Майаҕа бочуоттаах биэнсийэҕэ олорор аҕам саастаахтарга анаан тэриллибит «Үһүс көлүөнэ оскуолата» биэс сыллааҕы үлэтин туһунан саҥа кинигэни уонна оскуола иһинэн айар куттаахтары түмэр «Саһарҕа» куруһуок чилиэннэрин «Кырдьыбат таптал» диэн хоһооннорун хомуурунньугун сүрэхтээтилэр.
«Үһүс көлүөнэ оскуолата» кинигэҕэ волонтер учууталлар, үөрэнээччилэр тус санаалара уонна оскуола олоҕуттан араас түгэннэри үйэтитэн хаалларбыт хаартыскалар киллэриллибиттэр.
Кинигэни оскуола салайааччыта Людмила Заровняева-Стручкова уонна «Кырдьыбат таптал» хомуурунньугу учуутал Валентина Аманатова хомуйан оҥорбуттар.
«Кырдьыбат таптал» дьоҕус хомуурунньукка тоҕус ааптар айымньыта киллэриллибит. Ааптардар: Калисфена Аммосова, Федора Белолюбская, Агафья Николаева, Зоя Платонова, Мария Никифорова, Раиса Скрябина, Ольга Аринкина бэйэлэрин айымньыларын ааҕан иһитиннэрдилэр, айар кут эйгэтигэр хайдах кэлбиттэрин туһунан кэпсээтилэр. Куруһуок салайааччыта Валентина Аманатова бэйэтэ барыта «С» буукубаттан тахсар тыллардаах бэртээхэй кэпсээнин ааҕан иһитиннэрдэ.
«Үһүс көлүөнэ оскуолата» дьоро күнүгэр оскуола кэлэктиибин кытта алтыһар тэрилтэлэр бэрэстэбиитэллэрэ ыалдьыттаатылар. Улуустааҕы нэһилиэнньэ социальнай харысхаллаах буолуутун управлениетын салайааччытын солбуйааччы Александр Игнатьев оскуолаҕа сылдьар аҕам саастаахтарга эдэрдии эрчимнээх буолуҥ диэн баҕа санаатын эттэ. Улуустааҕы бэтэрээннэр сэбиэттэрин бэрэссэдээтэлэ Маргарита Максимова өссө да үчүгэй дьоһуннаах кинигэлэри таһаара туруҥ диэтэ.
«Үһүс көлүөнэ оскуолата» таһаарбыт кинигэтин ахсаанын элбэтэн, киэҥ араҥаҕа тарҕатарга көмөлөһүөххэ сөп диэн «Майа сэлиэнньэтэ» МТ баһылыгын социальнай боппуруостарга солбуйааччы Гаврил Толстяков эттэ.
Маннык дьаһал аҕам саастаах дьоҥҥо олус туһалааҕын, дьиэҕэ муунту буолан олоруох, кырыйдым диэн түгэх түһүөх кэриэтэ, олоҕу кытта тэҥҥэ хаамсар, сэргэхсийэр наадалааҕын туһунан улуустааҕы уопсастыбаннай сэбиэт бэрэссэдээтэлэ Мария Лукина, «Сырдык Айыы сыдьаайа» түмсүү бэрэссэдээтэлэ, Майа сэлиэнньэтин дьокутааттарын Сэбиэтин дьокутаата Евдокия Решентникова эттилэр. Итиэннэ 2018 сыл олунньутугар «Үһүс көлүөнэ оскуолата» биэс сыллаах үбүлүөйүн үрдүк таһымҥа бэлиэтиэххэ, дьиэҕэ олорооччулары оскуолаҕа кэлэллэригэр угуйуохха диэтилэр.
Улуустааҕы «Таммахтар» литературнай түмсүү салайааччыта Августина Владимирова-Хабарова ааммыт өрүү аһаҕас, бииргэ үлэлэһэргэ бэлэммит диэн «Саһарҕаларга» туһаайан эттэ. Күннэтэ кэлэн үөрэнэр кылааһы үчүгэй көстүүлээх оҥорууга ыччаттары көмөлөһүннэрэн өрөмүөннүөххэ сөбүгэр санаатын үллэһиннэ.
Оскуола кэлэктиибин кытта бииргэ алтыһар, өйүүр И.М.Сосин аатынан улуустааҕы киин бибилэтиэкэ үлэһитэ Галина Слепцова, оскуолаҕа дьарыктанар драматическай куруһуок чилиэннэрэ бэйэлэрин истиҥ эҕэрдэлэрин тиэртилэр.
Сообщить об опечатке
Текст, который будет отправлен нашим редакторам: