Тааттаҕа биллэриллибит чэгиэн-чэбдик буолуу, спорт уонна физкультура сылын олохтоохтор өйүүллэр

    0
    27

    Быйылгы сыл спортивнай күрэхтэһиилэринэн баай: Соҕуруу Корея Пхенчхань куоратыгар ыытылла турар XXIII-с Кыһыҥҥы Олимпиада, Саха сирин VII-с спортивнай оонньуулара, улууска физкультура уонна спорт тэриллибитэ 75 сылынан 20 көрүҥҥэ комплекснай спартакиада уо.д.а. Онтон Таатта улууһугар 2018 сылы физкультура, спорт уонна чэгиэн олох сылынан биллэриллибитэ, нэһилиэктэргэ сэргэхсийиини таһаарда. 


    Баайаҕа нэһилиэгэр үгэс буолбут Ытык-Күөл, Дьокуускай, олохтоох баайаҕалар спортивнай табаарыстыы көрсүһүүлэрэ олунньу 24 күнүгэр ыытылынна. Волейболга, теннискэ, саахымакка, бильярдка, канат тардыһыытыгар күрэхтэстилэр. Дьокуускай хамаандатын «Баайаҕа» түмсүү салайааччылара Иннокентий Луковцев, Валентина Андросова, Ытык-Күөл хамаандатын салайааччылар Светлана Игнатьева, Семен Андросов салайан аҕалбыттар. Олохтоох хамаандалар капитаннара Роман Тимофеев, Дмитрий Неустроев дьоннорун-сэргэлэрин түмэн бэлэмнээбиттэр.

    Спорду, маассабай физкультураны сэҥээрээччилэргэ, спортсменнарга, ыччаттарга, олохтоохторго биир күн элбэх эниэргийэни, умнуллубат түгэннэри бэлэхтээн ааста. Табаарыстыы көрсүһүү истиҥник, иһирэхтик, түмсүүлээхтик, өрө күүрүүлээхтик ааста. Дьиэ-уот түбүгүн хаалларан, айан ырааҕын аахсыбакка, дойдубут туһа диэн кэлэн, кыттан бардылар. Улахан тэрилтэ салайааччыта Иннокентий Михайлович Андросов эдэрдии эрчимнээхтик теннистии, салайа-дьаһайа, көҕүлүү, үйэтитэ сылдьарыттан биир дойдулаахтара астынабыт эрэ. Энтузиаст спортсменнар Валентина Гаврильевна Винокурова Уус Алдантан, Роберт Романович Романов Мэҥэ Хаҥаластан кэлэн кыттыбыттара киһини эрэ үөрдэр. Улууспут салайааччылара, биир дойдулаахтарбыт Изабелла Александровна Сивцева, Ариан Георгиевич Потапов, нэһилиэкпит баһылыктара Роман Романович Романов, Анна Николаевна Николаева тэҥҥэ күрэхтэһэ, сүүрэ-көтө сылдьаллара астык.

    «Баайаҕа» түмсүү салайааччыта Иннокентий Луковцев ситим нөҥүө биир дойдулаахтарыгар махталын тиэрдэр: «Бар-дьонум барахсаттар! Дойдубутугар бэртээхэй тэрээһиҥҥэ кыттан, үөрэн-көтөн, сынньанан кэллибит. Өрүү бу курдук биир санаанан салайтаран, иннибит диэки эрэллээхтик айанныаҕыҥ! Мантан саас Тааттабыт нэһилиэктэрин спортивнай күрэхтэһиилэрэ куоракка ыытыллар, онно дойдубут аатын ааттатар курдук бэлэмнэнэн кыттар санаалаахпыт».

    Түөрт хамаанда эрийсиилээх күрэхтэһии кэнниттэн миэстэлэрин маннык үллэһиннилэр: I миэстэ – «Баайаҕа-1», II миэстэ – Ытык Күөл, III миэстэ – Дьокуускай, IV миэстэ – «Баайаҕа-2».

    Күрэхтэһии бары тэрээһинин ыччат түмсүүтэ (сал. Афанасий Никитин) сатабыллаахтык тэрийбит. Итии, минньигэс астаах буфеты үлэлэттэ, Аҕа дойдуну көмүскээччилэр күннэригэр аналлаах «Ыччат лотереятын» үрдүк таһымҥа ыытта. Лотереяҕа эппиэттээх ыччаттар Марина Софронова, Дмитрий Апросимов, ыччат сүбэтэ спонсордары кытта күүскэ үлэлээбитэ көстөр. Эдэр сылгыһыттар Мандаров Сергей Семенович, Иванов Дмитрий Семенович убаһа, фермер Слепцов Игнатий Иннокентьевич ньирэй, Винокуров Андрей Егорович сварочнай аппараат, Баайаҕа уустара батыйа, саха быһаҕа уо.д.а. урбаанньыттар спонсордаабыттар. Ыччаттар бэйэлэрэ эппиттэрин курдук, олоххо-дьаһахха, үлэҕэ-хамнаска куруутун инники буолуоҕуҥ, чөл, чэгиэн олоҕу тутуһуоҕуҥ, түмсүөҕүҥ, үлэлиэҕиҥ диэн эппиттэриттэн бары үөрдүбүт, астынныбыт.