«Аляска ‒ Сибиир» салгын тыраассатын кистэлэҥ аэродромугар үлэлээбиттэри Төҥүлүгэ үйэтитэллэр

10:00, 02 декабря 2017
Текст:
Читайте нас на
Дзен
afisha.png

Аҕа дойду Улуу сэриитин кэмигэр Сэгэлэйгэ олохтоммут көтөр ааллары көрсөр аэродромнар Саха сиригэр элбэх сиргэ төрүттэммиттэрэ. Сэтинньи 29 күнүгэр Төҥүлү нэһилиэгин Сэгэлэй эбэтигэр «Аляска ‒ Сибиир» салгын тыраассатын кистэлэҥ аэродрома төрүттэммитэ 75 сылын көрсө үөрүүлээх тэрээһин ыытылынна.


«Аляска ‒ Сибиир» салгын тыраассатын кистэлэҥ аэродромугар үлэлээбит дьону-сэргэни үйэтитии Төҥүлүгэ эрэ дьоһуннаахтык тэриллэр диэн бу күн бэлиэтээн эттилэр.

Тырахтарыыстаабыт оччотооҕу ыччаттар «кистэлэҥ саппаас аэродромҥа үлэлээбиппит туһунан кимиэхэ да кэпсиэхпит суоҕа» диэн андаҕар биэрбиттэрин толороннор, сорох кырдьаҕастар хара өлүөхтэригэр диэри оннооҕор оҕолоругар сиһилии кэпсээбэтэхтэр эбит. Ол эрээри мусуой үлэһитэ Галина Стручкова сүүрүүтүнэн-көтүүтүнэн, быһаччы үлэлээһининэн устуоруйаны сөхсүтүү үлэтэ ыытыллыбытыгар улахан өҥөлөөх.

«АлСибка» анаммыт пааматынньыкка бу үөрүүлээх күн ыччаттар венок уурдулар. Тэрээһиҥҥэ аэродромҥа тырахтарыыһынан үлэлээбит эдэркээн кыыс, билигин 94-с хаарын санныгар түһэрбит, Араҥас нэһилиэгин олохтооҕо Матрена Киренская ыалдьыттаата. Бу иннинэ Майаҕа олорор эмиэ 94 саастаах Варвара Кононованы баран эҕэрдэлээбиттэрэ.

Саппаас аэродром төрүттэммитэ 75 сылынан улуус баһылыгын бастакы солбуйааччы Павел Сазонов, улуустааҕы бэтэрээннэр сэбиэттэрин бэрэссэдээтэлэ Маргарита Максимова төлөннөөх эҕэрдэлэрин тиэртилэр, улуустааҕы социальнай көмүскэллээх буолуу управлениетын салайааччытын Иван Шестаков аатыттан Матрена Киренскаяҕа, Галина Стручковаҕа, Варвара Кононова кыыһыгар Любовь Илларионоваҕа «Махтал суруктары» туттардылар. Эҕэрдэ тылларын «Төҥүлү нэһилиэгэ» МТ баһылыга Гаврил Данилов, «Араҥас нэһилиэгэ» МТ баһылыга Вера Птицына эттилэр.

Дьокуускай куораттан кэлбит ыалдьыттар: Аҕа дойду Улуу сэриитин кыттыылааҕа, Дьокуускай куорат бэтэрээннэрин сэбиэтин бэрэссэдээтэлэ Михаил Попов эҕэрдэлээтэ, СӨ байыаннай комиссарын солбуйааччыта Аркадий Саввинов байыаннай-патриотическай иитиигэ төҥүлүлэр болҕомтону ууралларын бэлиэтээтэ, «Махтал» суруктары туттарда. Өрөспүүбүлүкэтээҕи авиация сулууспатын үлэһиттэрин биир идэлээхтэр сойуустарын бэрэссэдээтэлэ Евгений Тарасов элбэх аэродром үлэлээбитэ эрээри, үлэлээбит дьону Төҥүлүгэ эрэ үрдүктүк чиэстииллэрин иһин махталын тиэртэ.

‒ Оччотооҕу кэмҥэ салгын тыраассатыгар тыраахтарыыс эдэркээн кыргыттар түүннэри-күнүстэри үлэлээбиттэрэ, бойобуой дьуһуурустубаҕа турбуттара. Кинилэр, дьиҥэр, Саха сирин авиациятын бэтэрээннэрэ аатын сүгэр кыахтаахтар, ‒ диэн кини эбэн эттэ.

Аэродромҥа үлэлээбит хорсун-хоодуот ыччаттарга аналлаах пааматынньык таһыгар мас олордон, кэлбит-барбыт ыалдьыттары сырытыннарыахха диэн Сэбилэниилээх Күүстэр бэтэрээннэрин сэбиэтин бэрэссэдээтэлэ Василий Павлов эттэ уонна Аляска-Сибиир аэродромнарын туһунан толору сырдаппыт суруйааччы Иван Негенбля кинигэлэрин туттартаата. Төҥүлүгэ сэттис кылааска үөрэнэ сылдьан Америкаттан кэлбит мэхээньиги кытта хайдах гынан өйдөһөн, бэйэ-бэйэлэригэр көмөлөһүспүттэрин, алтыспыттарын туһунан Сэбилэниилээх Күүстэр бэтэрээннэрин сэбиэтин бырабылыанньатын чилиэнэ, Төҥүлүттэн төрүттээх Иван Мохначевскай бэрт сэргэхтик кэпсээтэ.

Аляска ‒ Сибиир аэродромугар үлэлээбит дьону чиэстииллэрин иһин дьоруой ийэ, ытык кырдьаҕас Матрена Киренская, кини дьүөгэлэрэ Варвара Кононова кыыһа Любовь Илларионова, билигин бу күн сиригэр суох Евдокия Шепелева кыыһа Саргылаана Винокурова истиҥ махталларын тиэртилэр.

Биэчэргэ аэродром туһунан чинчийэр-практическай кэмпириэнсийэ кыайыылаахтарын бэлиэтээтилэр, Дьаҥхаады нэһилиэгин Бочуоттаах гражданина, «Ийэҕэ Үрдүкү махтал» бэлиэ хаһаайката Евдокия Шепелева ахтыытыгар олоҕурбут дьүһүйүүнү Төҥүлү оҕолоро туруордулар.

+1
0
+1
0
+1
0
+1
0
+1
0
+1
0
+1
0
29 марта 29.03
  • -14°
  • $ 92,26
  • 99,71

Сообщить об опечатке

Текст, который будет отправлен нашим редакторам: