Сардана Яковлева: «Киһи олоҕо бэйэтин илиитигэр»

170

Биллэр суруйааччыны кытта эн кылгас да кэмҥэ алтыһан ааспыт буоллаххына, ол көрсүһүү төлөннөөх уота олоҕун устата умуллубат. Суруйааччы өйүн-санаатын үрдүгэ, этэр тылын күүһэ-уоҕа итиннэ сыттаҕа.


Билигин математика учууталынан Эдьигээн оройуонугар Кыстатыам орто окуолатыгар үлэлии сылдьар Сардана Яковлева олоҕор биллэр суруйааччы Василий Скрябин-Идэлги улахан оруоллаах. Ол суруйааччыны кытта бэрт кылгас түгэҥҥэ көрсүһэн ааһыы буолбатах этэ. Сардана билигин суурйааччы-учууталга үөрэммит дьоллоох киһибин, киниттэн олус элбэҕи иҥэриммит, олохпор туһаммыт эбиппин диэн этэр.

Идэлги биллэр суруйааччы буоларын үөрэнээччилэр билэр этибит. Кини хас биирдии тыла ылыннарыылаах, оҕо болҕомтотун бэйэтигэр тардар туох эрэ туспа уратылаах учуутал этэ. Оччолорго кырдьык, Василий Васильевич мин олохпор бэлиэ миэстэни ылыа диэн санаабат этим. Оҕо буоллаҕым дии. Ол гынан баран, кини уруогар үөрэнээри, кини тылын-өһүн истээри оскуолаҕа ыксыыр, курдаттыы тартарар курдугум. Киниэхэ оннук туох эрэ ураты күүс баара. Билигин бэйэм учуутал, ийэ буолан олороммун, Василий Скрябин мин олохпор, бэйэм да билбэппинэн, бэлиэ суолу хаалларбыт эбит диэн кини сырдык аатыгар куруук махтана сүгүрүйэбин. Күннээҕи олохпор суруйааччы-учуутал эппит тылларын, үөрэтиитин-такайыытын элбэхтик туһанабын, — диэн кэпсиир эдэр учуутал.

Сардана 2013 сыллаахха ХИФУ математика уонна информатика институтун үөрэнэн бүтэрбитэ. Дойдутугар Мэҥэ Хаҥаласка учууталлаан баран, быйыл иккис сылын Кыстатыам оскуолатыгар үлэлиир.

Үөрэх министиэристибэтин нөҥүө биэс сылга дуогбарынан үлэлии кэлэргэ санаммыт эдэр учуутал хоту сир туһунан өйдөбүлэ кыра этэ. «Ханнык баҕарар киһи олоҕо бэйэтин илиитигэр баар. Киэҥ дуу, кыра дуу сиргэ олороргуттан тутулуктаах буолуон сөп. Ол гынан баран, киһи ханна олорорунан көрөн, бэйэтин олоҕун салайан биэрэр кыахтаах, — диэн толкуйдаах эдэр киһи.

Учуутал үлэтэ олус түбүктээх. Ардыгар киһи бэйэтин туһунан толкуйдуур бириэмэтэ да суох буолар. Наар үлэнэн эрэ олордоххо, дьиэҕэ-уокка, бэйэҥ сайдыыгар даҕаны ааҥҥын саптан кэбиһиэххин эмиэ сөп. Эдэр киһи олоҕу кытта тэҥҥэ хардыылаан иһиэхтээх. Сааспынан эдэрбинэн «Солинга» ыччат түмсүүтүгэр баарбын, эдэр ийэ быһыытынан эдэр ийэлэр түмсүүлэрин чилиэнэбин, оҕом оҕо саадыгар сылдьарынан төрөппүттэр түмсүүлэригэр эмиэ кыттабын. Оройуоҥҥа, нэһилиэккэ ыытыллар тэрээһиннэргэ Кыстатыам олохтоохторо, ыччаттара көхтөөхтүк кыттабыт. Ситиһиилэр эмиэ баллар. Онон сэргэхтик олоробут, — диир Сардана.

 

2
0