Өймөкөөҥҥө кыстыкка бэлэмнэнии үлэтэ ыытыллар

    0
    14

    Өймөкөөн улууһун “Өймөкөөн Тымныы Оройо” МТ дьаһалтатын баһылыга Павел Васильев бу күннэргэ сайыҥҥы түбүк, үлэ-хамнас туругун билсэр. Кини СИА-ҕа олохтоохтор бу күннэргэ от үлэтигэр күүскэ туруммуттарын кэпсээтэ.


    — Уһун ардахтар кэннилэриттэн толооҥҥо уу киирэн, ходуһалар үксэ ууга барбыттара. Бу нэдиэлэҕэ күн көрөн, уу тардан, өймөкөөннөр төһө кыалларынан элбэх күөх маассаны хомуйаары, ходуһаларыттан тахсыбакка, күргүөмнээхтик үлэлээтилэр. Нэһилиэк дьаһалтата быйыл эмиэ оттооһуҥҥа мобильнай биригээдэ тэрийбитэ. Бу биригээдэ күһүн хойукка диэри оттууругар сорук туруоруллубута, — диир муниципалитет баһылыка Павел Васильев.

    Кини этэринэн, Ил Дархан Егор Борисов кыаммат ыалга ураты болҕомтону уурарга көҕүлүүр сорудахтара миэстэтигэр тута тириэрдиллэр. Нэһилиэккэ уопсайа 152 кыаммат ыал баар. «Бу дьоммутун өйүүр сыалтан быйыл СӨ Тыа хаһаайыстыбатын министиэристибэтин иһинэн тэриллибит куонкуруска кыттан, 1 мөл. солк. суумалаах граҥҥа тиксэн, нэһилиэккэ сибиинньэ, куурусса аҕалбыппыт. Быйыл аҕалбыт сибиинньэлэрбит бары тыһылар, ол иһин аны атыыр сибиинньэ аҕалан, дьиэ кыылын бу көрүҥүн ууһатар баҕалаахпын«, — салгыы кэпсиир салайааччы.

    Кини күһүн кыммат-түгэммэт дьоҥҥо бүтүн өрөспүүбүлүкэ үрдүнэн аатырар Өймөкөөн убаһаларын түҥэтэр былааннаахтарын иһитиннэрдэ. Бу бырагырааманан 27 ыалга көмөлөспүттэр. «Ол эрээри төһө да баҕарбыппыт иһин, кыаммат ыалы барытын хааччыйар кыахпыт суох. Онон араас хайысханан салгыы үлэ ыытыллыаҕа«, — диэн санаатын тириэртэ.

    Уопсайынан ылан көрдөххө, быйыл нэһилиэккэ куһаҕана суох дьыл үүммүт. СӨ ОДьКХ министиэристибэтэ тэрийбит куонкуруһугар кыттан, 4,5 мөл. солк. суумалаах грант ылбыттар. Онон тас көстүүлэрин тупсарыыга күүскэ ылсар санаалаахтарын баһылык иһитиннэрдэ. Ол иһигэр кыаммат ыаллары өйүүр туһуттан биэс ыалга дьиэлэрин тас өттүн өрөмүөннүүргэ 100-түү тыһ. солк. көмө анаабыттар.