Майаҕа Хомсомуол болуоссатыгар муус, хаар оҥоһуктар туруорулуннулар

    0
    31

    Майаҕа муус уонна хаар оҥоһуктарга аһаҕас турнир ыытылынна. 2013 сыллаахтан улуустааҕы култуура уонна духуобунай сайдыы управлениета иилээн-саҕалаан ыытар тэрээһинэ Саха сирэ Россия састаабыгар киирбитэ 385, Улуу Өктөөп 100, Майа төрүттэммитэ 115, оройуоҥҥа сопхуостар тэриллибиттэрэ 50 уонна 2017 сылга улууска Уустар сылларынан ананна. Быйыл саҥа көрүҥ — хаар оҥоһуктар — эбилиннилэр.


    Урут турнир Ураһалаах алааска ыытыллар эбит буоллаҕына, быйыл Майа сэлиэнньэтин киинигэр — Хомсомуол болуоссатыгар — тэрилиннэ.

    Турнир үөрүүлээх аһыллыытыгар «Майа сэлиэнньэтэ» МТ баһылыга Дмитрий Тихонов уонна улуустааҕы култуура уонна духуобунай сайдыы управлениетын салайааччыта Сергей Холмогоров турнир кыттыылаахтарын эҕэрдэлээтилэр.

    Муустан, хаартан оҥоруу ускуустубатын киэҥ эйгэҕэ тэнитэр, элбэх киһи көхтөөхтүк кыттарын өйүүр, үүнэр көлүөнэҕэ кэрэни өйдүүргэ үөрэтэр сыаллаах күрэхтэһиигэ СӨ култуураҕа үтүөлээх үлэһитэ, «Дьокуускай куорат» уокуруктааҕы дьаһалтатын култуураҕа уонна духуобунай сайдыыга управлениетын начаалынньыгын солбуйааччы Лариса Андреева, Дьокуускайдааҕы маассабай тэрээһиннэргэ култуура киинин кылаабынай исписэлииһэ Анна Попова, улуустааҕы култуура уонна духуобунай сайдыы управлениетын дизайнера Светлана Чирикова уонна биллиилээх скульптор, худуоһунньук идэлээх Дьулустаан Марков састааптаах дьүүллүүр сүбэ үлэ төһө толорутун уонна кыраһыабайын, кыттааччылар тиэмэни төһө арыйбыттарын, толорор тиэхиньикэлэрин, маастарыстыбаларын сыаналаатылар.

    Аһаҕас турнир түмүгүнэн, муус оҥоһукка холонон көрөөччүлэргэ Мөҥүрүөн нэһилиэгиттэн Аркадий Сивцев уонна Ньургун Стручков бастаатылар. Бу бөлөххө иккиһи Афанасий Прокопьев, Ньургун Павлов (Бүтэйдээх), үсүһү Афанасий Бродников, Коммунар Черкашин (Майа) ыллылар.

    Муус оҥоһукка идэтийбит кыттааччыларга бастакы миэстэ ‒ Архип Скрябин, Иннокентий Федоров (Майа), иккис ‒ Петр Петухов, Афанасий Мучин (Майа), үһүс ‒ Григорий Максимов, Михаил Степанов (Нам улууһа) буоллулар.

    Хаарынан оҥорууга Майа сэлиэнньэтиттэн Архип, Алик Скрябиннэр дьиэ кэргэннэрэ бастаата, иккиһи Семен, Мичил, Дьулусхан Сидоровтар (Майа), үсүһү Дмитрий, Ньургун Михайловтар (Хара) ыллылар.

    «Турнир кыттыылаахтара сүрэхтэрин сылааһын иҥэрэн чочуйан оҥорбут эриэккэс үчүгэй, туохха да тэҥнэммэт бэлэхтэрин харабыт харатын курдук харыстыаҕыҥ, Саҥа дьылбытын дьэрэкээн оҥоһуктардаах Хомсомуол болуоссатыгар үөрэ-көтө кэлэн көрсүөҕүҥ», — диэн Майа олохтоохторо баҕа санаабытын эттибит.

    Семен Сидоров, Хара олохтооҕо: — Быйыл саҥа сүүрээн быһыытынан хаар оҥоһуктары киллэрбиттэрэ хайҕаллаах. Мин уолаттарым Дьулусхан уонна Мичил Майатааҕы лиссиэй үөрэнээччилэрэ. Онон оскуолабыт аатыттан бүгүн хаар оҥоһуктарга кытынныбыт. Уолаттарым кыра эрдэхтэриттэн мин оҕо саадыгар, тэрилтэлэргэ анаан хаар оҥоһуктары оҥорорбун батыһа сылдьан көрөр буоланнар, билэллэр. Биһиги «Сопхуос ууһа» диэн тиэмэни арыйдыбыт. Мууһунан оҥорооччулар сыллата таһымнара үрдээн иһэр. Тэрийээччилэргэ улахан махтал.

    Игорь Спиридонов, Лоомтукаттан сылдьар кыракый кыттааччы: — Мин Лоомтука оскуолатыгар төрдүс кылааска үөрэнэбин. Бу хаар оҥоһугун куонкуруһугар убайбын уонна күтүөппүн кытта кэллим. Кинилэргэ көмөлөһөбүн. Улааттахпына хаарынан уонна мууһунан оҥоһуктар турнирдарыгар кыттар баҕалаахпын.

    Ньургуйаана Охлопкова, Майа олохтооҕо: — Мин оҕолорбунаан Светалыын уонна Сайаанныын дьиэбит таһыгар сыллата хаарынан кыыллары-сүөллэри оҥорооччубут. Онон быйыл хаарынан оҥорууга төрөппүт оҕолорун кытта кыттыан сөп диэни истэммин холоннубут. Кэлэн иһэр Ыт сылынан уонна улууспутугар Уустар сылларынан чороону оҥордубут уонна «Чороонноох ыт» диэн ааттаатыбыт. Эһиил өссө элбэх дьиэ кэргэн кытыннын.

    Иннокентий Федоров, Архип Скрябин, Майа сэлиэнньэтин олохтоохторо: — Маннык турнирдарга кыттыбыппыт ыраатта. Күрэхтэһии таһыма үрдээн иһэр. Саҥаттан саҥа кыттааччы кыттара үөрдэр. Ону сэргэ быйыл хаарынан оҥоһуктарга туһунан көрүҥ баар буолбута наһаа үчүгэй. Биһиги уустар, маастардар сылларынан оһуордаах-мандардаах сахалыы ыҥыыры оҥордубут. Бу тиэмэни өр толкуйдааһын кэнниттэн, ханна да хатыламмат уонна интэриэһинэй буоллун диэн таллыбыт. Майа олохтоохторо, ыалдьыттара оҥоһуктарбытын кэрэхсээн көрүөхтэрэ, харыстыахтара диэн эрэнэбит.