Олохтоох култуура сынньалаҥ киинигэр быйыл балаҕан ыйын 10 күнүгэр ыытыллыбыт муниципальнай тэриллии баһылыгын талыыга Аллараа Бэстээх бөһүөлэгэр эрэллээхтик кыайыылааҕынан тахсыбыт Юрий Колмаков дуоһунаһыгар киириитин тэрээһинэ үөрүүлээх быһыыга-майгыга алтынньы 17 күнүгэр ыытылынна.
Аллараа Бэстээх быыбардыыр хамыыһыйатын бэрэссэдээтэлэ Алена Пинигина Юрий Николаевич Колмаковка баһылык буолбутун туоһулуур анал дастабырыанньаны туттарда. Ил Түмэн сис кэмитиэтин бэрэссэдээтэлэ Юрий Баишев Судаарыстыбаннай мунньах аатыттан уонна бэрэссэдээтэл Александр Жирков тус бэйэтин аатыттан Юрий Колмаковы быыбарга кыайыытынан эҕэрдэлээтэ итиэннэ Аллараа Бэстээх сотору кэминэн илин эҥэр улуустары барыларын ситимниир куорат буолар аналлааҕын тоһоҕолоон бэлиэтээтэ.
Улуус баһылыга Николай Старостин саҥа баһылыктыын нэһилиэнньэ олоҕо-дьаһаҕа тупсуутугар биэс сыллааҕы бырагырааманы олоххо киллэриигэ түмсүүлээхтик үлэлиэхпит диэтэ уонна күн-бүгүн бөһүөлэк тирээн турар кыһалҕаларын: биэрэги бөҕөргөтүүттэн саҕалаан убаҕас, кытаанах бөҕү-саҕы суох оҥорууга боппуруостары быһаарарга эппиэтинэстээхтик үлэлииргэ бэлэмин биллэрдэ. Кини Юрий Николаевич 2008 сыллаахтан улуус сайдыытыгар сыралаахтык үлэлэспитин ураты тутан бэлиэтээтэ.
Оройуон Сэбиэтин бэрэссэдээтэлэ Андрей Находкин баһылык Аллараа Бэстээххэ куратор быһыытынан, ону сэргэ тутуу, баһаар, халаан боппуруостарыгар дьоһуннаахтык үлэлээбит уопуттаах салайааччы буоларын бэлиэтээтэ, улуус уонна Аллараа Бэстээххэ дьокутааттара ыкса сибээстээхтик бииргэ үлэлиэхпит диэтэ.
СӨ Баһаары утары сулууспатын начаалынньыга Николай Иванов Юрий Николаевичка «Саха сиригэр баһаарынай сулууспа 200 сааһа» диэн түөскэ анньыллар мэтээли туттарда. Нэһилиэктэр баһылыктарын ааттарыттан «Нөөрүктээйи нэһилиэгэ» МТ баһылыга Николай Федоров, тэрилтэлэр салайааччыларын ааттарыттан Уу хаһаайыстыбатын илин эҥэрдээҕи салаатын салайааччыта Иннокентий Осипов, дьокуттаттартан Аллараа Бэстээх дьокутааттарын Сэбиэтин бэрэссэдээтэлэ Андрей Верба, быыбардыыр хампаанньа бэрэстэбиитэллэриттэн инбэлииттэр түмсүүлэрин бэрэссэдээтэлэ Марфа Пугачева эҕэрдэлээтилэр.
«Дойду ситимэ» түмсүү бэрэссэдээтэлэ Владимир Птицын 10 сыл анараа өртүгэр улуус киинэ Аллараа Бэстээххэ көһөрүн туһунан дьаһалы аҕынна уонна инникитин Аллараа Бэстээх илин эҥэри барытын холбуур куорат буоларыгар саарбаҕалаабатын, онуоха саҥа талыллыбыт баһылык хорутуулаахтык үлэлиэхтээҕин, улахан соруктар күүтэллэрин эттэ итиэннэ Өлүөнэ өрүс саҥа куорат бэлиэтэ буолуохтааҕын туоһулуур хартыынаны бэлэх уунна.
Владимир Птицыҥҥа (социальнай-экономическай сайдыы), Руслан Федотовка (биисинэс), Алексей Куприяновка (инвестиция бэлиитикэтигэр) уонна Дмитрий Назаровка (бэйэ оҥорон таһаарыы) боппуруостарыгар «Аллараа Бэстээх бөһүөлэгэ» МТ баһылыгын сүбэһиттэринэн анаммыттарын туһунан туоһу дастабырыанньалары баһылык Юрий Колмаков туттартаата.
Түмүккэ харда тылыгар Юрий Николаевич бар дьонугар махтанна уонна күргүөмнээхтик үлэлиэхпит диэн андаҕар эттэ.
Татьяна Музлова, Аллараа Бэстээх олохтооҕо, биэнсийэлээх: «Мин Юрий Николаевичка куоластаабытым. Биһиги кинини, бөһүөлэкпит дьиҥнээх хаһаайына буоларын өр сылларга кэтэстибит. Кини кэбиниэтигэр көрсө киирэ сылдьыбытым уонна олус астынан, үөрэн таҕыстым. Киниэхэ үрдүк ситиһиилэри, былааннаммыт соруктара барыта туолалларыгар баҕарабын».
Любовь Бредова, Аллараа Бэстээх олохтооҕо, биэнсийэлээх: «Юрий Колмаков итэҕэллээх киһитинэн үлэлээбитим. Быыбар иннинээҕи хампаанньаҕа отучча киһи буолан үлэлээбиппит. Быыбарга кыайарга сүүс бырыһыан эрэллээх этибит. Инникитин даҕаны өйүүргэ, бииргэ үлэлииргэ бэлэммит».
Сергей Шарин, Тырааныспар техникумун преподавателэ: «Юрий Николаевичка чэпчэкитэ суох үлэтигэр үрдүк ситиһиилэри. Кытаанах доруобуйаны, тус олоҕор дьолу-соргуну баҕарабыт».
Сообщить об опечатке
Текст, который будет отправлен нашим редакторам: