Өлөөн улууһугар оҕону иитиигэ биир дойдулаахтара Иосиф Николаев үлэтин туһаналлар

Өлөөн оройуонун бочуоттаах олохтооҕо Иосиф Николаев кэриэһигэр научнай-практическай конференция ыытылынна. 

Бу дьыл кулун тутар ый 28 күнүгэр Х.М. Николаев аатынан Өлөөн орто оскуолатыгар Өлөөн эбэҥки национальнай оройуонун бочуоттаах олохтооҕо, Саха Өрөспүүбүлүкэтин норуотун хаһаайыстыбатын үтүөлээх үлэһитэ, РФ худуоһунньуктарын союһун чилиэнэ, Саха Өрөспүүбүлүкэтин счетнай палататын бочуоттаах үлэһитэ Иосиф Алексеевич Николаев төрөөбүтэ 65 сылыгар аналлаах тэрээһин буолла. Бу күн эбэҥки норуотун духовнай уонна материальнай культуратын сайдыытыгар кини оруолун арыйыыга аналлаах научнай-практическай конференция ыытылынна.

Конференцияны кылгас киирии тылынан РФ үөрэҕин бочуоттаах үлэһитэ Семенова Наталия Гаврильевна арыйда уонна конференцияҕа кытта Иосиф Алексеевич Николаев ийэтэ, Саха Өрөспүүбүлүкэтин үтүөлээх учуутала Бястинова М.И., кэргэнэ Николаева А.З., оҕолоро Ирина, Марина, бииргэ төрөөбүттэрэ Любовь Алексеевна, Варвара Алексеевна, Альбина Алексеевна кыттыыны ылалларын билиһиннэрдэ.

Маны тэҥэ бүгүҥҥү күннээҕи научнай-практическай конференцияҕа уопсайа 19 дакылаат бэлэмнэнэн, экспертиир хамыыһыйа уонна конференция кыттыылаахтарын дьүүлүгэр туруорулларын иһитиннэрдэ. Ол иһигэр 7 дакылааты Саха Өрөспүүбүлүкэтигэр биллэр учуонайдар, политологтар Голиков И.А., Архипов Н.Д., Винокуров И.И., Голиков А.И., Николаев М.Х., Винокурова О.А., Томтосов А.А. бэлэмнээн научнай-практическай конференцияҕа иһитиннэрэргэ ыыппыттар уонна 12 дакылааты Өлөөн орто оскуолатын үөрэнээччилэрэ — Семенова Уйгуна, Семенова Оля, Декоямова Сильвия, Николаева Василина, Игнатьева Эмилия, Иванова Ирина, Байгильдина Камилия, Семенов Вася, Никифорова Арина, Николаев Эрсан, Магомедгазиева Хадижа, Симакова Саина билиһиннэрдилэр.

Конференция үлэтин түмүктүүрүгэр кыттааччылар Иосиф Алексеевич айан-тутан хаалларбыт үлэлэрэ эдэр көлүөнэни иитиигэ дьоһун оруолун үрдэтиигэ туһуламмыт резолюцияны биир санаанан бигэргэттилэр.