Тааттатааҕы гимназия быйылгы үөрэх дьылыгар өссө үрдүк таһымҥа тахсар былааннаах

    0
    20

    Тааттатааҕы Иван Пудович Жегусов аатын сүгэр гимназия быйылгы үөрэх дьылын саҕалаата. Оҕолор уонна педагогическай кэлэктиип сайыҥҥы сынньалаҥ кэнниттэн саҥа идеялардаах, былааннардаах үлэлээн эрэллэр.  


    Оччолордооҕута автономияны ылынан саҥа сүһүөҕэр туран эрэр Саха республикатын Үөрэҕириигэ наркома, биир дойдулаахпыт Иван Пудович Жегусов оскуолалары туттарыыга, кыаммат оҕолорго анаан интернаттары, учууталларга уопсай дьиэлэри астарыыга күүскэ ылсан үлэлэспитэ биллэр. Кини төрөөбүт Сахатын сиригэр бастакы үрдүк үөрэх кыһатын Государственнай педагогическай институту тэрийсэн, атаҕар туруорсубут киэҥ далааһыннаах, дириҥ толкуйдаах бөдөҥ салайааччы этэ. 1939 сыллааҕы репрессия кэнниттэн кини сырдык аата саҥалыы сөргүтүллэн төрөөбүт норуотугар төннүбүтэ. Ол биир үтүөкэн туоһутунан 2012 сыллаахха саҥа тэриллибит Тааттатааҕы гимназия Иван Пудович Жегусов ытык аатын сүкпүтэ, биһиги бары онон киэн туттабыт.

    Таатта гимназиятын директора Алена Гаврильевна Гуляева, бэйэтин солбуйааччыларын Оксана Мировна Слепцованы уонна Дария Иннокентьевна Тарбахованы кытары айар, иитэр коллективы ситиһиилээхтик салайаллар. Гимназия коллектива оройуоҥҥа, республикаҕа ыытыллар араас педагогическай көрүүлэргэ, методическай турнирдарга уонна учууталлар икки ардыларынааҕы күрэхтэргэ куруутун ситиһиилээхтик кытталлар. Ааспыт 2016 сылга «Россия 100 бастыҥ оскуолата» диэн Бүтүн Россиятааҕы куонкуруска «Бастыҥ гимназия» номинация кыайыылааҕын аатын ылары ситиһэннэр, оройуон олохтоохторун барыбытын үөрдүбүттэрэ.

    Гимназистар нуучча тылыгар уонна литературатыгар, саха литературатыгар, историяҕа, обществознаниеҕа уо.д.а. предметтэргэ оройуоннааҕы уонна республикатааҕы олимпиадаларга, научнай-чинчийэр ааҕыыларга, конференцияларга ситиһиилээхтик кыттаннар куруутун кэриэтэ инники күөҥҥэ сылдьаллар. Улууска английскай тылы үөрэтэр тирэх оскуола быһыытынан уонна республикаҕа улахан сэҥээриини ылар «Кэнэҕэски дипломат» күрэҕи тэрийэн ыытыыга утумнаахтык үлэлэһэллэр. Холобура, оскуола урукку выпускниктара Дьулустан Новгородов Воронеж куоракка байыаннай лүөтчүктэри бэлэмнээн таһаарар Академия 3-с курсугар, онтон Мария Слепцова Соҕуруу Кореяҕа тылбаасчыт идэтигэр Лингвистика институтун 4-с курсугар ситиһиилээхтик үөрэнэ сылдьаллара истиэххэ үчүгэй.

