Орто Халымаҕа ууга ылларбыт нэһилиэктэргэ тутуу матырыйаалын тиэрдии саҕаланна

    0
    14

    Халаан уутуттан эмсэҕэлээбиттэргэ көмөлөһөр сыаллаах Ил Дархан соруктарын толорууга туһуламмыт төрдүс мунньах Орто Халымаҕа атырдьах ыйын 31 күнүгэр буолла. Бу күн мунньахха “Сааскы халаан уутун содулларын туоратыыга уонна чөлүгэр түһэрии үлэлэрин толорор Дирекция” ГКУ бэрэстэбиитэллэрэ Виталий Петров уонна Арнольд Фалеев кыттыыны ыллылар.


    Мунньаҕы улуус баһылыгын бастакы солбуйааччыта Руслан Гаврильев салайан ыытта.

    Атырдьах ыйын 27 күнүгэр Орто Халыма куорат кытылыгар Дьокуускайтан тутуу матырыйаалын тиэммит суудуна тиксибитэ. Манна ууга ылларбыт Берёзовка, Сыбаатай уонна Арҕахтаах бөһүөлэктэргэ баар социальнай объектары, Берёзовка олохтоохторугар чааһынай дьиэлэрин чөлүгэр түһэриигэ туһуламмыт 464,1 тонна матырыйаал кэлбитэ. Тутатына таһаҕаһы авиапорт былаһааккатыгар тиэйии саҕаламмыта.

    Атырдьах ыйын 29 күнүгэр киэһэ “АЛРОСА” АХ МИ-26 бөртөлүөтэ кэлэн түспүтэ. Нөҥүө күн бастакы рейс Берёзовкаҕа матырыйаалы тиэйиини саҕалаабыта. Бу туһунан сиһилии Дирекция кылаабынай инженерэ Виталий Петров маннык кэпсээтэ:

    Атырдьах ыйын 30 күнүттэн Берёзовка нэһилиэгэр таһаҕаһы тиэрдии саҕаланна. Бастакы күн тутуу матырыйаалын кытта “Якутоптторг” нөҥүө бородуукта тиэрдилиннэ. Биир рейсэҕэ 16 тонна матырыйаал барар. Барыта этэҥҥэ буоллаҕына, күҥҥэ үстүү рейси оҥорор соруктаахпыт. Бу нэһилиэккэ социальнай объектарга, ОДьКХ-ҕа уонна чааһынай дьоҥҥо тутуу матырыйаала тиэрдиллэр.
    Оттон Сыбаатай уонна Арҕахтаах бөһүөлэктэргэ балыыһа өрөмүөнүгэр тутуу матырыйаала, уматык тиэрдиллиэхтээх. Бүгүн-сарсын бу икки нэһилиэк дьонугар дьиэлэрин өрөмүөнүгэр диэн 50-нуу тыһыынчаны түһэрии боппуруоһа быһаарыллыаҕа. Онон кэлэр нэдиэлэттэн харчы хамсааһына саҕаланыаҕа. Ол курдук Сыбаатайга 37 дьиэ хаһаайыныгар, Арҕахтаахха 41 дьиэҕэ, маны таһынан Ил Дархан соруктарыгар киирбэтэллэр да, Налимскай бөһүөлэктэн 12 чааһынай дьиэлээхтэргэ эмиэ 50 тыһыынчалаах көмө харчы түһүөҕэ диэн быһаарыы ылыммыппыт. Онон Орто Халыма улууһугар — 90 уонна Абый улууһугар 17 дьиэҕэ холбоон, бюджеттан 3,5 мөл. солк. үп туһаныллыаҕа.

    Бу курдук сэтинньи ыйга диэри туох баар чөлүгэр түһэрии үлэлэр түмүктэниэхтээхтэр.
    Улуус баһылыгын бастакы солбуйааччы Руслан Гаврильев:

    Ил Дархан соругун 11.2 пуунугар олоҕуран, Арҕахтаахха, Сыбаатайга уонна Берёзовкаҕа А-92 маркалаах таараламмыт уматык бөртөлүөтүнэн тиэрдиллиэҕэ. Олохтоох дьаһалталартан “Сахатранснефтегазсбыт” тэрилтэҕэ сайаапкалар түһэриллибиттэрэ. Наадалаах уматык Орто Халыматааҕы Нефтебазаҕа баар. Онон туох да хаарчах суох.

    Сибирскэй язванан сүһүрбүт сүөһүлэр өлүктэрин сирдэриттэн ылыллыбыт анализтар Дьокуускайга барбыттар, уонча хонугунан түмүктэрэ биллиэхтээҕин “Роспотребнадзор” бэрэстэбиитэлэ Наталья Макарова иһитиннэрдэ. Арҕахтаахтан ылыллыбыт Алаһыай уутун боруобатыгар киһи доруобуйатыгар кутталлаах эттиктэр суохтара чуолкайдаммыт.

    Тыа хаһаайыстыбатын салаатыгар туһуламмыт 7.1 пууҥҥа олоҕуран, улуус үрдүнэн 6 мобильнай биригээдэ тэриллибитэ. Эрдэ кэпсэтиллибит 4 мөл. 640 тыһ. солк. оннугар 5 мөл. 23 тыһ. үбү көрүү ситиһиллибит. Эбии аһылыгы тиэрдии быһаарыллыбыт. Балаҕан ыйын 7 күнүттэн “Магдебург” теплоходка Дьокуускайга таһаҕаһы куруустааһын саөаланыахтааһын туһунан управление начаалынньыга Егор Константинов иһитиннэрдэ. Онон бу боппуруос туолбутунан ааҕыллар.

    Дирекцияттан Арнольд Фалеев бу курдук быһааран эттэ:
    Үс нэһилиэк олохтоохторугар көрүллүөхтээх 50-нуу тыһыынча харчы тус сыаллаах көмө быһыытынан өйдөнүллүөхтээх. Ол эбэтэр тустаах көмө кырдьыктыы дьиэ өрөмүөнүгэр туһаныллыахтаах. Маны хонтуруоллуурга олохтоох депутаттар, уопсастыбаннай холбоһуктар ылсыахтарын сөп. Хаһаайыттар көмө харчыны туһааннаах сыалга сөптөөхтүк туһаныахтара диэн эрэнэбит.

    Үөрэх управлениетын анчаалынньыга Александр Третьяков Берёзовка нэһилиэгэр бастакы уочарат “Энкэчээн” оҕо саадыттан өрөмүөнү саҕалыырга көрдөстө. Үөрэх хаамыыта тохтоон туран хаалбатын инниттэн, алтынньы 1 күнүгэр диэри тиэллибит матырыйаалынан оҕо тэрилтэтин өрөмүөнэ түмүктэнэрэ ордук буолуоҕун этиннэ.