Нам улууһа Горнайга Атамай нэһилиэгэ төрүттэммитэ 125 сылыгар кыттыыны ылла

Горнай улууһун Бэрдьигэстээҕэр Атамай нэһилиэгэ төрүттэммитэ 125 сылыгар анаммыт сыл түмүктэрин таһаарар үс улуус тэрээһинэ буолан ааста. Манна биир аҕа уустан төрүттээх Нам улууһуттан Нам улууһун дьаһалтатын баһылыга Александр Атласов уонна Таастаах, Салбаҥ, 1 Хомустаах, Партизан, Маймаҕа нэһилиэктэрин дьоно-сэргэтэ кыттыыны ыллылар.

Былыргы үһүйээннэр кэпсииллэринэн, Нам улууһун төрүттээбит Нам тойон быраата Ала киһи урукку Атамай аҕа уустарын төрүттээбит. Ала киһи 7 уолу, 4 кыыһы ииппитэ биллэр. Уолаттарын тас көрүҥнэринэн, туттар быһыыларынан көрөн аат биэртэлээбит уонна кинилэргэ чугас эргиннээҕи сирдэри анаталаан, аҕа уустарын тэнитиҥ диэн ыыталаабыт. Ол курдук аһаан бүтэн баран салбана сылдьар уолун Салбаҥ нэһилиэгин тэнит диэн билиҥҥи Салбаҥ сирин анаабыт, таас курдук бөҕө-таҕа эттээх сииннээх уолунан Таастаах aҕa ууһун тэниттэрбит, бэйэтин олоҕор икки Атамай нэһилиэктэрин икки уола салҕаабыттар, улахан истээх уолунан Көдөһү нэһилиэгин, наар хомуска оонньуур уолунан хамыстаахтары үөскэтиннэрбит. Ала ууһун 1892 сыллаахха улуустарынан арахсыы кэмигэр бастакы, иккис Атамайга араартаан, нэһилиэнньэ сороҕо Кэбээйигэ, Намҥа, Горнайга олохсуйан, ууһаан-тэнийэн олороллор.

Ала ууһун былыргы историятын дириҥник үөрэтэр уонна үйэтитэр, өбүгэлэрбит сибээстэрин сөргүтэр, Горнай, Нам, Кэбээйи улуустарын сыһыаннарын холбуур, үүнэр көлүөнэни төрөөбүт дойдуга бэриниилээх буолууга иитэр сыаллаах бырайыагынан, Саха Өрөспүүбүлүкэтин Ил Дархана Егор Афанасьевич Борисов 2016 сыллаахха ахсынньы 1 күнүгэр «Атамай нэһилиэгэ төрүттэммитэ 125 сылыгар анаммыт үбүлүөйү ыытыы» туһунан дьаһала тахсан , бырабыыталыстыба анал хамыһыйата тэриллэн, 7 пууннаах былаан ылыллан, уопсайа 33 тэрээһин киирбититтэн, билиҥҥи туругунан 13-һэ туолла, 3 үлэ оҥоһулла сылдьар, 13-с өссө да быһаарыЕгор Борисовллыыны күүтэр.

Нам, Горнай, Кэбээйи улууһун талба талааннаахтарын оҥоһуктарын быыстапката турда, улуустар төрүччүлэрин оҥорорго төгүрүк остуол ыытылынна, «Атамай: лента времени» киинэни көрдүлэр уонна үс улуус холбоон «Дойду сурахтаах, алаас ааттаах» диэн кэнсиэртээтилэр.