Сунтаар улууһун бастыҥ энергетигэ Тойбохойго үлэлиир

Ааспыт чэппиэргэ оройуоннаа­ҕы электростанция хонтуо­ра­тын аактабай саалатыгар улууспутугар биллэриллибит Тыа сирин үлэһиттэрин сылын чэрчи­тинэн «Бастыҥ энергетик» көрүү күрэҕэ буолан ааста. Тэрээһиҥҥэ «Якутскэнерго» АУо «Арҕааҥҥы электрическэй ситимнэр» филиа­лын дириэктэрэ Игорь Забегин кыттыыны ылла. Куонкуруска барыта 11 киһи кытынна.

Күрэхтэһээччилэри, мустубут дьону улуус баһылыга Анатолий Григорьев, филиал дириэктэрэ Игорь Забегин эҕэр­дэлээтилэр. Игорь Витальевич инникитин уот ситимигэр үлэлиир дьон идэлэрин өссө үрдэтэр туһуттан маннык көрүү-күрэҕи өрөспүүбүлүкэ таһымы­гар ыытар буоллар диэн баҕа санаатын эттэ.

Көрүү-күрэх хас да түһүмэхтэн турда. Бастатан туран, кыттаач­чы­лар бэйэлэрин билиһиннэр­дилэр. Күрэххэ кыттаары Сунтаар, Тойбохой, Кириэстээх, Бордоҥ, Элгээйи нэһилиэктэриттэн кэл­биттэр. Ол курдук Сунтаартан РЭС үлэһит­тэрэ Эдуард Авваку­мов, Дмитрий Николаев, Лев Семенов, Аркадий Иванов, Про­копий Болуров, Фе­дор Габышев, Кириэстээхтэн Александр Ива­нов, Бордоҥтон Вадим Кычкин, Элгээйиттэн Алквиад Никаноров уонна Тойбо­хойтон Павел Жирков бааллар. Бэйэни билиһиннэ­риигэ Эдуард Аввакумов РЭС-кэ 2011 сылтан үлэлиирин туһунан эттэ, онтон Дмит­рий Николаев Мииринэй­дээ­ҕи үрдүк үөрэх кыһатын бүтэрэн, Удачнайга ана­нан үлэлии сылдьыбыт уопут­таах эбит. Бары идэлэрин толору баһылаабыт буолан теория да, быраактыка да өттүгэр билии­лэрэ улахан.

Улахан күрэхтэһии кэнниттэн Сунтаар улууһун «Бастыҥ энерге­тигэ» ааты Тойбохойтон электрик Павел Жирков ылла. Кини Сун­таар­дааҕы РЭС Тойбо­хой­дооҕу учаастагын дьуһуурунай электри­ги­нэн үлэҕэ 2014 сыллаах­ха киирбит. Павел кыайыылаах бы­һыы­тынан улуус баһылыга Анато­лий Григорьев илиититтэн дьупу­луому уонна 50 тыһ. солк. суума­лаах сэртипикээти тутта. Иккис миэстэни Аркадий Ива­нов (Сунтаар), үһүс миэстэни Вадим Кычкин (Бордоҥ) ыллы­лар. Ки­нилэргэ «Арҕааҥҥы элек­тричес­кэй ситимнэр» тэрилтэ сыаналаах бириистэрин туттар­дылар.