Таатта иистэнньэҥнэрэ үтүлүк тигиитигэр маастар-кылаастары ыыталлар

    0
    28

    Таатта улууһун киинигэр Ытык Күөлгэ 12 иистэнньэҥ муһунна. Игидэйтэн уонна Чымынаайыттан кыргыттар бааллар. Үтүлүк эгэлгэтин быыстапката ыытылынна. Чөркөөх музейын фондуттан, биирдиилээн дьонтон да кэлбит араас кэмнээҕи үтүлүктэр бааллар. Үтүлүк тигиитигэр маастар кылаастартан киһи көрөрө, үөрэнэрэ элбэх, араас ньымаларынан тигэллэр.


    Таатта улууһун иистэнньэҥнэрэ матырыйаалларын бэйэлэрэ илдьэ сылдьаллар. Маастар-кылаастар олунньу 20-21 күннэрин устата ыытылыннылар. Кинилэр ортолоругар өрөспүүбүлүкэ, Таатта улууһун норуотун маастардара бааллар.

    2017 сыл муус устар ортотугар Дьохсоҥҥо «Таатта саарыта, Дьохсоҕон тирэҥсэтэ» диэн маастар-кылаастар ыытыллыбыттара. Онно 15 маастар кыттыбыта. Бу дьаһаллар уратылара диэн икки толору үлэ күнүн устатыгар ыытыллаллар. Чымынаайы орто оскуолатын учуутала, иистэнньэҥ, СӨ норуотун маастара, технология учуутала Арина Николаевна Большакова 7-с кылаас үөрэнээччитин Валя Винокурованы уонна Игидэйтэн Таатта улууһун норуотун маастара, эбии үөрэхтээһин педагога Варвара Гаврильевна Матаннанова 6-с кылаас үөрэнээччитин Лада Матаннанованы салайан иистэннэрдилэр. Кыргыттар кыраларыттан иистэнэргэ үөрэммиттэр.

    Харбалаахтан кэлбит иистэнньэҥ, Таатта улууһун норуотун маастара Анна Викторовна Афанасьева бүгүҥҥү иискэ барыларыттан аҕа саастахтара. Кини бу быыстапкаҕа үтүлүктэри кытта 150-ча сылы быһа кичэллээхтик хараллан сытар күндү түүлээҕинэн истээх соннору аҕалан туруорар. Бу соннор кини ийэтинэн, аҕатынан өбүгэлэриттэн оччоттон-баччаҕа диэри тиийэн кэлбит күндү таҥастар буолаллар.
    Өбүгэ үгэһинэн иистэниигэ маастар-кылаастары салайыыга бырайыак ааптара, бэһис сылын үлэлиир Изабелла Иннокентьевна Элякова бу кэскиллээх тэрээһини иилээн-саҕалаан ыытар.

    Быйылгы маастар-кылаастарга үлэлэри сыаналыырга дьүүллүүр сүбэни Изабелла Иннокентьевнаны кытта Таатта улууһун норуотун маастара Марфа Афанасьевна Сидорова, о.д.а. үлэлээтилэр. Кэрэхсэбиллээх тэрээһини культураҕа уонна духуобунаска сайдыы улуустааҕы салалтатын начальнига Афанасий Петрович Лопатин уонна салалта исписэлиистэрэ тэҥҥэ сылдьан көрдүлэр, үлэлэстилэр.