Майалар олорор сирдэрин тупсарыыга анаммыт бырагыраама бырайыагын тула түмүстүлэр

104

Урукку өртүгэр улахан нэһилиэктэргэ тупсарыы үлэтигэр анаан өрөспүүбүлүкэ өртүттэн сылллата кэриэтэ үгүөрү үп-харчы көрүллэр этэ. Ити үлэ 2018 сылтан тохтуохтаах. Ол оннугар граннарга кыттан тупсарыыга үбү-харчыны булунар буоллубут. Онон сибээстээн Дмитрий Тихонов баһылыктаах «Майа сэлиэнньэтэ» МТ дьаһалтатын үлэһиттэрэ бу күһүн нэһилиэнньэ ортотугар ыйытыктары түҥэппиттэрэ.


Ыйытык ис хоһооно Майаҕа Ф.К.Попов уонна Майинскай уулуссалар быһа охсуһууларыгар былыр-былыргыттан баар кытахха дьон сынньанар искибиэрин оҥоруохха сөп дуу, биитэр үрдүгэр буор куттаран баран дьиэ туттарыахха сөп дуу диэн этэ. 700 киһи ыйытыллыбытыттан, бары кэриэтэ искибиэр оҥоруохха сөп диэн сөбүлэҥнэрин биэрбиттэрэ.

Граҥҥа кыттыыга үбүлээһини аан дойдутааҕы баан оҥорор. Ол эрээри бу саҥа тутууга, сэлиэнньэ тупсарын туһугар хас биирдии киһи баҕарарын туһунан дакаастыыр сорук ирдэммитэ. Балаһыанньа быһыытынан, Аан дойдутааҕы баантан 500 мөлүйүөн көрүллэн, биир тыһыынчаттан элбэх нэһилиэнньэлээх бөһүөлэктэр биирдии мөлүйүөн суумалаах икки бырайыагы туруоруохтаахтар итиэннэ 1000-тан тахса ахсааннаах киһи түмсэннэр, куоластааһыҥҥа кыттыахтаахтар.

Куоластааһын сэтинньи 14 күнүгэр Манчаары Баһылай аатынан успуорт чэбдигирдэр комплекс саалатыгар «Майа сэлиэнньэтэ» МТ дьаһалтатын өртүттэн бэрт тэрээһиннээхтик ыытылынна. Элбээбитэ 1200 кэриҥэ олохтооҕу мунньуохтаахпыт диэн кэтэһиллибитэ да, оннооҕор өссө элбэх ‒ 1422 киһи мустан сүргэбит көтөҕүлүннэ.

Ирдэбилгэ эппиэттээн мустубут дьон улахан аҥара сахалыы таҥнан-симэнэн кэлбит.

«Бачча элбэх киһи мустубутун ыһыахтартан ураты көрө илик буоларым. Үлэни-хамнаһы быһаарсыыга маннык түмсүүлээх буоларбыт хайҕабыллаах. Инникитин даҕаны олохпут ирдэбилэ буолбут улахан граннарга кыттыыбыт салҕанан бара туруохтун», ‒ диэн оройуон дьокутааттарын Сэбиэтин бэрэссэдээтэлэ Андрей Находкин кэрэхсээбитин биллэрдэ.

Кытаҕы тупсарыыга бырайыактары оҥорууга куонкурус биллэриллибитин уонна ханнык үлэлэр киирбиттэрин тустарынан «Майа сэлиэнньэтэ» МТ баһылыга Дмитрий Тихонов билиһиннэрдэ. Искибиэри тутууга олус тупсаҕай көрүҥнээх эскииһи Намнааҕы педагогическай колледж устудьуона Алина Нестерова оҥорон, бастакы миэстэни ылла. Кини баҕатынан искибиэр сынньанар ыскаамыйалардаах, фонтаннаах итиэннэ таптал бэлиэтэ сүрэх быһыылаах оһуордаах-мандардаах, тапталлаахтар хаартыскаҕа кэлэн түһэр киэргэллээх буолуохтаах. Бырайыакка иккис миэстэни ылбыт Ф.Г.Охлопков аатынан Майа орто оскуолатын үөрэнээччилэрин Майя Бурнашеваны, Рита Толстякованы уонна үһүс буолбут Вова Кулаковскайы, Айта Тарасованы бэлиэтээтилэр.

Дмитрий Иванович аан дойдутааҕы баан үбүлээһининэн быйыл өрөспүүбүлүкэҕэ биэс улуус бырайыактарын олоххо киллэрбитин билиһиннэрдэ.

Искибиэри тутууга көҕүлүүр бөлөх бэрэстэбиитэллэрэ: «Ытык сүбэ» түмсүүтүн бэрэссэдээтэлэ Анатолий Захаров, уопсастыбаннай сэбиэт бэрэссэдээтэлэ Мария Лукина уонна бөһүөлэк дьокутаата Эрчим Захаров Майа олохтоохторугар истиҥ махталларын тиэртилэр, чааһынай предприниматель Максим Забровскай бэйэтин биир идэлээхтэригэр ыҥырыы оҥорон бырайыак олоххо киирэригэр диэн 10 тыһыынча солкуобай суумалаах сэртипикээти туттарда.

Бу күн иккис бырайыак быһыытынан Майаҕа дьону таһар оптуобуска аналлаах 50 тохтобулу оҥорторууга эмиэ куоластааһын буолла. Бырайыагы көҕүлүүр бөлөх аатыттан эр дьон түмсүүтүн бэрэссэдээтэлэ Зиновий Игнатьев, «Мэҥэ-хаалык» түмсүүттэн Аграфена Яковлева махтаннылар. «Мэҥэ-профи» салайааччыта, предприниматель Прокопий Андреев тэрилтэтин аатыттан бу бырайыакка көмө быһыытынан 50 тыһыынча солкуобайдаах кылаатын киллэрдэ.

Бырайыактар олоххо киириилэригэр нэһилиэнньэ өртүттэн эмиэ утары баран хас биирдии киһи 50 солкуобайдаах көмөнү оҥоруутугар баҕа санааларын биллэрдилэр.

Маны барытын видеонан уһуллулар, хаартыскаҕа түһэрдилэр. Билигин туоһу докумуон хомуллан, куоластааһын-аахсыйаҕа Москва куоракка тириэрдиллиэ.

Норуот хамсааһынын таһаарбыт, олохтоохтор мустубут бырааһынньыктарын эҕэрдэ кэнсиэринэн М.К.Попова аатынан Майатааҕы оҕо ускуустубаҕа оскуолатын үлэһиттэрэ, иитиллээччилэрэ, «Кыталык» норуот ансаамбыла, Майатааҕы норуот хуора, Сардаана Осипова, Прокопий Федоров, Катя Ноговицына, Виталий Очиров, Ариан Пермяков, Вероника Неустроева, Майа оскуолатын оҕолоро уо.д.а. киэргэттилэр.

1
0