Нам улууһугар бэйдиэ сылдьар, дьэллик ыттары аҕыйатар үлэ күүһүрэр

    0
    28

    Нам улууһун киинигэр 8 саастаах кыыһы сэтинньи 17 күнүгэр ыттар ытыран, улахан араллаан таҕыста. Манна сэлистиэтийэ уорганнара процессуальнай бэрэбиэркэ ыытан, ыттар хаһаайыннаахтара быһаарыллан, РФ Холуобунай кодексатын 118-с ыст. 1 чааһынан, ол эбэтэр, сэрэҕэ суохтан киһи доруобуйатыгар ыарахан эмсэҕэлээһини оҥоруу бэлиэтэ баарынан, холуобунай дьыала тэриллибит. Силиэстийэ салгыы барар, прокуратура бу дьыаланы хонтуруолга тутар.


    Кыыс оскуолаттан киэһэ 17.00 чаас саҕана дьиэлээн истэҕинэ, Колхознай уулуссаҕа хаһаайыттардаах эрээри баайыллыбакка сылдьар ыттар саба түспүттэр. Төбөтүн, сирэйин, илиилэрин ытыттарбыт кыыһы тэлгэһэтиттэн убайа булбут. Кыыс таһырдьа өр сылдьыбыт буолан, эбии илиилэрэ үлүйбүт.

    Оҕо билигин Дьокуускай куорат балыыһатын ожоговай отделениетыгар ыарахан туруктаах сытар. Кыыс төрөппүттэрин кытта улуус баһылыгын бастакы солбуйааччы Инна Сивцева, сокуоннай саастарын ситэ илик оҕолор дьыалаларын көрөр уонна бырааптарын көмүскүүр хамыыһыйа кылаабынай исписэлииһэ Анна Кутукова, үөрэх управлениета, Дьиэ кэргэҥҥэ уонна ыччакка социальнай-психологическай өйөбүл киин Намнааҕы филиала үлэлэһэр, оҕо доруобуйатын Намнааҕы киин балыыһа хонтуруоллаһар.

    Дьэллик ыттары көрүүнэн-харайыынан олохтоох бэйэни салайыныы боломуочуйата буолан, «Ленскэй нэһилиэк» МТ дьаһалтата “Улук” тэрилтэ салайааччытын В.В. Кириллини кытта үс сыллаах контракт түһэрсэн, дьэллик ыттары тутар пуун үлэлиир. Кыыһы ытырбыт ыттар билигин манна хаайыллан тураллар.

    Сэтинньи 18 күнүгэр «Нам улууһа» МТ  тыа хаһаайыстыбатыгар уонна предпринимательствоҕа баһылыгы солбуйааччы Ефим Гоголев Ленскэй нэһилиэк баһылыгын, солбуйааччытын, «Улук» дьэллик ыттары тутар пуун салайааччытын, ветеринария салалтатын, тыа хаһаайыстыбатын управлениетын кытта мунньах тэрийдэ. Манна дьэллик ыттары тутар үлэни, нэһилиэнньэҕэ ыты, куосканы иитэргэ профилактическай үлэни, регистрациялааһыҥҥа өйдөтүү үлэтин ыытары күүһүрдүөххэ диэн сорук турда.

    Маны таһынан улуус нэһилиэктэрин баһылыктарын планеркатыгар биир боппуруоһунан дьэллик ыттары аҕыйатыы тула кэпсэттилэр. Планеркаҕа СӨ ветеринария Департаменын салайааччытын солбуйааччы Саргылана Павлова, СӨ ветеринария Департаменын ветеринарнай үлэни тэрийэр отдел салайааччыта Сидор Саргыдаев уонна СӨ ветеринария Департаменын үпкэ отделын салайааччыта Александра Черепанова, Намнааҕы ветеринария салалтата кыттыыны ыллылар.

    Билиҥҥи туругунан, тоҕус нэһилиэккэ ыт тутар пуун баар диэн бэлиэтэнэр. Онтон Ленскэй нэһилиэк уонна Хатыҥ Арыы нэһилиэктэрэ ситэтэ суох да буоллар үлэлииллэр. Сыл бүтүөр диэри 1 Хомустаах, Партизан, Хамаҕатта, Бөтүҥ, Модут, Көбөкөн, Хатырык нэһилиэктэрэ бу пууннарын тиһэҕэр тириэрдэн үлэлэтэллэригэр, нэһилиэк олохтоохторугар куттал суоһаабатын инниттэн бэйдиэ сылдьар ыттар ахсааннарын аҕыйатарга, отчуоттарын хонтуруоллуулларыгар сорудахтаннылар. Бэйдиэ көрүүтэ-истиитэ суох сылдьар ыттары бу пууннар эрэ тутар бырааптаахтар.

    Нам улууһугар билиҥҥи туругунан, 1962 ыт баара учуоттаммыт, бары эмтиир сэрэтэр быһыылары ылбыттар. Онтон Ленскэй нэһилиэккэ 369 ыт регистрациялаах. Ити эрээри бэйдиэ сылдьар, хаhаайыттара кыhаммат ыт, куоска ахсаана күн-түүн эбиллэн иһэрэ хомолтолоох. Ыт уулуссаҕа дьоҥҥо кутталы үөскэтэрэ хаhаайыттар иитэ ылар кыылларыгар эппиэтинэhэ суох сыhыаннаhыыларыттан, нэhилиэнньэ ыты, куосканы иитии культуратын, быраабылаларын тутуспата буолар. Ыты, куосканы оҕону сааратарга, быстах кэмҥэ иитэн баран кэнники быраҕан кэбиhэллэрэ, бэйдиэ сылдьар кыыллар ахсааннарын хаҥаталлар, киһи доруобуйатыгар, сүөhүгэ кутталы үксэтэллэр.

    Түмүктээн эттэххэ, аҥардас биир сулууспа күүhүнэн бэйдиэ сылдьар ыты, куосканы бэрээдэктиир, аҕыйатар үлэлэр кыаллыбаттар. Бу боппуруоска ыты, куосканы иитэр дьон эппиэтинэhи өйдөөн, бары ирдэнэр быраабылалары толорон дьоҥҥо, оҕолорбутугар куттал суоһаабатын туһугар нэhилиэнньэ өттүттэн өйөбүл, көмө баар буолара ирдэнэр.