Амма Соморсунугар балаҕан ыйын 1 күнүгэр икки көлүөнэ көрсүһүүтэ буолла

Амма улууһун бары оскуолаларыгар бастакы чуорааннар лыҥкыныы тыаһааннар, саҥа үөрэх дьыла саҕаламмытын кэрэһэлээтилэр. Быйыл улууспут үрдүнэн аан бастакыларын оскуола боруогун 345 оҕо атыллаан, билии аартыгын арыйдылар, бастакы уруоктарыгар үөрэннилэр.

Соморсун орто оскуолатыгар 14 кырачаан бастакыларын паартаҕа олорон бастакы учууталларын болҕойон иһиттилэр. Кинилэргэ бу күн икки бүк үөрүүлээх уонна долгутуулаах буолла. Ол курдук 60 сыл аннараа өттүгэр аан бастаан бу оскуолаҕа «нулевой» кылааска киирбит кырдьаҕас көлүөнэ дьон кэлэн истиҥник эҕэрдэлээтилэр, алгыс тылларын анаатылар.

«Биһиги Соморсун оскуолатыгар 1957 сыллаахха 28 буолан үөрэнэ киирбиппит. Ол күммүтүн олус күндүтүк саныыбыт. Онон үбүлүөйдээх сылбытыгар быйылгы бастакы кылаас оҕолорун эҕэрдэлииргэ быһаарынан кэлэн, бэлэхпитин туттардыбыт. Билигин биһиги ортобутугар үтүөлээх үлэһиттэр, араас идэлээх дьон элбэхпит. 60 сыл устата бары олус эйэлээхтик, бииргэ тутуһан сылдьабыт. Онон бүгүн бастакы кылааска киирбит оҕолор эмиэ биһиги курдук үөрэхтээх, идэлээх дьон буола улааттыннар, дойдуларыгар туһалаах буоллуннар, оскуолаҕа киирбит күннэрин үчүгэйдик өйдөөн хаалан, дууһаларыгар сылаастык илдьэ сырыттыннар диэн алгыыбыт«, — диэн этэр СР култууратын үтүөлээх үлэһитэ, драматург, суруйааччы В.Е. Васильев-Харысхал.

Соморсун оскуолата хас да предмети дириҥэтэн үөрэтэр, улууска эмиэ биллэр, талааннаах оҕолору иитэн, үөрэтэн таһаарар үөрэх кыһата буолар. Оскуола директора В.И.Кононова кэпсээбитинэн, быйылгы үөрэх дьылыгар 128 үөрэнээччи баар. Ааспыт сылга оскуоланы 14 оҕо бүтэрэн, бары ситии-хотуу аттестатын ылан, талбыт үөрэхтэригэр киирбиттэр. Аҥардарыттан ордуга үрдүк үөрэх кыһаларын устудьуоннара буолбуттар. Оскуола дьиэтигэр сайын устата ититии, кырааскалааһын үлэтэ ыытыллыбыт.

Бу күн үөрэнээччилэри, учууталлары улуус дьаһалтатын аатыттан нэһилиэк куратора, тыа хаһаайыстыбатын управлениетын начальнига И.С. Кононов эҕэрдэлээтэ.