Мииринэйгэ тыа сирин олохтоох аhылыгын сөбүлээн атыылаһаллар

    0
    42

    Алмаастаах Мииринэй олохтоохторун, Саха сирин промышленнай киинин – Мииринэйи үрдүк хаачыстыбалаах бородууксуйанан хааччыйыыга дьоhуннаах тэрээhин буола турар. Быйылгы атыы-тутуу дьаарбаҥката, ааспыт сыллары кытары холоотоххо быдан сэргэх, улахан.


    Быйылгы дьаарбаҥка Мииринэйи эрэ буолбакка, Чернышевскайы эмиэ хапта. Бүлүү ГЭСтээх сиргэ, чэппиэргэ, эттээх-балыктаах дьаарбаҥка буолла.

    Мииринэйтэн – «Новай» сопхуос («АЛРОСА»), Мииринэй yyтyн собуота, Ленскэйтэн – «Экопродукты» фирма, Дьокуускайтан — «Северное сияние», «Ас-Рыба» тэрилтэлэр (чыыр, муксуун, уомул, тууччах, быйыт), Хатастан сибиинньэ этин атыылыыр хаhаайыстыба, Бүлүүттэн – «Сыа Бүлүү» кэпэрэтиип, Ньурбаттан – «Байар» аhылык кэмбинээтэ, «Влада» тыа хаhаайыстыбатын кэпэрэтиип, Сунтаартан — «Тирэх» кэпэрэтиип, дэлэгэй атыылаах-тутуулаах урбаанньыт Людмила Павлова, «Тускул» ТХКП (Күндэйэ), Кутана сэлиэнньэтин дэлэгэй астаах урбаанньыттара, Л.Попов аатынан агро-оскуола кыттыыны ыллылар.

    Урукку сыллары кытары холоотоххо атыылааччы тобус-толору.

    Ыыhаммыт чыыр, дьуухала, тууhаммыт балык, «нэлэйэ» кытарбыт собо, сыалаах эт эгэлгэтэ, үүт аhылык талбыккыттан, сахалыы «мороженай» — дагда, чохоон, дьэдьэннээх хайах, суорат, иэдьэгэй, йогурт, быырпах, быластаах арыы, саахыматтаах баахыла, алаадьы, ис, буотарах, харта, быар, хаан, ынах тыла, бэл уомул искэхтэрин хас да суорда, тиэптэл, кэтилиэт, бэлимиэн, эриллибит эт, куурусса этэ.

    Ыраахтан кэлбит, сайдам атыылааччылар амсата биэрбит астарыттан, мииринэйдэр, дьэ, туттумахтаатыбыт.

    Маннык тэрээhиннэри эрчимнээхтик ыытар буоллар, Мииринэйгэ олохтоох бородууксуйаны атыыта күүhүрэр туруктаах эбит.

    Атыы-тутуу быыhыгар, үгэс буоларын курдук, күндү балыгы кыhааhын күрэhэ ыытылынна. Күрэхтэhии элбэх дьон интэриэhин ылла. Манна Сунтаар хамаандата эрэллээхтик кыайда.

    А.Михалев, олохтоох: «Сибиэhэй эт, тылга тиийэ кэллэ. Олус үчүгэй хааччыстыбалаах бородууксуйа. Хас да куулунан ыллыбыт. Алтынньыттан сэтинньи ый ортотугар тиийэ атыыга аспыт арааhа дьадайааччы. Ону учуоттуубут. Сунтаардар ынахтарын, сылгыларын этин атыыластым. Сүрдээх эмис сылгы этэ атыыга киирбит, дьэ абыраныахпыт».

    Ж.Цыбденова: «Дьонум бырааhынньыкка «буузы» сакаастаабыттара. Ону, «классическай» моhуонунан, эриллибит эттэн бэлэмниэм. Саха улуустарын бородууксуйатыттан чохоону, сылгы этин, чыыр, муксуун балыгы атыылаhабын«.

    Т. Тишкова: «Этэ суох сатаммаппыт. Тыалартан атыылыы кэллэхтэринэ куруук атыылаhабыт. Ынах этэ, кырдьык, атыыга аанньа кэлбэт. Бырааhынньык иннинэ, хата дьаарбаҥкаттан тииhиннибит. Саха улуустарыттан кэлэр бородууксуйа сүрдээх сибиэhэй, минньигэс буолааччы. Чохоону, сүөгэйи, ынах арыытын ордук астынабын«.

    А. Семенова: «Дойдубар, Ньурба куоратыгар, «Идэhэ» атыы-тутуу бырааhынньыга буолбута ыраатта. Манна кэлбэттэрэ буолуо дии санаабытым. Маладьыастар кэлбиттэр! Атыыластым аҕай. Ис-иhигэр киирдэххэ, манна кэлэллэригэр барыыhа суоҕа буолуо. Уматык элбэх баранар, ороскуоттааҕа чахчы. Эрэйдэрэ элбэх гараас, түһэр сир булуу, ветиниспиэксийэни ааhыы».