Өймөкөөн улууһун эдэр талааннара ырыа киэһэтин бэлэхтээтилэр

20:38, 27 ноября 2017
Текст:
Читайте нас на
Дзен
afisha.png

Соторутааҕыта Тымныы полюһун талааннарын киэҥ эйгэҕэ таһаарар сыаллаах-соруктаах “Өймөкөөн сулустара-2017” куонкурус буолла.


Өймөкөөн улууһун эдэр талааннара улуус киинин олохтоохторугар өрөбүл күн олус үчүгэй сынньалаҥы бэлэхтээтилэр. Ол курдук Томтор нэһилиэгин “Чыпчаал” ыччат түмсүүтүн, Өймөкөөнтөн “Тэтим”, Сордоҥноохтон “Ыллык”, Үчүгэйтэн “Дабаан”, Уус-Ньараттан “Эдэр гвардия” уонна улуус киинин “Эдэр исписэлиистэрин сойууһа” түмсүүлэр бэрэстэбиитэллэрэ кытыннылар.

Улуу Өктөөп 100 сылынан сибээстээн ырыаһыттар бастакы блокка Сэбиэскэй кэминээҕи ырыалары, төһө даҕаны бэйэлэрин көлүөнэлэрин ырыалара буолбатар, итэҕэтиилээхтик толордулар. Көрөөччү Өймөкөөн нэһилиэгиттэн төрүттээх, билигин Сордоҥноох нэһилиэгэр саҥардыы үлэлээн эрэр Айар Старков Улуу Аҕа дойду сэриитигэр аналлаах “Журавли” ырыаны ийэн-куойан туран ыллаабытын улаханнык биһирээтэ. Култуура эйгэтигэр сыл аҥара үлэлээбит Алена Романова туох даҕаны доҕуһуола суох ыраас куолаһынан ыллаабыта кэрэхсэбиллээх.

Ити курдук хас нэһилиэк аайыттан кыттыбыт ырыаһыттар бары даҕаны дьон-сэргэ кутун туттулар. Олортон биирдэстэринэн “Көрөөччү биһирэбилэ” номинация хаһаайыттара, үгүһү эрэннэрэр эдэр дьон, Н.М. Заболоцкай-Чысхаан аатынан Томтор орто оскуолатын үөрэнээччилэрэ – Семен Атласов, Вася Захаров уонна Иван Бушуев.

Оксана Суздалова, “Үөрүү” трио салайааччыта:

— Бу уолаттар улуустааҕы, өрөспүүбүлүкэтээҕи куонкурустарга ситиһиилээхтик кытталлар. Былырыын Дьокуускайга “Кыһын Саха сириттэн саҕаланар” бэстибээлгэ кыттан, 2-с истиэпэннээх лауреат буолбуттара. Ыллыыр, кэрэни кэрэхсиир оҕо барыга бары ситиһиилээх буолар. Уолаттарым үөрэхтэригэр да үчүгэйдэр, оскуола актыбыыс оҕолоруттан биирдэстэрэ буолаллар. Кэнэҕэскитин устудьуоннаахтахтарына даҕаны бу дьарыктара туһалаах буолуо. Бу оҕолор гитараҕа, синтезаторга оонньуур талааннаахтар. Семен Атласов фонограмма оҥорорго холонор. Ваня Бушуев куонкуруска улахан дьону сэргэ сольнай нүөмэринэн кытынна.

Айар Старков, ыччат “Ыллык” түмсүүтэ, Сордоҥноох:

— Мин Дьокуускайдааҕы култуура колледжын бүтэрэн, бу дьыл балаҕан ыйыттан Сордоҥноох нэһилиэгэр үлэбин саҕалаатым. Нэһилиэк 24 оҕотун ырыаҕа уһуйабын. Оҕолору кытта мюзикл туруора сылдьабыт, бу үлэбитин Саҥа дьыл кэнниттэн олохтоохтор дьүүллэригэр таһаарыахтаахпыт. Инникитин былаан элбэх. Төрөөбүт улууспар маннык куонкурустарга кыттыбатаҕым номнуо 7 сыл буолбут эбит. Конкуреннарым олус күүстээхтэр, талааннаахтар. Хас биирдии киһи куолаһа ураты, ырыаны көрөөччүгэ тиэрдэр ньымата эмиэ олох туспа. Ол иһин мин маннык куонкурустартан уопут ылар идэлээхпин. Тэрээһин таһыма үрдүк диэн сыаналаатым, саҥа үлэтин саҕалаабыт киһиэхэ барыта интэриэһинэй, биир идэлээхтэрбиттэн элбэххэ үөрэнэргэ, кинилэр үтүө уопуттарыттан туһанарга бэлэммин.

