Майаҕа өрөспүүбүлүкэ эдэр ыаллара көрсөн, тыа сиригэр олох-дьаһах туһунан кэпсэттилэр

Майаҕа «Кыталык» оҕо-ыччат эстетическэй киинигэр Хапчаҕай нэһилиэгин эдэр ыала Октябрина, Александр Кулешовтар көҕүлээһиннэринэн, улуустааҕы ыччат бэлиитикэтигэр уонна дьиэ кэргэн дьыалатыгар управление тэрийиитинэн, «Эдэр ыал ‒ дойду эрэлэ» диэн өрөспүүбүлүкэҕэ бастакы форум ыытылынна. Орто Халыматтан, Бүлүүттэн, Эбээн-Бытантайтан, Чурапчыттан, Хаҥаластан, Сунтаартан, Амматтан, Тааттаттан уонна Мэҥэ Хаҥаластан олоххо көхтөөх 43 эдэр ыал кытынна.

Бэрт интэриэһинэй, ураты тэрээһини «Саха» НКИК суруналыыһа Олег Колесов-Талбан ыытан, ыалдьыттыы кэлбит эдэр ыаллары кытта аһаҕас кэпсэтиини, сэргэх түһүлгэни тэрийдэ.

Сунтаартан сылдьар Уруйдаана, Иван Семеновтар нэһилиэккэ олорор ыччат тыа хаһаайыстыбатын араас көрүҥүнэн дьарыктаныан сөптөөҕүн, перепелкалары иитэллэрин, сыыр оҥороллорун туһунан сырдаттылар. Хаҥалас улууһуттан Александра, Николай Яковлевтар эдэр ыал үлэлиирин таһынан ханнык баҕарар уопсастыбаннай олоххо көхтөөхтүк кыттыахтарын сөптөөҕүн туһунан кэпсээтилэр. Элбэх оҕолоох дьиэ кэргэҥҥэ эбии дохуот киллэриигэ, дьиэ кэргэн экэниэмикэтин сайыннарыыга туох-ханнык үлэлэри ыыталлларын туһунан Бүтэйдээхтэн сылдьар Ньургуйаана, Афанасий Прокопьевтар эти эрбиир ыстаныагы үлэлэтэллэрин, туорт оҥорон атыылыылларын сырдаттылар. Эбээн-Бытантай улууһуттан Виктор Обутов хоту улууска эдэр ыаллар тугунан тыынан олороллорун, Дойду бөһүөлэгитэн, мунньах ааптардара Октябрина, Александр Кулешовтар кыра нэһилиэккэ олохсуйан «Кыһыл майаак» диэн ХЭТ тэриммиттэрин, Хочоттон кэлбит ырыа куттаах Туйаара, Николай Куприяновтар айар үлэ эйгэтигэр дьиэ кэргэнинэн умсуйуган туран дьарыктаналларын уонна Хара бөһүөлэгин эдэр ыала Анна, Иван Петровтар бааһынай хаһаайыстыба тэринэн хайдах дьаһанан олороллорун туһунан сиһилии кэпсээтилэр, уопуттарын атастастылар, ыччаттар мунаарар ыйытыыларыгар хоруйдаатылар, сүбэлэри-амалары биэрдилэр.

Форумҥа СӨ Ыччат бэлиитикэтигэр уонна дьиэ кэргэн дьыалаларыгар миниистири солбуйааччы Савва Михайлов, улуус баһылыгын бастакы солбуйааччы Павел Сазонов, дьокутааттар оройуоннарын Сэбиэтин бэрэссэдээтэлэ Андрей Находкин, ыччат бэлиитикэтигэр уонна дьиэ кэргэн дьыалатыгар управление салайааччыта Константин Захаров, «Майа сэлиэнньэтэ» МТ баһылыга Дмитрий Тихонов, «1-кы Наахара нэһилиэгэ» МТ баһылыга Алексей Григорьев, «Билии» уопсастыба лиэктэрэ, норуот педагогикатын утумнааччы Любовь Аргунова, СӨ Ыччат бэлиитикэтигэр уонна дьиэ кэргэн дьыалаларыгар министиэристибэ дьиэ кэргэн дьыалатыгар исписэлииһэ Татьяна Слепцова уонна «Олоҥхо дьиэтин» салайааччыта, улуустааҕы дьахталлар сэбиэттэрин бэрэссэдээтэлэ Евдокия Иванова кыттан, эдэр ыалларга баҕа санааларын тириэртилэр. Кыттыыны ылбыт ыччаттар тэрээһин бары өртүнэн туһалаах уонна көдьүүстээх буолбутун бэлиэтээтилэр. Бу күн эдэр ыаллар өрөспүүбүлүкэтээҕи ассоциациялара тэрилиннэ.

Күн иккис аҥарыгар Майаҕа «Дьол түһүлгэтин» дьиэтигэр улуустааҕы дьиэ кэргэн киинэ аһыллар үөрүүлээх малааһына буолла. Саҥа кииҥҥэ дьиэ кэргэн боппуруостарынан араас хабааннаах тэрээһиннэр ыытыллыахтара, киһи уйулҕатын үөрэтээччилэр сүбэлиир-амалыыр көмөлөрө оҥоһуллуоҕа, кыһалҕалаах дьон ханнык баҕарар ыйытыыга кэлэн санааларын атастаһар кыахтанныахтара, ону сэргэ саҥа холбоспут дьиэ кэргэн саахсаланыахтара. Киин «Майа сэлиэнньэтэ» МТ дьаһалтатын иһинэн социальнай бырагыраама чэрчитинэн үбүлэнэн тэрилиннэ, манна уопуттаах психолог Виктория Бурнашева үлэлиэҕэ.

СӨ Ыччат бэлиитикэтигэр уонна дьиэ кэргэн дьыалаларыгар миниистири солбуйааччы Савва Михайлов: «Өрөспүүбүлүкэҕэ бастакынан эдэр ыал ассоциациятын, дьиэ кэргэн киинин тэрийээччилэринэн эмиэ мэҥэ хаҥаластар буоллулар. Кинилэр уопуттарын атын улуустар ылан сайдан иһиҥ», ‒ диэн атын улуустартан мустубуттарга туһаайда.

Миниистири солбуйааччы Савва Михайлов уонна «Майа сэлиэнньэтэ» МТ баһылыга Дмитрий Тихонов ыкса үлэлэһэргэ диэн сөбүлэһии түһэрсэн, илии баттастылар.

Д.Ф.Ходулов аатынан норуот айымньытын дьиэтигэр 2017 сыл түмүгүнэн бастыҥ ыччаттарын бэлиэтээтилэр. Ол курдук, СӨ Ил Түмэн грамотатынан Төхтүр ускуустубаҕа оскуолатын уһуйааччыта Алексей Говоров, Төхтүрдээҕи култуура киинин исписэлииһэ Айаан Верховцев, «Кыталык» киин үҥкүүһүтэ Илья Крылов, Ф.Г.Охлопков аатынан Майа орто оскуолатын муусукаҕа учуутала Сахайаана Ларионова уо.д.а. наҕараадаланнылар.

Сыл түмүгүнэн «Үөрэҕирии эйгэтигэр бастыҥ» аатын В.П.Ларионов аатынан Майа орто оскуолатын учуутала Темир Сыдыкбеков, «Доруобуйа харыстабылын эйгэтигэр бастыҥынан» анестезиолог-реаниматолог быраас Гаврил Жирков, ОДьКХ салаатыгар «Теплоснаб» тэрилтэ маастара Василий Куприянов, тыа хаһаайыстыбатыгар «Хоту» ТХПК ыстаарсай лабараана Лия Шестакова, быраабы араҥаччылыыр уорган салаатыгар полиция ыстаарсай лейтенана Мария Шишигина, култуура уонна духуобунай сайдыы эйгэтигэр Д.Ф.Ходулов аатынан норуот айымньытын дьиэтин звукооператора Алексей Ощепков, ыччат бэлиитикэтигэр уонна дьиэ кэргэн дьыалатыгар Дойду нэһилиэгин ыччатын лиидэрэ Сахамила Михеева, тутуу уонна архитектура эйгэтигэр «Мегинострой» тэрилтэ прораба Захар Федоров, энергетика уобалаһыгар РЭС Аллараа Бэстээх учаастагын маастара Павел Билюкин, нэһилиэнньэ дьарыктаах буолуутун салаатыгар улуустааҕы дьарыктаах буолуу киинин иниспиэктэрэ Светлана Никитина, дойду оборуонатын салаатыгар Мэҥэ Хаҥаластааҕы уонна Уус Алданнааҕы байыаннай комиссар көмөлөһөөччүтэ Розалия Яковлева, «Бастыҥ предпринимателинэн» аатын бааһынай хаһаайыстыба салайааччыта Роман Герасимов сүктүлэр.

«Ыччат дьыалатыгар бастыҥ муниципальнай тэриллии» аатын «Томтор нэһилиэгэ» МТ баһылыга Мирон Свинобоевка, «Ыччакка бастыҥ настаабынньык» аатын РФ үтүөлээх үлэһитигэр, «Кыталык» ансаамбыл салайааччытыгар Василий Винокуровка, «Оҕо хамсааһынын бастыҥ лиидэрэ» аатын В.П.Ларионов аатынан Майа орто оскуолатын 11 «а» кылааһын үөрэнээччитигэр Алена Дмитриеваҕа ананнылар, «Ыччат сылыгар бастыҥ бырайыагынан» Федор Федоров баһылыктаах «Дойду сайдыыта ‒ ыччат илиитигэр», «Ыччат бастыҥ уопсастыбаннай тэриллиинэн» Айна Попова салайааччылаа «Сайдыс» лааҕыр педагогическай этэрээттэрин түмсүүтэ ааттаннылар.

Ыччат баалын кыттыылаахтарын саха эстрадатын чаҕылхай сулустара, улуус эдэр талааннара эҕэрдэлээтилэр.