Сунтаар улууһугар оҕолор сайыҥҥы лааҕырга саха фольклоругар уһуйуллаллар

Быйыл Күүкэйгэ 12 сылын «Олоҥхо дойдутун оҕотобун» диэн креативнай лааҕыр аһыллан үлэлээтэ. Улуустан 25 оҕо сырытта.

---

Лааҕыр начаалынньыгынан Нина Кычкина, уһуйааччынан «Олоҥхо» төрүт култуура киинин фольклорга исписэлииһэ Туйаара Алексеева, иитээччилэринэн Сааскылаана Чалыева, Варвара Спиридонова, биэлсэринэн Альбина Данилова үлэлээтилэр. Асчыт Людмила Харитонова минньигэс, иҥэмтиэлээх аһылыгын оҕолор тото-хана аһаатылар.

Оҕолор Туйаара Аркадьевна салалтатынан олоҥхо тойуктарыгар, ырыаларыгар уонна фольклор араас көрүҥнэригэр үөрэннилэр. Бэйэлэрин дьоҕурдарын, туохха үөрэммиттэрин улуус ыһыахтарыгар көрдөрдүлэр.

Сунтаар уйгулаах ыһыаҕар «Олоҥхо – Айыы сиэрин түстүүр улуу күүс» диэн олоҥхону толорооччулар улуустааҕы күрэстэригэр кытыннылар. Лааҕыр иитиллээччилэрэ Валентин Прокопьев, Лиза Кычкина, Уруйдаана Харитонова, Элеонора Попова, Алесия Егорова ситиһиилээхтик кыттан туоһу сурук туттулар.

Элгээйи ыһыаҕар «Ытыс ымыыта» диэн хомус күрэһигэр Прокопьев Валентин кыттан, III истиэпэннээх лауреат буолан биир дойдулаахпыт виртуоз-хомусчут Юлиана Кривошапкина-Дьүрүйээнэ анал аатынан бирииһин ылан үөрдэ-көттө.

Кутанаҕа «Улуу сыһыы ыһыаҕар» «Дьиэрэй хомуһум» улуустааҕы хомусчуттар күрэстэригэр Лиза Кычкина II миэстэни ылбыта.

Күүкэй үбүлүөйдээх ыһыаҕар лааҕыр оҕолоро «Түһүлгэ» норуодунай үҥкүү салайааччыта Василина Слепцова туруорбут «Алгыс» уонна «Эрэкэ-дьэрэкэ» үҥкүүлэринэн ыһыаҕы астылар, «Эҕэрдэ, эйиэхэ төрөөбүт Күүкэйбит!» кэнсиэркэ хомуска оонньоон, туойан, ыллаан дьон биһирэбилин ыллылар.

Ити курдук оҕолор өбүгэ төрүт үгэстэрин иҥэринэн, дьоҕурдарын сайыннаран бириэмэлэрин туһалаахтык атаардылар.