Нам улууһугар көмүөл мууһа устар

142

Нам улууһугар улахан халаан уута кэлэр түгэнигэр Үөдэй, Партизан, Никольскай, Хамаҕатта, Ленскэй, 2 Хомустаах, Арбын, Аппааны, Кыһыл Дэриэбинэ, Граф Биэрэгэ, Модут, Бөтүҥ ууга барар кутталлаах. Улуус территориятыгар ууга барыан сөптөөх сиргэ 7424 киһи олороро (онтон 2448 оҕо), 1673 дьиэ, 40 социальнай объектар бааллара биллэр. Сэрэхтээх буолууга анаан улууска 15 объегы быстах кэмҥэ олордууга бэлэмнээбиттэрэ.


Халаан уута нэһилиэккэ таҕыстаҕына улахан содуллаах буолара саарбаҕа суох, онон сылын аайы араас таһымнаах үлэлэри ыыталлар. Быйылгы сылга улуустааҕы дьаһалта иһинэн тэриллибит ыксаллаах быһыы-майгы комиссиятынан уматык, бородуукта саппааһа хааччыллан турар, улахан халаан уута кэлэр түгэнигэр нэһилиэктэргэ нуорманан тарҕатыахтара.

Ыам ыйын 17 күнүгэр «Нам улууһа» МТ баһылыга Александр Атласов дьаһалта иһинэн тэриллибит ыксаллаах быһыы-майгы уонна Гражданскай оборуона сүрүннүүр исписэлииһин Николай Монастыреву кытта Үөдэй нэһилиэгэр, Граф Биэрэгэр халаан уута ааһарын көрө-истэ, халаантан сэрэхтээх буолууга бэлэмнэнии үлэтин билсэ бара сырыттылар. Нэһилиэккэ дьуһуурустуба олохтонон чаас аайы уу таһымын бэлиэтииллэр. Быйылгы сылга халаан уута кыра буолан эрэх-турах сананаллар. 1 Хомустааҕынан Үөдэйгэ киирэр суолу Анньыспыт салаатынан суолу быһан, мыраан үрдүнэн Тоҥ Баһынан сылдьар буоллулар.

Александр Атласов, «Нам улууһа» МТ баһылыга: «Халаан уутуттан улаханнык эмсэҕэлиир нэһилиэктэргэ, Үөдэйгэ 2014 сылтан саҕалаан 2 км 550 м., Хатыҥ Арыыга 2012 сылтан саҕалаан АЗС-5 саҕалаан Граф Биэрэгинэн Кыһыл Дэриэбинэҕэ дылы 10 км. 470 см., Арбыҥҥа быйыл 100 м. усталаах дамбалары оҥорбуттара. Инникитин Хатыҥ Арыы дамбатын реконструкциялыырга шлюзтаах гына проект оҥоһуллан экспертизалыыр үлэҕэ сылдьаллар. Маны таһынан, биир сүрүн улахан тэрээһиннээх үлэ 2 Хомустаах нэһилиэгэ мыраан үрдүгэр Сэргэлээххэ көһүүтэ буолар. Партизан аннынан Эһэлээххэ харыы тахсыбатаҕына, халаан уута этэҥҥэ ааһыа дии саныыбыт”, — диэн санаатын үллэһиннэ.