Ньурба улууһугар бу күннэргэ Малдьаҕарга 2 этээстээх дьыссаат саҥа дьиэтэ тутуллан үлэҕэ киириэхтээх. Тутуу 30%-на өрөспүүбүлүкэтээҕи «Үтүө дьыала» хамсааһынын, 70%-на улуус үбүн суотуттан үбүлэнэр.
Малдьаҕардааҕы оҕо уһуйаана 60-тан тахса мөл. солк. суумалаах дьоһун эбийиэк. Бэдэрээччит – Дьокуускайдааҕы «Строй-импульс» ХЭТ. Билигин 20-чэ киҺи үлэлии сылдьар, итиэннэ олохтоохтор кырааскатыгар көмөлөһөллөр.
«500 киһилээх нэһилиэккэ маннык улахан дьиэлээх бастакы дьыссаат буолар диэбиттэрэ, истиэххэ олус үчүгэй, — диир нэһилиэк баһылыга Никита Иванов. — Үчүгэй усулуобуйаҕа оҕолорбут, сиэннэрбит барахсаттар — Малдьаҕар үүнэр көлүөнэтэ сылдьыахтара. Дьон үлэҕэ-хамнаска тардыһара өссө күүһүрүө. Төрөппүттэр уонна нэһилиэк олохтоохторо ыраастааһын уо.д.а. үлэлэригэр элбэҕи көмөлөһөллөр».
Уһуйаан дириэктэрэ Таисия Иванова: «Саҥа дьиэлэнэн эрэрбититтэн атахпыт сири билбэт буолуоҕар диэри улаханнык үөрэ сылдьабыт. Улууспут салалтатыгар уонна Никита Афанасьевичка махтанабын».
Малдьаҕар — сэргэх үлэлээх нэһилиэк. 2013 сылтан 4-түү кыбартыыралаах 2 уопсай дьиэни тутан үлэҕэ киллэрдилэр. Итиннэ уҺуйаан, оскуола уонна бэтэринээрийэ үлэһиттэрэ киирэн олороллор. Итинэн нэһилиэккэ исписэлиистэр үлэлии кэлэр уонна хаалан олохсуйар усулуобуйаларын тэрийэллэр. Үлэлиир баҕалаах уонна кыахтаах салалта бэлэм кэлэр харчыны кэтэһэн олорбокко, хайдах гынан нэһилиэгэр үбү-харчыны тардарга суоллары сатаан тобулар.
Билигин олохтоох дьаһалта дьиэтин иккис этээстээн, саҥардан тутан, элбэх аналлаах кииҥҥэ кубулутан, эмиэ бу күннэргэ үлэҕэ киллэрэн эрэллэр. Бастакы этээскэ почта, Ростелеком, бибилэтиэкэ, көҥүл өттүнэн тэриллибит баһаарынай хамаанда киирэллэр. Нэһилиэк дьаһалтата иккис этээскэ олохсуйар. Бу үлэ суумата 3,3 мөл. солк., нэһилиэк бэйэтин бүддьүөтүттэн көрүммүт.
Бэдэрээччит — «Масстрой» ХЭТ. Бу тэрилтэни кытта малдьаҕардар үлэлэспиттэрэ хаһыс да сыла. Былырыын 4 кыбартыыралаах уопсай дьиэни тутан үлэҕэ киллэрбиттэрэ. Бэдэрээччит бэрэстэбиитэлэ — бэйэлэрин уоллара Кононов Андрей Владимирович олохтоохтортон 5 киһилээх биригээдэ тэрийэн үлэлии сылдьаллар. Бу дьиэлэригэр Саҥа дьыл иннинэ киирэрдии былааннаналлар.
Итини таһынан улуус атын нэһилиэктэригэр – Ньурбачааҥҥа уонна Маалыкайга 50-нуу миэстэлээх таас дьыссаат дьиэлэрэ тутулла тураллар. Улахан тымныылар түһүөхтэригэр диэри тутааччылар быйылгы үлэлэрин түмүктээтилэр, салгыы эһиил сааскыттан үлэлээн, аны күһүн үлэҕэ киллэрэргэ соруктаахтар.
Интервью титулованного спортсмена и его близких
Пасха — главный праздник православных христиан. В 2024 году Воскресение Христово верующие отметили 5 мая.…
В районах Якутии зацвели первые весенние цветы — подснежники. Небольшие ростки появились еще в середине…
Чем запомнилась уходящая неделя - читайте в подборке ЯСИА
Зарезервированные в федеральном бюджете средства направят «Росагролизингу»
В копилке команды из Мирного четыре золотых и одна серебряная медаль