Сунтаар улууһун бастыҥ мэхэньисээтэринэн Алексей Бычыгыров ааттанна

Сунтаар улууһун Куокуну нэһилиэгэр «Сыл бастыҥ мэхэньисээтэрэ» куонкурус ыытылынна.

Сыл бастыҥ мэхэньисээтэрин аатын күрэһигэр 9 нэһилиэктэн 16 мэхэньисээтэр кэлбит: Бор­доҥ­тон А.А.Васильев, И.И.Алек­сеев, А.И.Алексеев, Е.П.Михай­лов, Куокунуттан Л.В.Николаев, Н.С.Петров, Н.К.Михайлов, А.К.Яков­лев, Сунтаар сэлиэнньэ­титтэн А.А.Попов, Тойбохойтон А.М.Бычыгыров, Илимнииртэн А.И.Иванов, Толоонтон С.Е.Ники­тин, Кириэстээхтэн Н.Ф.Аниси­мов, В.В.Тороп, Арыылаахтан С.И.Иванов, Дьаархантан П.Р.Кы­ре­лов.

Бастакы түһүмэххэ теорети­чес­кай билиини тургутууга суо­лунан сылдьыы быраабылатыгар тест толордулар. Эбиэт кэннит­тэн эргэ пуорка күрдьүл­лү­бүт сиргэ бардылар. Балаак­каҕа аһаан баран күрэс саҕалан­на. Икки бөлөххө хайыттылар. Бастакылар МТЗ-82 мааркалаах «Бела­русь» тыраах­та­рынан «восьмер­ка» оҥорду­лар, гараас­ка турар бырысыабы холбонну­лар, «змей­каҕа» эргий­ди­лэр. Иккис бөлөх­төр сабыс-саҥа улахан «Бела­русь» тыраах­та­рынан навестаах диискэни холбоннулар, көтөхтөр­дүлэр, хаамтаран ыллылар.

Улахан эрийсиилээх күрэс түмүгэр бастакы миэстэни Той­бохойтон кэлбит А.М.Бычыгыров ылар чиэскэ тигистэ. Иккис бочуоттаах миэстэни олохтоох Куокуну мэхэньисээтэрэ Л.В.Ни­ко­лаев ылла. Үһүс миэстэ хаһаа­йынынан эмиэ Куокунуттан Н.К.Михайлов буолла.

Кыайыылаахтары наҕа­раа­далааһын, чиэстээһин «Кустук» култуурунай-спортивнай кииҥҥэ ыытылынна. «Сыл бастыҥ мэхэ­ньисээтэрэ» үрдүк ааты ылбыт Александр Бычыгыровка улуус дьаһалтатын баһылыга А.В.Гри­горьев 50 тыһ. солк. суу­ма­лаах сэр­типикээти уонна анал бэлиэ­ни, бэлэҕи туттарда.

Куонкурус бары кыттыылаахтара араас номинациялары, наҕараа­да­лары ыллылар.