Үрүҥ Хайаҕа чулуу табаһыт Дмитрий Туприны чиэстээһин ыччакка туһаайылынна

Саха Өрөспүүбүлүкэтин уонна Анаабыр улууһун бочуоттаах олохтооҕун, Ленин уонна «Үлэ Албан аат» орден кавалерын, СӨ тыатын хаһаайыстыбатын үтүөлээх ветеранын Д.К. Туприн төрөөбүт күнүн Үрүҥ Хайаҕа сэтинньи 21 күнүгэр бэлиэтээтилэр.

Чулуу табаһыт Дмитрий Константинович 80 сааһын туолбут үбүлүөйдээх  тэрээһинин киэҥник уонна ыччакка холобур оҥорордуу ыыттылар.

Саҥа бөһүөлэк түөлбэтигэр Д.К. Туприн аатынан уулуссаны үөрүүлээхтик арыйыы буолла. Тэрээһиҥҥэ улуус баһылыга Иван Семёнов, тыа хаһаайыстыбатын управлениетын начальнига Ариан Неустроев, И.К.Спиридонов аатынан МУП директора Дмитрий Соловьев, бииргэ алтыспыт үөлээннээхтэрэ, оҕолоро, аймах-билэ дьоно уонна нэһилиэк олохтоохторо бүтүннүү сырыттылар.

Аҕыйах ахсааннаах норуоттар өбүгэ саҕаттан илдьэ кэлбит дьарыктарын түөлбэлээн олорор сирдэригэр тэнитиигэ Дмитрий Константинович курдук табаһыттар кылааттара сүҥкэн. Маннык үөрүүлээх күҥҥэ, төрүт дьарыгы көлүөнэттэн-көлүөнэҕэ тириэрдиигэ анаммыт дьаһалга улуус баһылыга эдэр табаһыттары көҕүлүүр сыалтан, сэттэ бурааны туттарда.

Анаабыр өрүскэ табанан сүүрдүү ыытылынна. Манна 1 миэстэни В.Т. Туприн биригэдьиирдээх бастакы ыстаада ылан, бураан бириис тутта.

Үбүлүөйдээх тэрээһин өрөгөйдөөх чааһыгар ветеран табаһыттарга өйдөбүнньүк бэлэхтэри туттардылар уонна Д.К.Туприн туһунан «Табаһыт уола Миитэрэй Хааччыт» диэн кинигэ сүрэхтэниитэ буолла.