Алена Романова, ыччат “Тэтим” түмсүүтэ, Өймөкөөн:

— Дьокуускайдааҕы Култуура колледжын эстраднай салаатын бүтэрэн, ийэм төрөөбүт сиригэр Өймөкөөҥҥө үлэлээбитим сыл аҥара буолла, Биэрэк-Үрдэ учаастак кулуубугар уус-уран салайааччыбын. Оҕо эрдэхпиттэн ыллыырбын сөбүлүүбүн. Мэҥэ Хаҥалас улууһун Төҥүлү нэһилиэгэр олорон, улаатан, Светлана уонна Егор Неустроевтар “Тулуйхан” устуудьуйаларыгар оҕо саадыттан дьарыктаммытым. Онтон устудьуоннуу сылдьан эмиэ кинилэргэ үөрэммитим. Улуустааҕы куонкуруска бары тус-туһунан суоллаах-иистээх ырыаһыттар сценаҕа тахсыбыттара, Өймөкөөн улууһугар ыллыыр ыччат үгүһүн туоһулаата.

Дмитрий Винокуров, Томтор, “Чыпчаал” ыччат түмсүүтэ:

— Мин үс саастаахпыттан ыллыыбын. Бастаан сахалыы ырыаны араадьыйаҕа истэн үтүктэр буолбутум. Оскуолаҕа үөрэнэ сылдьан Оксана Федоровна Суздаловаҕа түөрт сыл дьарыктаммытым. Саҥа саҕалаан иһэн, Дьокуускайга ыытыллыбыт куонкуруска кыттан үһүс миэстэ буолбутум. Онтон ыла сценаҕа тахсан ыллыахпын сөп эбит диэн бэйэбэр эрэнэр буолбутум. “Хотугу сулус” оҕо телерадиоакадемиятын улуустааҕы, зонатааҕы көрүүлэригэр хаста даҕаны кыттан, лаурет буолбутум. Биирдэ өссө “Лауреаттар лауреаттара” ааты ылар чиэскэ тиксибитим.

Альберт Николаев, ыччат “Дабаан” түмсүүтэ, үчүгэй:

— Мин Өймөкөөн улууһугар күтүөппүн. Былырыын кэргэмминээн Үчүгэй нэһилиэгэр көһөн кэлбиппит. Кини оскуолаҕа эбээн тылын куруһуогун ыытар, мин хочуолунайга слесарьбын. Манна көһөн кэлиэхпититтэн кэргэмминээн нэһилиэккэ ыытыллар тэрээһиннэргэ актыыбынайдык кыттарга дьулуһабыт. Бу бүгүн – Үчүгэй ыччатын сирэйдээн кэлэн турабын. Ырыаны олоҕум аргыһа оҥостобун. Ол гынан баран, сценаҕа тахса үөрүйэҕэ суох киһибин. Бастаан 6 саастаахпар сценаҕа тахсыбытым уонна бу бүгүн үктэнним. Бэйэбин тургутан көрөн, үтүө уопут ыллым, маннык куонкурустарга кыттыахпын сөптөөх эбит диэн санааҕа кэллим.

“Өймөкөөн сулустара-2017” ырыа куонкуруһун түмүгэ:

“Өймөкөөн улууһа (оройуона)” МТ дьаһалтатын баһылыгын бирииһин хаһаайына – Айар Старков, Сордоҥноох.

“Уус-Ньара” МТ дьаһалтатын баһылыгын бирииһин хаһаайката – Алена Романова, Өймөкөөн.

“Бастыҥ уобарас” номинация – Нарыйа Сивцева, Уус-Ньара.

“Урукку ырыалар кылаабынай туһунан” номинация – Иван Бушуев, Томтор.

“Кураж” номинация – Дмитрий Винокуров, Томтор.

“Дууһа иэйиитэ” – Ольга Соловей, Аартык.

“Көрөөччү биһирэбилэ” номинация – “Үөрүү” трио, Томтор (салайааччы Оксана Суздалова).

+1
0
+1
0
+1
0
+1
0
+1
0
+1
0
+1
0
28 марта 28.03
  • -12°
  • $ 92,59
  • 100,27

Сообщить об опечатке

Текст, который будет отправлен нашим редакторам: