Өймөкөөн улууһун киинигэр Уус-Ньараҕа 2014 сылтан “Мин докумуоннарым” диэн элбэх функциялаах киин аһыллан үлэлиир. Кылаабынай исписэлиис э.т. Майя Дьячкова иһитиннэрбитинэн, бу тэрилтэҕэ күҥҥэ ортотунан 20-тэн тахса киһи сылдьар.
Дьону кытта уопсайа үс исписэлиис үлэлиир. Манна араас хабааннаах боппуруостарга консультация, сүбэ-ама ылаары олохтоммут өҥөлөрү туһанар дьон тиһигин быспакка кэлэ турар. Кэрэхсэбиллээҕэ диэн, тэрилтэ үлэһиттэрэ хас нэдиэлэ аайы улуус кииниттэн 400-н тахса км тэйиччи сытар Томтор нэһилиэгэр тиийэн тыа сирин дьонугар араас өҥөнү оҥороллор. Оттон улуус атын нэһилиэнньэлээх пууннарыгар “Мин докумуоннарым” киин исписэлиистэрэ былаан быһыытынан сылга түөртэ сылдьаллар.
Үгүс киһи МФЦ-га пааспар ылыытын, хамсаабат баайын-дуолун, тырааныспарын, кыбартыыраны, олорор дьиэни регистрациялааһын курдук өҥөнөн туһанар. Маны сэргэ элбэх функциялаах киин исписэлиистэрэ нэһилиэнньэ кыаммат араҥатыгар босхо юридическай консультациялары оҥороллор. Суругунан уонна тылынан төлөбүрдээх консультацияны ким баҕарар ылыан сөп. Манна электроннай уочарат олохтоммут. Ону сэргэ наадыйар киһи бэйэтэ ханнык баҕарар судаарыстыбаннай өҥөнөн туһанарыгар анаан саалаҕа көмпүүтэр турар. Үгүс дьон тырааныспары ыытары көҥүллүүр дастабырыанньаларын, сааны-саадаҕы туттууга көҥүл болдьоҕун уһаттарыыны, о.д.а. докумуоннарын манна кэлэн босхо интернетинэн gosuslugi.ru сайтка киирэн оҥотторор. Билигин бу саамай элбэх киһи туһанар өҥөтө буола сылдьар, тоҕо диэтэххэ, күн бүгүн госпошлина төлөбүрэ 30 бырыһыан намтаан турар.
Төрдүс сылын үлэлиир киин оҥорор өҥөтө сылын аайы элбээн иһэр. Итини таһынан улуус дьоно манна сир учаастактарын, араас тутуулары, олорор дьиэни бас билиигэ сыһыаннаах докумуоннарын кытта оҥотторуохтарын сөп. Биирдэм урбаанньыттар наадыйар сибидиэнньэлэрин сайаапка түһэрэн бу киинтэн ылар кыахтаахтар. Оҕо босуобуйатын анааһыҥҥа, ийэ хапытаалыгар, саҥа төрөөбүт оҕону регистрациялааһын, бэтэрээннэр санаторнай-курортнай эмтэниилэригэр, биэнсийэни анааһыҥҥа, социальнай страховкалааһыҥҥа о.д.а. сыһыаннаах боппуруостары, сайаапкалары түһэриини барытын “Мин докумуоннарым” элбэх функциялаах киин нөҥүө оҥотторуохха сөп.
Мира Аргунова была отобрана среди более восьми тысяч авторов
В здании площадью 570 кв.м. оборудовано 20 кабинетов
Госпремию Якутии в области журналистики имени Никифорова-Кулумнуура вручили Николаю Бястинову
Ключевая тема ярмарки в этом году — «Школа в социокультурном измерении: образовательная поддержка социально-экономического развития…
Торжественное открытие соревнований состоится 2 июля с 16 часов
Прогноз погоды на среду, 2 июля