Нам улууһугар нэһилиэк депутаттарын икки ардыгар спартакиада буолан ааста

Нам улууһунааҕы депутаттар Сэбиэттэрин уонна нэһилиэктэр депутаттарын Сэбиэттэрин икки ардыгар V-c төгүлүн спартакиада буолан ааста. Улуус дьаһалтатын үлэһиттэрэ, баһылык Александр Атласов капитаннаах, хамаанда туруоран спартакиадаҕа иккис сылын ситиһиилээхтик кытыннылар.

Күрэхтэһиигэ уопсайа 20 хамаанда, 200 кэриҥэ киһи кытынна. Бу олус үчүгэй көрдөрүү буолла, 18 нэһилиэк депутаттара спартакиаданы өйөөбүттэрэ кэрэхсэбиллээх. Хамаанда капитаннарынан нэһилиэктэр баһылыктара буоллулар.

Спартакиада көрүҥнэригэр волейбол, дартс, баскетбол корзинатыгар мээчиги быраҕыы уонна миэстэттэн ыраах ыстаныы көрүҥнэрэ киирдилэр. Сарсыардаттан киэһэ хойукка диэри тыҥааһыннаах күрэхтэһии ыытылынна. Ол түмүгүнэн, нэһилиэктэринэн икки бөлөххө арааран, бастакы бөлөххө: 1 м. — 1 Хомустаах, 2 м. – Хамаҕатта, 3 м. – Хатыҥ Арыы; 2 бөлөххө: 1 м. – Арбын, 2 м. – Түбэ, 3 м. – Искра нэһилиэктэрин депутаттара буоллулар. Маны таһынан анал ааттары олохтооннор, сыаналаах бириистэри туттардылар. Ол курдук, «Аҕа саастаах кыттааччы» ааты Савва Колесов (Маймаҕа), «Бэргэн быраҕааччы» ааты Леонид Соловьев (Хатыҥ Арыы), Алексей Соловьев (1 Хомустаах) уонна Василий Дьяконов (Искра), «Бастыҥ көмүскээччи» Павел Обутов (1 Хомустаах), «Бастыҥ быһааччы» Айсен Парников (Хатырык), «Бастыҥ оонньооччу» Василий Жирков (1 Хомустаах), «Саамай уһуну ыстанааччы» Еремей Ильин (Партизан), «Кыайыыга дьулуурун иһин» Александр Егоров (Маймаҕа) уонна «Бастыҥ тэрийсээччи» Алексей Винокуров ыллылар.

Мантан сүүмэрдэнэн өрөспүүбүлүкэтээҕи спартакиадаҕа волейболга 1 миэстэ уонна миэстэттэн ыстаныыга 3 миэстэ буоланнар, 17 хамаандаттан 3 миэстэ буолары ситистилэр.