Нам улууһугар Ньурба улууһун баһылыга Алексей Иннокентьев, баһылык бастакы солбуйааччыта Артур Яковлев, инвестиционнай тутуу управлениетын салайааччыта Макар Семенов, баай-дуол сыһыаннаһыыларын комитетын председателэ Николай Бурнашов, территорияны кытта үлэлэһэр отдел начальнига Вероника Кириллова уонна Ньурба 15 нэһилиэгин баһылыга уопут атастаһа кэлэ сырыттылар.
Ньурба улууһун делегациятын бастакынан 1-кы Хомустаах баһылыга Василий Жирков, дьаһалта үлэһиттэрэ көрсөн спорт саала үлэтин, тутуллубут технологиятын билиһиннэрдилэр. Онтон Никольскай нэһилиэгэр кэлэннэр 1 тыһ. туонна оҕуруот аһын харайар эбийиэги, итиитин-тымныытын хонтуруоллуур систиэмэтин, эти атыылыырга техническэй регламент киирбитинэн сүөһүнү астыыр сыаҕы көрдүлэр-иһиттилэр. Маны таһынан «Намкоммунтеплоэнерго» тэрилтэҕэ сылдьан үлэлэрин-хамнастарын, Ньурбаҕа гаас суох буолан киин ититии ситимигэр хайдах-туох үлэ ыыталларын билистилэр. Манна ыраах өрүс уҥуор сытар Арбын нэһилиэгэ киин ититэр ситимҥэ холбоммуттарын (итии, тымныы уу дьиэлэригэр кэлэр, толору хааччыллыылаах, автомат таҥас сууйар массыына туруоруналлар) холобурдаатылар, кэпсэтиигэ нэһилиэк баһылыга Николай Соловьев кыттыыны ылла.
Улуус дьаһалтатыгар кэлэн «Нам улууһа» МТ баһылыгын э.т. Ефим Гоголевы, нэһилиэктэр баһылыктарын кытта көрүстүлэр, хардарыта үлэлэрин туһунан билиһиннэрдилэр. Биһиги өттүбүтүттэн тутууга уонна олох-дьаһах коммунальнай хаһаайыстыбатыгар баһылыгы солбуйааччы Степан Матвеев хаарбах туруктаах дьиэттэн дьону көһөрүү, тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыы, социальнай эбийиэктэри тутуу, суол өрөмүөнүн, энергосбережение бырыгарааматын уо.д.а. хайысхалаах улууска ыытыллар үлэлэри кэпсээтэ.
Нам улууһун депутаттарын Сэбиэтин председателэ Иван Попов депутаттар үлэлэрин, тыа хаһаайыстыбатын управлениетын начальнига Прокопий Окоемов тыа хаһаайыстыбатын билиҥҥи туругун, туох үлэ ыыталларын туһунан сырдатта. Үөдэй нэһилиэгин баһылыга Семен Ядреев сорох сокуоннар бэйэни салайыныыга харгыстары таһааралларын бэлиэтээтэ. «Уһук илиҥҥи гектар» сокуонунан араас сиртэн нэһилиэк иэниттэн сир ылбыттарын туһунан дьаһалтаҕа биллибэтэ соччото суох», — диэн эппитин атыттар сөпсөстүлэр.
Ыалдьыттар өттүлэриттэн юридическай регистрациялаах баһылыктар ассоциацияларын тэрийбиттэрин сэргээтилэр.
Особенно хорошо вы будете чувствовать себя вдали от насиженного места
Заместитель министра культуры России Андрей Малышев на рабочей встрече с министром культуры и духовного развития…
Картина поднимает вопрос оттока молодёжи в города
С начала проведения СВО свыше 2,6 тысяч служащих субъектов ДФО приняли участие в боевых действиях
Компания представила комплексную программу обучения в области промышленной безопасности
На конец 2025 года в республике работали 7456 магазинов