох, Күндээдэ нэһилиэгин Сэбиэтин дьокутаата), Александр Иванов (бэйэтэ туруоруммут, СӨ муниципальнай тэриллиилэригэр гражданскай инициативалары сайыннарыыга «Нэһилиэк» уопсастыбаннай түмсүү бырабылыанньатын бэрэссэдээтэлэ) уонна «Арыылаах» ХЭТ гендириэктэрэ Алексей Тихонов.

    Ньурба к. үрдүнэн уон учаастактааҕы быыбар хамыыһыйата үлэлии турар.

    402 №-дээх Сэбиэскэй учаастактааҕы быыбар хамыыһыйатын бэрэссэдээтэлэ Ангелина Емельянчикова биллэрэринэн, манна быыбардааччы ахсаана 690 киһи. Онтон болдьоҕун иннинэ, ол эбэтэр 10 хонук иһигэр, 9 киһи куоластаабыт. «Бүгүн 10 чааска диэри 23 киһи кэлэн куоластаата. Күн устата быыбардааччы ахсааныттан аҥарын кэриҥэ эбэтэр улахан аҥара кэлэн куоластыа​ диэн күүтэбит«, — диир Ангелина Львовна. Манна эбэн эттэххэ, бу учаастакка сарсыарда дьон оччо көҕө суох буоллаҕына, билигин кэлиитэ улам көхтөөх буолан иһэр. Чаас аҥарын иһигэр — 10-тан 10 аҥарга диэри эбии 13 киһи кэлэн куоластаата.