Нам улууһугар хаарбах дьиэттэн дьону көһөрүү бырагыраама бастакы түһүмэҕэ түмүктэннэ

    0
    22

    «Хаарбах туруктаах дьиэттэн дьону көһөрүү» бырагырааманан Нам улууһун Ленскэй нэһилиэгэр хаһаайыттарга дьиэ күлүүстэрин туттартаатылар. Элбэх кыбартыыралаах үс дьиэ үлэҕэ киирдэ.


    Федеральнай тус сыаллаах бырагыраама бастакы түһүмэҕэ 2013 сылтан саҕалаан, бу сыл ахсынньы 1 күнүгэр түмүктэниэхтээх. Дьаһал чэрчитинэн 1 Хомустаах, Үөдэй, Ленскэй нэһилиэктэр олохтоохторо хас да хаарбах туруктаах, эргэ дьиэттэн саҥа таас, толору хааччыллыылаах дьиэлэргэ көстүлэр.

    Бу күннэргэ Вадим Кутуков салайааччылаах «Намстрой» СМУ ХЭТ Чернышевскай аатынан уулуссаҕа 43 кыбартыыралаах 3 мэндиэмэннээх дьиэни тутан бүтэрдэ. Маны таһынан, Ойуунускай аатынан уулуссаҕа Николай Шишигин дириэктэрдээх «Авангард» ТПК ХЭТ икки 15 уонна 17 кыбартыыралаах дьиэни тутан үлэҕэ киллэрдэ.

    Онон хаһаайыттарга күлүүһү туттарыы үөрүүлээх күнэ буолан ааста. Саҥа дьиэҕэ киирэргэ аал уоту оттон алгысчыт Петр Охлопков үрдүк айыыларга сүгүрүйэн алгыс сиэрин-туомун оҥордо. Тэрээһиҥҥэ улуус баһылыгын тутууга уонна олох-дьаһах коммунальнай хаһаайыстыбатыгар солбуйааччы Степан Матвеев, «Ленскэй нэһилиэк» МТ баһылыга Андрей Новгородов, дьиэни туппут тэрилтэ дириэктэрдэрэ кыттыыны ыллылар, тутуу бүппүтүн кэрэһэлиир аалай кыһыл лиэнтэни быстылар.