Абый талааннаах оҕолоро Музыка үрдүкү оскуолатыгар үөрэниигэ ыҥырыы туттулар

Абый улууһугар республикатааҕы Музыка үрдүкү оскуолатыттан исписэлиистэр кэлэн үлэлээн бардылар. Кинилэр олохтоох искусство оскуолатыгар сырыттылар, оҕолор талааннарын көрдүлэр.

Музыка үрдүкү оскуолатын сайдар концепциятын ааптара, СР правительствотын стипендиата, «Знанием победишь» диэн Михаил Николаев бириэмийэтин лауреата, культура туйгуна, норуоттар икки ардыларынааҕы музыка куурустарын преподавателэ, 36 сыл педстажтаах Евдокия Семеновна Карманова: «Бастакы президеммит Михаил Николаев идеятынан 2013 сыллаахха оҕо саадыттан, оскуолаттан саҕалаан оҕолору музыкальнай үөрэхтээһиҥҥэ «Музыка для всех» диэн бырайыак үлэтэ саҕаламмыта. Республикаҕа киэҥник биллэр СР искусстволарын үтүөлээх деятелэ, музыка үрдүкү оскуолатын историяҕа уонна теорияҕа кафедратын доцена Е.А. Татариновалыын кэлэн үлэлии сылдьабыт. Сыалбыт-сорукпут диэн учууталларга методическай көмөнү оҥоруу, практическай семинардары ыытыы, аттестация, маастар-кылаастары тэрийии. Үлэбит биир сүрүн хайысхатынан — талааннаах оҕолору сүүмэрдээн, Дьокуускайдааҕы Үрдүкү сокуолаҕа үөрэнэллэригэр рекомендация оҥоруу. Сүүмэрдээһини үс көрүҥүнэн ыытабыт. Оҕолор интонированиеҕа, ритмҥэ уонна координацияҕа таһымнаах тургутууну ааһаллар. Музыкаҕа сыһыаннара бэрэбиэркэлэнэр, ыллыыр талааннара быһаарыллар, илии-тарбах хайдах үлэлииллэрэ хонтуруолланар, доруобуйаларын туруга болҕомтоҕо ылыллар. Дьыссааттарга, оскуолаларга сылдьан аҕыс оҕо Музыка үрдүкү оскуолатыгар үөрэнэр кыахтаахтарын туһунан түмүк оҥордубут. Биллэн турар, оҕону ыытарын төрөппүт быһаарар. Билиҥҥитэ 3 төрөппүт сөбүлэҥин биэрдэ. Хомойуох иһин, суол суоҕуттан бөһүөлэгинэн эрэ муҥурданныбыт. Дьиҥэр, нэһилиэктэргэ төһөлөөх дьоҕурдаах, талааннаах оҕолор бааллара буолуой?! Биһиги барбыппыт кэннэ Айталина Алексеевна талааннары көрдөөһүҥҥэ үлэлэһиэҕэ. Музыка үрдүкү оскуолатын оҕолоро маассабай орто оскуола программатынан үөрэнэллэр, ЕГЭ-ни туттараллар. Үөрэбит, выпускниктарбыт гимназия, лицей үөрэнээччилэрин баалларыттан хаалсыбаттар, араас идэни баһылыыллар. Музыканан 11 сыл дьарыктаммыт оҕолорбут Россия ааттаах-суоллаах консерваторияларыгар, культура институттарыгар улахан ыарахаттары көрсүбэккэ киирэннэр, бастыҥ устудьуон, выпускник аатын ылаллар. Биһиэхэ үөрэнээччилэргэ булгуччу музыкант буолаҕыт диэн муос-таас этии суох. Ол да буоллар музыка хайысхатынан үлэлииллэрэ ордугун биһиги сүбэбититтэн бэйэлэрэ быһаараллар, кими да күһэйбэппит. Араас атын идэнэн үлэлии сылдьааччыларбыт музыкаҕа дьарыктанан ситиһиилээхтик, аныгылыы эттэххэ «успешнай» олохтоохпут диэн махтаналлар«.

Евдокия Карманова

Аан дойду бары муннуктарыгар Саха Республикатын визитнай карточкатынан буолбут Музыка үрдүкү оскуолатын «Виртуозы Якутии» скрипачтар ансаамбыллара баар. Ким билиэй, баҕар Индигир Эбэ хонноҕуттан Абый оройуонуттан Чайковскай саалатыгар оонньуур пианистар, Гранд-Операҕа ыллыыр артыыстар, дойдуну салайсар муударай политиктар, аатырбыт бизнесменнэр о.д.а. музыканан дьарыктанан төрөөбүт сирдэрин албан ааттатыахтара турдаҕа.