Эдьигээн улууһун Кыстатыамыгар 2019 сылга таас оскуола тутуута саҕаланара былааннанар

    0
    33

    Кыстатыам уопсай үөрэхтээһини биэрэр орто оскуолата 1954 сылтан тэриллэн үлэлиир. 60-тан тахса сыл устата элбэх оҕо үөрэнэн, үгүс учуутал үлэлээн, уопут ылан бу үөрэх-билии кыһатыттан кынаттанан таҕыстаҕа. Билиҥҥи туругунан 11 кылаастаах оскуолаҕа 47 оҕо үөрэнэр, 25 идэтийбит учуутал үлэлиир, саҥа оскуола тутуллара былааннанар.


    Кыстатыамҥа 1972 сыллаахха тутуллубут оскуола дьиэтэ эргэрэн, хаарбах туруктанан ааспыт сылтан сабыллан турар. Онон олохтоох дьаһалта үлэлии олорбут дьиэтин оҥостон, быйылгы үөрэх дьылын онно саҕалаабыттар. Оскуола директора Варвара Ивановна Иванова үөрэх кыһатын олоҕун, үлэтин-хамнаһын туһунан маннык сырдатар:

    — Биһиги ФГОС бары ирдэбилин тутуһан үлэлии олоробут, ол курдук оҕолорбут бары биир сменанан үөрэнэллэр. Дьиэбит стандартка эппиэттээбэт буолан, икки бөлөххө хайдыһан тохтоло суох дьарыктаналлар, бастакылар 8:30 ч., иккистэр 11:10 ч. Урукку сылларга анал үөрэхтээх математика, физика, английскай тылы биэрэр учууталлар тиийбэт эбит буоллахтарына, кэнники үс сылтан бэттэх кадрдарынан толору хааччыллан олоробут. Коллектив үгүс өттө эдэр дьон, орто саастара-30. Биэс эр киһи учууталлаахпыт, онон эр дьону оскуолаҕа сыһыарыы оскуола үлэтин биир эмиэ сүрүн сыалынан буолар. Предметтэринэн ыытыллар ЕГЭ, ОГЭ түмүктэрэ куһаҕана суохтар. Кыһалҕабыт диэн, билигин үөрэнэ олорор дьиэбит кыараҕас буолан, оҕолор туспа турар дьиэҕэ тахсан аһыыллар, физкультура уруога кулуупка ыытыллар. СанПин ирдэбилигэр кэккэ кэһиилэр бааллар, ону төһө кыалларынан көннөрөр сыаллаах үлэ ыытабыт.

    Ыраах сытар хоту дойду оскуолатыгар эдэр дьон үлэлии кэлэриттэн толлубат. Билигин оскуолаҕа «Обеспечение жильем педагогических работников сельских школ и медицинских работников учреждений здравоохранения» республиканскатааҕы программанан үс эдэр учуутал кэлэн үлэлии сылдьар. Олортон биирдэстэринэн физика уонна информатика учуутала Туйаара Сергеевна Котоконова буолар.

    Туйаара Котоконова

    — Мин бэйэм Уус-Алдан улууһуттан сылдьабын. Манна үөрэхпин бүтэрээт, кэргэмминээн, оҕолорбунаан кэлэн төрдүс сылбын үлэлии сылдьабын. Кэргэним эбии үөрэхтээһин педагога, робототехника куруһуогун ыытар. Кыстатыамҥа кэлбиппитигэр олорор усулуобуйаны тэрийэн, үчүгэй баҕайытык көрсүбүттэрэ. Ыраах сытар дойдуга үлэлии кэлбиппитин кэмсиммэппит. Дьоно-сэргэтэ эйэҕэс, сирэ-дойдута ураты, кэрэ айылҕалаах буолан быр-бааччы, этэҥҥэ олоробут. Оройуоҥҥа, нэһилиэккэ буолар тэрээһиннэргэ, күрэхтэргэ көхтөөхтүк кыттабыт. Бастакы үлэлиир сылбар “Молодой педагог” диэн оройуоннааҕы күрэххэ кыттан бастакы миэстэни ылбытым. Сылын аайы ыытыллар научнай-практическай конференцияларга үөрэнээччилэрбин кытыннаран кэккэ ситиһиилэрдээхпит. Былырыын республиканскатааҕы “Инникигэ хардыы” НПК-ҕа биир үөрэнээччим 3-с миэстэни ылбыта. Маны сэргэ үгэс быһыытынан ыытыллар педагогическай дьаарбанкаҕа мэлдьи кыттабыт. Быйыл Чурапчыга ыытыллыбыт дьаарбанкаҕа кыттан, 2 номинацияҕа тигистибит, үс граны сүүйдүбүт.

    Мэҥэ-Хаҥалас улууһуттан төрүттээх, үһүс сылын дуогабарынан үлэлии сылдьар математика учуутала Сардаана Петровна Яковлеваны көрсөн кэпсэттим.

    Сардаана Яковлева

    — Быйыл мин болдьох иннинэ 1-кы категорияны аастым, онон олус үөрэн олоробун. Ааспыт сылга педагогическай дьаарбанкаҕа ситиһиилээхтик кыттан кэлбитим. Маны сэргэ, оройуоннааҕы “Инникигэ хардыы” НПК-ҕа үөрэнээччим Валерия Сергеева үһүс миэстэни ылбыта. Оскуолаҕа, оройуоҥҥа ыытыллар дьаһалларга, нэһилиэк олоҕор көхтөөхтүк кыттабын. Учууталлар, үөрэнээччилэр аныгы үөрэх сайдыытыттан хаалсыбаттар, араас таһымнаах курэхтэргэ ситиһиилээхтик кытталлар. Маны таһынан, оскуола иһинэн төрүт эбэҥки норуотун үгэстэрин сөргүтэр, үөрэтэр сыаллаах куруһуоктар ыытыллаллар, ансамбыл баар. 2021 сылга Кыстатыамҥа республиканскатааҕы программанан 90 миэстэлээх саҥа таас оскуола-сад тутуллара былааҥҥа киирэн бырайыага, сметата оҥоһуллан бүтэн, улахан тутуу 2019 сылтан саҕаланыахтаах. Биллэн турар, Кыстатыам олохтоохторо оскуола-сад саҥа таас дьиэтэ тутуллан, дьэндэйэн тахсарын долгуйа күүтэбит.