Байыаннай комиссариат үлэлээбитэ 100 сылын Тиксиигэ бэлиэтээтилэр

Муус устар 8 күнүгэр сыл ахсын Рос­сия үрдүнэн “Байыаннай комиссариат үлэһиттэрин күннэрэ” бэлиэтэнэр. Бу күҥҥэ 1918 сыллааахха Норуот Ко­миссардар Сэбиэтин Декретынан буо­ластааҕы, уезтааҕы, губерниятааҕы уонна уокуруктааҕы байыаннай комис­сариаттар тэриллибиттэр.

Бу Кы­һыл Аармыйа туруутугар биир сүрүн государственнай аакта буолар. Онон байыаннай комиссариаттар тэрил­либиттэрэ быйыл лоп курдук сүүс сылын туолла. Бу бэлиэ күнү муус устар 9 күнүгэр “Айхал” этно-кул­туур­най кииҥҥэ сулууспалаахтар уон­на олохтоохтор, Булуҥнааҕы уонна Эдьи­гээннээҕи байыаннай комисса­риат үлэ­һиттэрэ үөрүүлээхтик бэлиэтээти­лэр.

Байыаннай комиссариат көхтөөх, ча­ҕылхай үлэтинэн кылгас кэм иһигэр, модун күүстээх үтүөтүнэн биллэр. 100 сыл устатын тухары комиссариаттар Дой­ду сэбилэниилээх күүһүн, көмүскэнэр кыаҕын бөҕөргөтүнүүтүн сайдыытыгар кылааттарын уурбут уонна салгыыр сүрүн тэрилтэлэртэн биирдэстэрэ буолаллар.

Булуҥ улууһун баһылыга Игорь Куд­ряшов, Саха Өрөспүүбүлүкэтин Уопсас­тыбаннай палата чилиэнэ Татьяна Асаева, улуустааҕы депутаттар Сэбиэттэрин бэ­рэссэдээтэлин солбуйааччыта Леонид Калимбет, 14145 нүөмэрдээх байыаннай чаас хамандыыра Родион Мосенцев уонна кинилэр биир идэлээхтэрэ бэйэлэрин эҕэрдэ тылларын эттилэр, бары үчүгэйи баҕардылар. Ол курдук эҕэрдэлээччилэр чэпчэкитэ суох үлэҕэ сылдьар дьоҥҥо инникитин үлэлиир үлэлэрэ бэриниилээх, таһаарыылаах буоларыгар баҕардылар.

Россия үрдүнэн улахан суолталаах күҥҥэ Булуҥнааҕы уонна Эдьигээннээҕи байыаннай комиссар Андрей Приход­ченко таһаарыылаах үлэтин иһин мэтээлинэн наҕараадаланна. Байыаннай комиссариат салайааччыта Андрей Георгиевич бииргэ үлэлиир дьонугар “Байыаннай комиссариаттар 100 сыллара” диэн туоһулаах өйдөбүнньүк мэтээллэри, грамоталары туттартаата. Ону таһынан махтал суруктары, грамоталары Тиксии араас эйгэтигэр үлэлиир үлэһиттэригэр туттардылар.
Үлэһиттэри наҕараадалааһын кэнниттэн култуура, байыаннай салаа үлэһиттэрэ, ону тэҥэ Тиксии бөһүөлэгин оҕо саадын иитиллээччилэрэ, оскуола үөрэнээччилэрэ уонна талааннаах дьон дойду үрдүнэн суолталаах күҥҥэ бырааһынньыктааҕы кэнсиэр бэлэх ууннулар. Бэлиэтээн эт­тэххэ, уһуйаан кырачааннара олус үчүгэй сахалыы, онтон салгыы, хоту дойдутугар олорорбутун туоһулуур бэрт үчүгэй хотугулуу үҥкүүлээн, дьон сүргэтин көтөхтүлэр.