Дьокуускайга Тыа хаһаайыстыбатын академиятыгар “Саҕалааччы фермер” Бүтүн Россиятааҕы интеллектуальнай оонньуу регионнааҕы түһүмэҕэр өрөспүүбүлүкэ агропрофилированнай оскуолаларыттан 54 үөрэнээччи кытынна. Үһүс сылын ыытыллар тэрээһиҥҥэ киин, илин эҥээрдээҕи уонна Бүлүү сүнньүнээҕи улуустары сэргэ ыраах Эдьигээнтэн, Өлүөхүмэттэн, Томпоттон, Уус Маайаттан тиийэ кэллилэр.
Өрөспүүбүлүкэҕэ 652 оскуола баарыттан 450-а тыа сиригэр үлэлиир, мантан 102 оскуола аграрнай хайысхалаах. Агро-оскуолалар тыа сиригэр уонна тыа хаһаайыстыбатыгар үлэлиир каадырдары иитэн-бэлэмнээн таһаарар соруктаахтар. Онон “Саҕалааччы фермер” оонньууга кыттар оҕолор кэнэҕэс тыа сирин сис дьоно буолан тахсалларыгар киһи саарбахтаабат. Билиҥҥиттэн тыа хаһаайыстыбатын менеджменигэр, бизнес-былааннааһыҥҥа быһаарсар итиэннэ сонун-сэргэх идиэйэлээх буоллахтарына, аҕаларын-ийэлэрин, убайдарын-эдьиийдэрин суолунан баран, өссө таһыччы үлэлиэхтэрэ-хамныахтара турдаҕа.
Тыа хаһаайыстыбатын уонна ас-үөл бэлиитикэтин миниистирин солбуйааччы Семен Потапов бэрэссэдээтэллээх, ТХНЧИ дириэктэрэ, тыа хаһаайыстыбатын билимин дуоктара Айаал Степанов хос бэрэссэдээтэллээх 10-тан тахса чилиэннээх дьүүллүүр сүбэ оҕолор бырайыактарын, идиэйэлэрин көрөн уонна билиилэрин тургутан баран, Уус Алдан улууһун П.В.Аммосов аатынан Тулуна орто оскуолатын үөрэнээччилэрин производственнай биригээдэтигэр I, Тааттаттан С.Р.Кулачиков-Эллэй аатынан Чычымах орто оскуолатыгар II, Мэҥэ Хаҥаластан Ороссолуода орто оскуолатыгар III степеннээх дипломнары туттарда.
Онон быйыл Москваҕа ыытыллар “Саҕалааччы фермер” Бүтүн Россиятааҕы интеллектуальнай оонньуу түмүк түһүмэҕэр Саха сирин аатыттан П.В.Аммосов аатынан Тулуна орто оскуолатын үөрэнээччилэрин производственнай биригээдэтин оҕолоро кытта барыахтара. “Биһиги агротехнологическай үөрэхтээһиммит дойдуга инники күөҥҥэ сылдьар. Ону былырыын В.П.Ларионов аатынан Майа орто оскуолатын үөрэнээччилэрэ чаҕылхайдык кыттаннар, бигэргэтэн тураллар”, — диир үөрэх уонна билим миниистирэ Владимир Егоров. Быйыл даҕаны Тулуна эдэркээн «саҕалааччы фермердэрэ» түһэн биэрбэттэр ини.
Зрителям завязали глаза и дали ощутить концерт в принципиально новом жанре
В спортзале Алданской гимназии занимаются пятью видами спорта. Сегодня зал используется для проведения школьных уроков по…
Ребятам предстоит пройти курс обучения основам железнодорожного ремесла
Опытный путешественник из Мирного планирует пройти за три месяца от самой южной точки до самой…
Маршруты автобусов перестроят на время мероприятий в честь Дня Победы
За нарушения требований пожарной безопасности в условиях особого противопожарного режима предусмотрены штрафы