Биир дойдулаахпыт, саха норуодунай бэйиэтэ Леонид Попов төрөөбүтэ 100 сылын көрсө араас тэрээһиннэр Сунтаар улууһугар ыытыллаллар. Улуустааҕы култуура управлениетын начаалынньыга Мария Кобельянова «Сунтаар миигин ыҥырар» литературнай пикник эһиил Бүлүү бөлөх улуустарыгар, бэйиэт 100 сыллаах үбүлүөйүгэр, өрөспүүбүлүкэ таһымыгар ыытыллыахтааҕын эттэ.
Күһүн Тойбохойго «Сунтаар миигин ыҥырар» диэн литературнай пикник буолбута. Манна кыттыбыт бастыҥ нүөмэрдээхтэр, улууспут айар куттаах дьоно кыттыылаах «Хоһооммунан олорбутум, хоһооммунан дьолломмутум» диэн ырыа-хоһоон түһүлгэтэ «Партизан» култуура киинигэр буолла.
Манна Леонид Андреевич ырыа буолбут хоһооннорун улуус биллэр ырыаһыттара, мэлэдьиистэрэ, «Өрөгөй», «Партизан» КК иһинэн тэриллибит саҥа ансаамбыллар толордулар. Бэйиэт хоһооннорун эдэрдиин-эмэнниин олус бэркэ, оруолларыгар киирэн туран аахпыттарын, көрөөччүлэр биһирээтилэр.
Сунтаардааҕы гуманитарнай гимназия уолаттара, Уһун Күөлтэн «Далбар» бөлөх, «Сомоҕо» түөлбэ «Сунтаар миигин ыҥырар» диэн хоһоону түөрт араас тылынан ааҕан, Элгээйиттэн бибилэтиэкэр Татьяна Семенова дьон махталын ыллылар.
Леонид Попов үөрэммит Тойбохой оскуолатын муусукаҕа учуутала, үгүс сылга кини хоһоонноругар суруллубут ырыалары оҕолорго үөрэппит Клара Тихонова бэйиэт ырыа буолбут хоһоонноругар ырыанньык таһааттарарга этии киллэрбитин дьон сэргии иһиттэ, биһирээтэ.
Инникитин норуодунай бэйиэппит 100 сыллаах үбүлүөйүн көрсө өссө даҕаны араас, сэргэх тэрээһиннэр ыытыллыахтара.
Сообщить об опечатке
Текст, который будет отправлен нашим редакторам: