Сочи куоракка Аан дойдутааҕы ыччат уонна устудьуоннар 19-с бэстибээллэрэ буолан ааста. Үөһээ Бүлүү улууһуттан ыччат лидерэ Прасковья Тимофеева бу тэрээһиҥҥэ кыттыыны ылла.
Үөһээ Бүлүү улууһун көхтөөх ыччата Прасковья Тимофеева ыччат отделын специалиһынан 2016 сылтан үлэлиир. Бу кылгас кэм иһигэр кини эппиэтинэстээҕин, ыччаты түмэр кыахтааҕын толору көрдөрдө. Саха сиригэр биллэриллибит Ыччат сылын тэрээһининэн, Прасковья араас республикатааҕы, регионнааҕы куонкурустарга бэйэтэ да, көхтөөх ыччаты да кытыннарбыта элбэҕи этэр.
Прасковья үөрэ-көтө олоҕун биир умнуллубат түгэнин, Аан дойдутааҕы ыччат бэстибээлигэр кыттыбытын, элбэҕи билбитин-көрбүтүн туһунан кэпсээтэ:
— Бастакы күнүттэн программа отой киэҥ этэ. Биһиги, улуустардааҕы ыччат отделын үлэһиттэрэ, «Индустрия-2030» («Индустрия будущего») диэн хайысхаҕа ананан барбыппыт. Сарсыарда эрдэттэн араас форсайт сессиялар, дискуссиялар, лекциялар, трениннэр, конференциялар, семинардар, форумнар, музейдар үлэлэрэ, спортивнай күрэхтэһиилэр, араас биллэр дьону кытта көрсүһүүлэр буолбуттара. Биир нэдиэлэни быһа баҕарбыт тэрээһиҥҥин талаҥҥын онлайн суруттаран сылдьаҕын. Хас киэһэ аайы сарсыҥҥы күммүтүн былааннааччыбыт.
— Ордук ханнык тэрээһиннэргэ сырыттыҥ?
— Мин «Лидерство» тиэмэлээх лекцияларга ордук сэҥээрэн сырыттым, элбэҕи биллим-көрдүм. Ону таһынан, тэрээһин өттүгэр ордук уопут хомунар былааннаах этим, ону толордум дии саныыбын. Холобур, бэстибээлгэ 20000 киһини кэтэспит буоллахтарына, 30000 кыттааччы тиийэн кэлбитэ — улахан араастаһыы. Ол эрэн, тэрийээччилэр сөптөөх быһаарыыны ылынан, барыта орун-оннугар ааспыта. Арай, уочарат эрэ элбэх этэ.
— Саха сирэ киэҥ далааһыннаах быыстапка тэрийдэ диэн үгүс көрдөрөр-иһитиннэрэр эйгэ үлэһиттэрэ бэлиэтээтилэр. Атын дойдуттан сылдьар омуктар төһө интэриэһиргииллэр эбит?
— Саха сирин билиһиннэрэр быыстапка киэҥ сэҥээриини ылла, лидердэр онно эмиэ кыттыгастаахпыт. Спортивнай күрэхтэһиилэргэ биһиги мас тардыһыыбыт туспа площадканан үлэлээбитэ, дьон болҕомтотун тарпыта. Омуктар олус интэриэһиргээтилэр, күн аайы күрэхтэһии быыстала суох ыытылынна, элбэх кыттааччыны түмтэ.
— Лекциялар таһынан өссө туох ыччат болҕомтотун тарта?
— Саха сириттэн талыллан барбыт 150 киһиттэн өссө 20 киһи талыллан, «Со-общение» диэн оонньууга кытынныбыт. Манна барыта Россияттан 717 эдэр киһи оонньоото. Бэриллибит сорудахтары эрдэ толорбуппут. Холобур, сорудахтарга араас флеш-мобтары тэрийии, омуктарга программаны билиһиннэрии, араас норуоттары кытта билсиһии, лекцияларга сылдьыы бааллара. Инстаграммар #со-общение #мысообщаем диэн хэштегтаах хаартыскаларым – сорудах толоруута этэ. Оонньууга кыттар буоламмын, араас тэрээһиннэргэ быһа сырыттым. Холобур, Сбербанк тойоно Герман Грефтыын көрсүһүүгэ быһа киирбиппит, баҕалаах олус элбэх, отой миэстэ тиийбэт этэ. Өссө бэстибээл сабыллыытын кэмигэр билиэт тиийбэтэх дьоно мейкер браслетынан киирбиттэрэ. Бүтэһиккэ, тэрийээччилэр салайааччыта Ксения Разуваева илии баттааһыннаах сертификаттары уонна бэлэхтэри туттарбыттара.
— Араас дойду ыччатын кытары билсибитиҥ, уопут атастаспытыҥ буолуо. Бу туһунан кэпсээ эрэ.
— Атын дойду ыччатын уопутун араас дискуссияларга истэҕин. Наһаа ыарахан олохтоох да, аһары сайдыылаах да дойду ыччата бааллар. Аан дойду ыччатын түмэр бэстибээл сыалын ситиэ дии саныыбын. Омук доҕотторум син элбээтилэр, «Телеграмм» уонна «Инстаграм» нөҥүө билсэбит. Россия араас регионуттан эмиэ саҥа доҕоттордоммутум олус үөрдэр.
— Саха сирин туһунан билэллэр эбит дуо? Туох санаалаахтар?
— Бары Саха сирин кыһыныттан соһуйаллар, дьулайаллар. Сочи сылааһын сорохтор өссө тымныы дииллэр, курткалаах, бэргэһэлээх сылдьаллар. Биһиги +20 кыраадыстан -15 кыраадыска көтөн кэлэн баран, дойдубут киэҥинэн, улаханынан киэн туттабыт.
— Түмүккэ тугу этиэҥ этэй?
— Аан дойду ыччатын уонна устудьуоннарын киэҥ түһүлгэтигэр кыттан кэлбиппиттэн наһаа үөрэбин, бу мин олохпор биир сүдү улахан, умнуллубат кэм буолар.
Не поддавайтесь вялости и апатии
Подборка новостей за четверг
Из них 31 километр приведут в нормативное состояние по нацпроекту «Безопасные качественные дороги»
Единый знак чемпиона был учрежден международным комитетом «Дети Азии» в 2023 году
В 2024 году инспектирование проводится с 22 апреля по 105 объектам
В парке обновят прогулочные зоны, скамейки и опоры освещения