Байаҕантайдар цифровой телевидение 10 ханаалын көрөр буоллулар

Тандаҕа икки нэһилиэк — II Байаҕантай уонна Байаҕантай — олохтоохторун цифровой телевидениенан босхо хааччыйар 50 м үрдүктээх вышка үлэҕэ киирдэ. Онон 10 ханаал биэриитин хааччаҕа суох көрөр кыахтанныбыт. Бу РФ бырабыыталыстыбатын 2009 сыллаахха ылыллыбыт дьаһала.

---

Тандаҕа турбут тутуу республикаҕа туруоруллар 148 вышкаттан биир үрдүктэрэ буолар. Билиҥҥи туругунан 130 туруоруллубут. Кыһыл Сыырга 75 м вышка турбута биллэр.

Бастакы биригээдэ антеннаны сытыаран эрэн таҥмыта. Онтон бигэргэтиллибит технологическай быһаарыынан, улахан кран кэлэн туруору тардар диэн буолта. Ол гынан баран, суол куһаҕанынан, ити быһаарыы тохтообута.

Сайын бүтүүтэ бастаан Дьокуускайтан республиканскай, онтон атырдьах ыйын 27-28 күннэригэр Москваттан программа туолуутугар ыытыллар үлэлэри хонтуруоллуур уонна көмө оҥорор сыаллаах-соруктаах анал комиссиялар кэлэн үлэлээн барбыттара. Комиссия вышка бары чааһа барыта баарын-суоҕун учуоттаан, баар кыһалҕалары билсэн, олохтоох дьаһалта баһылыга Иванов И.Н. кытта сүбэлэһэн, вышканы таҥан туруорар биригээдэни үлэлэтэргэ былааннаммыттара. Ол түмүгэр Өймөкөөнтөн Атласов Семен Дмитриевич салайааччылаах, Атласов Дмитрий Семенович, Прибылых Дмитрий Дмитриевич, Кривошапкин Андрей Иванович, Петров Михаил Васильевич курдук эдэр үлэһиттэрдээх биригээдэ кэлэн ый устата вышканы туоруордулар. Сэтинньи ый 2 күнүгэр, Россия үрдүнэн Сомоҕолоһуу күнүн уонна Өктөөп революциятын 100 сылын көрсө, нэһилиэк саҥа баһылыга Егоров С.И. вышка саамай чыпчаалыгар кыһыл былааҕы иилбитэ.

Вышканы туруорааччылар үлэлэрин бүтэрэн дьиэлээри сылдьан, музей көрдүлэр. “Республикаҕа биллэр музейга сылдьан олус диэн астынныбыт, дуоһуйдубут. Элбэҕи биллибит”, — диэн анал тэтэрээккэ суруйан хааллардылар.

Билигин Танда уонна Тиит Арыы олохтоохторо эбии 10 ханаал холбонорун күүтэллэр.