Чурапчы улууһун Чакырыгар саҥа айан суола арылынна

Аҕыйах хонуктааҕыта Чурапчы улууһун Чакыр нэһилиэгэр олус долгутуулаах, үөрүүлээх тэрээһин үгүс дьону-сэргэни биир санааҕа түмэн ыытылынна. Уонча сыллар усталарыгар дьон ыра санаатынан буолбут айан суола оҥоһуллан үлэҕэ киирдэ.

Барыта 12 км усталаах суол хаачыстыбалаахтык оҥоһуллан, болдьох кэмигэр түмүктэннэ. Бу үлэ бастакы хардыытын нэһилиэк урукку баһылыга Т.В. Адамова дьүккүөрдээхтик туруорсан, бастакы акылаат торумун оҥорсубутун бэлиэтиир тоҕоостоох.

Кинини улуус салалтата, баһылык А.Т. Ноговицын, тутууга солбуйааччы В.М. Пермяков биир өйүнэн-санаанан өйөөн, суола суох сытар ыраах нэһилиэккэ, суол тыын боппуруос буоларын учуоттаан туран, үлэни сүрүннэһэн барбыттара. С.В. Винокуров миниистирдээх СР Суол уонна транспорт министерствотын коллектива, Б.И. Романов салайааччылаах СР айан суолугар департамена, СР Тыатын хаьаайыстыбатын министерствота бииргэ сорунуулаахтык үлэлэһиилэрин түмүгэр, күн бэҕэһээ аалай лиэнтэ быһылынна.

Үгүс айанньыттар суол оҥоруутун бэрт судургу курдук саныыллар. Ити эрээри аныгы кэм ирдэбилинэн үрдүк суоллары оҥоруу үгүс сыраны, үбү-харчыны, быһаарыныылаах кэпсэтиини эрэйэрин сүүрбүт-көппүт, үлэлэспит эрэ дьон билэн эрдэхтэрэ. Москва куоракка экспертизани ааһыы, салгыы сөптөөх программаҕа киирсии, үлэни тохтоппот эрэ туһуттан араас толкуйдары тобулуу, бу барыта биир хамаанда ыытар үлэтигэр түмүллэн, үтүө түмүктэри аҕалыан сөп. Төһө да, кэм ирдэбилигэр суол бопппуруоһа сытыытык турдар, улууспут салалтата сатабыллаах кэпсэтиитинэн, таһаарыылаах үлэтинэн-хамнаһынан, бу үлэ сыл ахсын дьүккүөрдээхтик ыытыллар, былааннаммыт биэрэстэлэр олоххо киирэллэр.