Мэҥэ Хаҥаласка үһүс тыһыынчалаах сэртипикээт туттарылынна

Аан дойду кэрэ аҥардарын күнүн көрсө кулун тутар 6 күнүгэр Майа сэлиэнньэтин «Дьол түһүлгэтигэр» улууска «Ийэ хапытаалын» үһүс тыһыынчалаах сэртипикээтин туттарыы үөрүүлээх тэрээһинэ буолла.

453 тыһ. 26 солкуобайдаах үһүс тыһыынчалаах сэртипикээт хаһаайкатынан Тараҕайдааҕы оҕо ускуустубаҕа оскуолатын преподавателэ Валерия Захарова буолла. Эдэр ыал Валерия уонна Борис Захаровтар уол уонна кырачаан кыыс оҕолоохтор. Бу күн кинилэри эҕэрдэлии улуус баһылыга Николай Старостин кэллэ. Кини дойдуга дьиэ кэргэн сайдарыгар дьоһуннаах бэлиитикэ ыыталларын, «Ийэ хапытаала» уон сыл устатыгар олоххо киллэриллиэҕиттэн нэһилиэнньэ ахсаана элбээбитин эттэ.

Ити уон сылга улууспутугар дьиэ кэргэттэргэ 622 мөлүйүөн 286 тыһыынча солкуобайдаах «Ийэ хапытаала» көмө кэлбитин санатта. Бу күн «Ийэ хапытаалын» сэртипикээттэрин Мария, Захар Федоровтар, Светлана, Петр Федоровтар уонна Антонина Дьячковская туттулар.

«Майа сэлиэнньэтэ» МТ баһылыга Дмитрий Тихонов 2022 сылга Саха автономията ылыныллыбыта 100 сылыгар өрөспүүбүлүкэҕэ сахалар ахсааннара 460 тыһыынчаттан 500-тэн тахса тыһыынчаҕа тиийэ элбиэхтээхпит соругун аҕынна, Майаҕа ааспыт сылга 154 оҕо күн сирин көрбүтүн, инникитин өссө да элбии туралларыгар баҕа санаатын эттэ.

Улуустааҕы Пенсионнай пуонда управлениетын салайааччы Альбина Григорьева 2008 сыллаахха өрөспүүбүлүкэҕэ онус тыһыынчалаах «Ийэ хапытаала» сэртипикээти Майа сэлиэнньэтин олохтоохторо ылбыттарын кэпсээтэ. Күн бүгүн Дьокуускай, Мииринэй, Нерюнгри курдук улахан оройуоннар кэннилэриттэн улууспутугар «Ийэ хапытаалын» туһаныы төрдүс миэстэҕэ сылдьарын эттэ. Билигин сэртипикээти ый аайы босуобуйа быһыытынан тыыран ылыахха сөп буолбутун туһунан уларытыы киллэриллибитин туһунан иһитиннэрдэ.

Валерия, Борис Захаровтар сэртипикээккэ сайабылыанньа биэрэллэригэр элбэх хайысхалаах киин (МФЦ) өҥөтүн туһаммыттарынан киин салайааччыта Анатолий Чахов эҕэрдэлээтэ. Үөрүүлээх тэрээһин кыттыылаахтарын Майа сэлиэнньэтин Аҕалар түмсүүлэрин бэрэссэдээтэлэ Зиновий Игнатьев, улуустааҕы дьиэ кэргэн киинин аатыттан социальнай педагог Татьяна Артемьева уо.д.а. эҕэрдэлээтилэр итиэннэ эдэр ыалларга тыыннаах сибэкки дьөрбөлөрүн, сэмэй бэлэхтэрин туттартаатылар.

Д.Ф.Ходулов аатынан норуот айымньытын дьиэтин исписэлииһэ Елизавета Петрова, «Кыталык» ансаамбыл үҥкүүһүттэрэ дьоро күнү киэргэттилэр.