Муома улууһун Хонуу бөһүөлэгин оҕолоро саҥа тутуллубут оскуолаҕа үөрэниэхтэрэ

    0
    39

    Бүгүн, алтынньы 9 күнүгэр, Муома оройуонугар үөрүүлээх күн тосхойдо. Оройуоммут историятыгар улахан суолталаах күн үүннэ. Хонуу бөһүөлэгэр күүтүүлээх 320 миэстэлээх саҥа оскуола аанын тэлэччи арыйда.


    Бу оскуола бастакы сыбаайата 2014 сыллаахха түспүтэ. Оскуоланы А.М. Ханин салайааччылаах «Монтажник» ПК тутта. Оскуола икки этээстээх, иэнэ – 1194 кв. м. Манна оҕолор кичэйэн үөрэнэллэригэр, учууталлар таһаарыылаахтык үлэлииллэригэр бары усулуобуйа тэриллибит. Хас биирдии кылаас интерактивнай дуоскалаах, сабыс-саҥа миэбэллээх. Библиотека, остолобуой аныгы технологиянан толору хааччыллыылаахтар. Киэҥ-куоҥ актовай саалалаах, спортсаалалаах. Оскуола көрүдүөрүн сахалыы матыыптаах оһуорун-бичигин «АйТал» АОО дизайнер-худуоһунньуктара уруһуйдаабыттар.

    Саҥа оскуола аһыллыытыгар СР үөрэҕин министрэ В.А. Егоров, Ил Түмэн депутата Ю.Н. Садовников, Муома оройуонун баһылыга П.Н. Черемкин, «Монтажник» ПК салайааччыта А.М. Ханин, судаарыстыбаннай сакаасчыт сулууспатын ГКУ кылаабынай инженерэ В.Н. Белолюбскай, оройуон салайааччылара сырыттылар. Аһыллыы сиэрин-туомун СР културатын туйгуна И.Н. Слепцова арыалдьыт кыыстаах, уоллаах сахалыы алгыһынан аста, алаадьынан, кымыһынан айах тутта.

    Аалай лиэнтэни В.А. Егоров, Ю.Н. Садовников, П.Н. Черемкин, А.М. Ханин, В.Н. Белолюбскай оскуола директора В.В. Тихонованы кытта быстылар. Иһирдьэ оскуола үөрэнээччилэрэ уонна учууталлара кэлбит ыалдьыттары, Хонуу сэлиэнньэтин олохтоохторун үөрэ-көтө көрүстүлэр. Оскуола устун экскурсия кэнниттэн актовай саалаҕа үөрүүлээх быһыы-майгы ортотугар оскуоланы туппут бары эппиэтинэстээх дьон, ол иһигэр тутааччылар итиэннэ оройуон бастыҥ педагогтара СР үөрэҕин министерствотыттан, Ил Түмэнтэн, «Монтажник» тутуу тэрилтэтиттэн, Муома оройуонун дьаһалтатыттан, оройуоннааҕы үөрэх управлениетыттан, о.д.а. бочуотунай грамотанан, махтал суругунан наҕараадаланнылар. Ити кэнниттэн оскуола үөрэнээччилэрин, учууталларын уонна урукку сылларга оскуоланы бүтэрбит ыччат толорууларыгар кэнсиэр туруорулунна.

    Хотугу эргимтэҕэ суох аныгы саҥа оскуола Муомаҕа үлэҕэ киирбитинэн, СР Ил Дархана Е.А. Борисов, Ил Түмэн председателэ А.Н. Жирков, солбуйааччыта А.А. Добрянцев, Ил Түмэн урукку депутата, Муома орто оскуолатыгар директордаабыт С.А. Сюльскай эҕэрдэлэрин тириэртилэр, бары үчүгэйи баҕардылар. Оттон оскуола үөрэнээччилэрэ саҥа оскуолаларын харыстыах буолан андаҕайдылар.