Сунтаар улууһугар кырачааннарыгар «Robokids-Suntar» бэстибээл ыытылынна

    0
    16

    Аныгы сайдыылаах үйэҕэ «Le­go», «робот», «робототех­ника» диэн тыллар күннээҕи олохпутугар үгүстүк туттуллар буоллулар. Билигин бу уустук дьарыгынан, оскуола үөрэ­нээч­чилэрэ эрэ буолбакка, оҕо саадын иитиллээччилэрэ кытары дьарыкта­наллар. Быйылгы улуустааҕы «Robo­kids-Suntar» робототехника бэс­­ти­бээлэ 16 оҕо саадыттан оскуолаҕа киириэн иннинээҕи саастаах 66 оҕону түмтэ.


    Үһүс төгүлүн ыытыллар күрэс сыл­тан сыл аайы кыттааччытын ахсаана элбээн, тэрээһин таһыма үрдээн иһэрин бэлиэ­тиэххэ наада.

    Бэстибээл Сунтаар нэһилиэ­гин 11 №-дээх «Кыталык» оҕо саадыгар ыытылынна. Улуустааҕы үөрэх управлениетын начаалынньыга Гаврил Еремеев, оскуола инни­нээҕи үөрэхтээһин салаатын сала­йааччыта Антонина Савви­нова, «Кыталык» оҕо саадын сэбиэ­диссэйэ Валентина Пет­рова тыл эттилэр. Кыттааччы оҕолору «Кыталык» оҕо саадын иитил­лээччилэрэ, иитээччилэрэ ырыаларынан, үҥкүүлэринэн сэргэхситтилэр.

    Манна оҕолор робототехника миссиятыгар, робофутболга, робототехниканы айылҕа харыс­табылыгар туһанарга бырайыак көмүскээһиҥҥэ күрэстэстилэр. Дьүүллүүр сүбэҕэ улуустааҕы үөрэх управлениетын оскуола иннинээҕи үөрэхтээһин салаатын салайааччыта Антонина Савви­нова, сүрүн исписэлиис Туйаара Васильева, исписэлиис Ольга Саввинова, айылҕа харыстабылын управлениетын исписэлииһэ Марина Корякина, «Кыталык» оҕо саадын иитээччитэ Светлана Алексеева, СПТЛ-И «Ай-Сатаа» технопааркатын педагога Стани­слав Тихонов үлэлээтилэр. «Сan­dy-bar», тэрээһиҥҥэ сыһыаннаах фотозона бааллара оҕолорго үчүгэй настарыанньа, үтүө өйдөбүл хаалларбыттара саарбаҕа суох.

    Оскуола иннинээҕи саастаах оҕолорго аналлаах робототехника миссиятыгар оҕолор роботы сала­­йан, куубуктары сыҕарытан ариф­метическай садаачалары суоттуул­лар. Кыттааччыттан уонна дьүүл­лүүр сүбэттэн ураты хоско ким да киириэ суохтаах. Манна быйыл тэри­йээччилэр саҥаны киллэрэн, салайааччылар, кыт­тааччылар мис­сияны көрөллөрүн курдук быһа эпииргэ көрдөр­бүттэрэ олус табы­гастаах буол­бут. Бу күрэскэ I миэстэни Мичил Сидоров («Кы­талык», Сунтаар), II миэстэни Ар­чын Иванов («Кыта­лык»,), III миэс­тэни Ньургун Григорьев («Че­бурашка», Сунтаар) ыллылар.

    Робофутболга оҕо саадтара үстүү кыттааччылаах хамаанда туруордулар. Хамаандаҕа биир көмүскээччи, икки кимэн киирээччи бааллар. Роботы сала­йан пинг-понг мээчигин утарсаач­чыларын боруотатыгар киллэ­риэх­тээхтэр, оонньуу үс мүнүүтэ барар. Бу көрүҥҥэ «Ньургуһун» (Сунтаар) оҕо саадын хамаандата кыайыы­лааҕынан таҕыста. II миэстэҕэ «Кыталык» бастакы ха­маандата, III миэс­тэҕэ «Березка» (Сунтаар) хамаандата тигис­тилэр.

    Айар бы­ра­йыак­ка оҕолор робото­техника кө­мө­түнэн айылҕа ха­рыста­былыгар сыһыаннаах араас быра­йыак­тары оҥорбут­тарын көмүскээ­тилэр. Дьүүллүүр сүбэ үлэ­тин түмү­гү­нэн «Ньургуһун» оҕо саадын иитил­лээч­читэ Эдвард Нико­лаев I миэс­тэни ылла. Вова Проко­пьев («Кыта­лык») II, Сара Забо­лоцкая уонна Уйгу­лаана Иванова («Бе­рез­ка») III миэстэ буоллулар.

    Бэстибээл түмү­гүнэн Үөһээ Бүлүүгэ буо­луохтаах регио­наль­най бэстибээлгэ барар путев­каны Илья Николаев («Тул­лук­чаан», Сунтаар), Марик Хастыров («Чебурашка»), Илья Иванов («Сэргэ», Түбэй Дьаар­хан) уонна Дима Кириллин («Елочка», Элгээйи) туттулар. Үөрэх управле­ниетын анал бирииһин Түбэй Дьаар­хантан сылдьар Илья Иванов ылла.