Аллараа Бэстээхтээҕи Тырааныспар техникумугар устудьуоннар дьоҕурдарын таһымын бэрэбиэркэлиир итиэннэ идэтигэр бастыҥтан бастыҥы быһаарар хас эмэ түһүмэхтээх «Интеллектуальнай уонна айар дьоҕур марафона» үлэтин саҕалаата. Маннык тэрээһин 2012 сыллаахтан ыытыллар.
2017 сыллааҕы марафон бырагыраамата киэҥ далааһыннаах. Тэрээһин чэрчитинэн үс нэдиэлэ тухары устудьуоннар ортолоругар өй күрэҕэ «Брейн-ринг» оонньуу, үөрэтэр дьиссипилиинэлэринэн метаолимпиада, хамаандалар түмсүүлээхтэрин, булугас өйдөөхтөрү быһаарар аныгылыы квест-оонньуу, омук тылын күнэ, идэлэригэр бастыҥ устудьуоннары бэлиэтиир маастарыстыба куонкуруһа, эрэгийиэннээҕи олимпиада, Экология сылынан интэриниэт нөҥүө биктэриинэҕэ кыттыы, КВН хамаандатын туруоруу, итиэннэ «Инникигэ, идэҕэ хардыы» диэн эдэр чиничйээччилэр пуорумнара ыытыллыахтара. Бу марафон түмүгүнэн бастыҥтан бастыҥнар кыһыҥҥы сиэссийэлэрин туйгунунан түмүктүүр кыахтаныахтара, бэйэтин идэтин баһылыырга бастыҥтан бастыҥ көрдөрүүлээх устудьуон техникум чиэһин көмүскээн, үөрэх атын кыһаларын устудьуоннарын кытта күрэстэһэр чиэстэниэҕэ.
«Интеллектуальнай уонна айар дьоҕур марафона ‒ 2017» үөрүүлээх аһыллыытыгар техникум дириэктэрэ Василий Петров, улуус баһылыгын экэниэмикэ уонна инбэстииссийэ бэлиитикэтигэр солбуйааччы Владимир Птицын, Аллараа Бэстээх баһылыгын солбуйааччы Иван Нестеров уо.д.а. устудьуоннары эҕэрдэлээтилэр.
Марафон балаһыанньатын техникум дириэктэрин үөрэх чааһыгар солбуйааччы Любовь Алексеева сиһилии билиһиннэрдэ, хас биирдии көрүҥҥэ эппиэтинэстээхтэр итиэннэ эдэр преподавателлэр түһүмэхтэр усулуобуйаларын сырдаттылар.
Тэрээһин биир ураты бэлиэ түгэнинэн аан дойду таһымнаах WorldSkills чөмпүйэнээтигэр Россия сүүмэрдэммит хамаандатыгар киирсэн, «Обладатель профессионального мастерства» диэн анал ааты сүгэн кэлбит Хаҥаластан төрүттээх Степан Кириллин ыалдьыттааһына буолла. Биир дойдулаахпыт, Аллараа Бэстээх техникумугар үлэлээбит уонна СӨ эрэгийиэннээҕи WorldSkills тэрийэр киинин салайааччыта Владислав Хабаров көҕүлээһининэн, кини устудьуоннары кытта көрсүһүүтэ тэрилиннэ.
«Оскуолаҕа үгүс сүрүн предметтэри ыарырҕатар этим, ол эрээри ас астыырбын олус сөбүлүүрүм. Ол иһин атыы-эргиэн — экэниэмикэ коллеһыгар үөрэнэ киирбитим. Устудьуоннар, эһиги, туохтан да чаҕыйбакка куонкурустарга кыттан иһиҥ, бэйэҕит маастарыстыбаҕыт таһымын үрдэтэргэ дьулуһуҥ», ‒ диир кондитер идэлээх аан дойду чөмпүйүөнэ.
«Орто да үөрэххэ үөрэнэр устудьуоннар үрдүгү ситиһэллэр, бэйэҕит дьыалаҕытыгар үрдүк таһымнаах, идэҕитигэр бэриниилээх буоллаххытына киһи быһыытынан сайдаҕыт, дойдугутугар туһалаах дьон буола үүнэҕит. Ити туохтааҕар даҕаны наадалаах. Онон бу марафонтан тус бэйэҕитигэр элбэҕи, туһалааҕы иҥэриниҥ», ‒ диэтэ Владислав Хабаров.
Номинант премии «Человек труда» Якутии рассказала о том, как однажды кардинально изменила свою жизнь
К традиционному хороводу присоединились представители власти и общественности республики
Исполнила песню Июлина Попова
Глава Чурапчинского района подчеркнул, что развитие Якутии сегодня - следствие создания государственности
Звезды гороскопа с удвоенной силой будут склонять к осторожности
В народном календаре 28 апреля отмечается Пудов день