    Билии күнүн үөрүүлээх чааһын аһыллыытыгар гимназия директора Алена Гаврильевна иһитиннэрбитинэн, быйыл бу үөрэх кыһатын 19 оҕо ситиһиилээхтик бүтэрэн олох киэҥ суолугар үктэммиттэр. Кинилэртэн бастыҥ үөрэнээччилэр Лилиана Макарова, Михаил Гуляев уонна Святослав Репин оскуолаларын кыһыл көмүс, онтон Михаил Яковлев үрүҥ көмүс мэтээлинэн бүтэрэри ситиһэннэр, төрөппүттэрин улаханнык үөрдүбүттэр. Оскуола выпускниктара бары кэриэтэ араас үөрэх кыһаларыгар үөрэнэ киирэри ситиспиттэр, онтон икки уол Константин Софронов уонна Владислав Попов Ийэ дойдуларыгар ытык иэстэрин төлүү сулууспаҕа барары талбыттар. Оскуола киэн туттар выпускниктара Дьулустаан Павлов Россия биир саамай бастыҥ үөрэҕин кыһатыгар Бауман аатынан техническэй университекка, Петя Бондарев Курскай к. университетыгар, Лилиана Макарова, Михаил Гуляев, Михаил Яковлев уонна Павел Арылахов ХИФУ-га, онтон Святослав Репин Тыа хаһаайыстыбатын Академиятыгар үөрэхтэрин саҕалаатылар.

    Оройуоммут биир бастыҥ үлэлээх үөрэҕин кыһатын ситиһиилээх коллективын Билии күнүнэн эҕэрдэлии кэлбит улуус баһылыга Михаил Соров балаҕан ыйын бастакы күнэ ураты уйулҕалаах бырааһынньык, сырдык олоҕу түстүүр, умнуллубат түгэн буоларын бэлиэтээтэ. «Үөрүү, саҥа кыайыыларга эрэмньи, сыралаах үлэҕэ бэлэмнэнии уонна истиҥ доҕордоһуу — бу барыта биир күҥҥэ холбоһор. Хас биирдиибит олохпут тухары үөрэппит учууталларбытын махталынан саныыбыт, бииргэ үөрэммит доҕотторбутун кытта куруутун бииргэ буолабыт, оҕо саас көмүс күннэрин ахта-саныы сылдьабыт. Билиҥҥи кэмҥэ ким баҕалаах, тулуурдаах уонна үрдүккэ тардыһар дьулуурдаах ордук үүнэн-сайдан иһэр, ону кытаатан өйдөөҥ», — диэн бэйэтин тус баҕа санаатын эттэ.

    Салгыы бүтүн Россия таһымыгар биллибит айымньылаах үлэлээх дьоҕус коллективка уонна оройуон, республика таһымыгар куруутун ситиһиилээхтик кыттар бары үөрэнээччилэргэ оройуон салалтатын аатыттан улахан махталын тириэрдэн туран бастыҥ үлэлээх учууталларга Г.И. Федороваҕа, Н. Н. Сивцевка, Т.В. Собакинаҕа уонна М.К. Платоноваҕа улуус дьаһалтатын Бочуотунай грамоталарын туттартаата. Түмүгэр, бары үөрэнээччилэргэ уонна учууталларга салгыы өссө үрдүк кирбиилэри ылан, үөһээ дабайан иһэллэригэр баҕарда.

    Ветераннар ааттарыттан тылы ылбыт, Тааттыныскай нэһилиэк Бочуоттаах олохтооҕо, үлэ ветерана Мария Егоровна Бондарева үөрэнээччилэргэ, учууталларга туһаайан Билии күнүнэн бэйэтин истиҥ эҕэрдэтин тириэртэ, оскуола уонна оҕолор ситиһиилэриттэн төрөппүттэр үөрэллэрин, астыналларын этэн туран, салгыы өссө үрдүк үрдэллэри ылалларыгар баҕарда.

    Оскуола талааннаах оҕолорун истиҥ эҕэрдэлэрин, сайыҥҥы ыытыллыбыт үлэлэри сэргээн иһиттибит, оскуола тэрийэн ыытар араас суол үлэтин-хамнаһын туһунан слайдалары көрдүбүт.

    Быйылгы үөрэх дьылыгар ыҥырар алтан чуорааны оскуола президенэ, бастыҥ үөрэнээччи, общественник Никита Григорьев уонна 5-с кылаас үөрэнээччитэ Ванесса Васильева лыҥкыначчы тыаһатан кылаастарга ыҥырдылар.