Өлүөхүмэ бааһынайдара ассоциация үлэтин сөргүттүлэр

    0
    20

    “Туймаада” хампаанньа генеральнай дириэктэрин солбуйааччы, Саха сиринээҕи АККОР бэрэсидьиэнэ Александр Артемьев уонна “Туймаада” хампаанньа генеральнай дириэктэрин көмөлөһөөччүтэ, Россия Аграрнай партиятын Саха сиринээҕи салаатын ситэриилээх кэмитиэтин чилиэнэ Олег Марков бу күннэргэ Өлүөхүмэ улууһугар командировкаҕа баран кэллилэр.


    Өлүөхүмэлэр АККОР мунньаҕар көхтөөхтүк кытыннылар

    А.Е.Артемьев саҥа талыллыбыт Федор Романовтыын

    Сүрүн соруктара – олохтоох АККОР үлэтин сөргүтүү. Улуус үрдүнэн 57 бааһынай хаһаайыстыбата баар. Мунньахха бааһынайдары сэргэ нэһилиэктэр баһылыктара, тыа хаһаайыстыбатын исписэлиистэрэ, барыта 52 киһи, сырытта. Кэлиҥҥи сылларга уота-күөһэ суох үлэлиир ассоциацияҕа 5 эрэ киһи хаалбыт буоллаҕына, бу отчуоттуур-быыбардыыр мунньахха 20 бааһынай саҥа чилиэнинэн киирдэ. Кинилэр ассоциация сэбиэтигэр 7 киһини таллылар. Саҥалыы сөргүтүллүбүт Өлүөхүмэтээҕи АККОР бэрэссэдээтэлинэн “Өлүөхүмэ-Агропродукт” ТХПК бэрэссэдээтэлэ, эдэр салайааччы Федор Романов биир санаанан талылынна.

    Аграрнай партия Өлүөхүмэтээҕи салаатын салайааччыта С.И.Никитина тыа хаһаайыстыбатын туйгуна буолла

    Өлүөхүмэ бааһынайдара Аграрнай партия чилиэнин ахсаанын 300-кэ тириэрдэргэ соруктанан үлэ ыыталлар. Билигин 210 чилиэннээхтэр. Мунньах кэмигэр 12 киһи партия кэккэтигэр киирдэ. Олохтоох салааны улуус сүрүн агронома Саргылаана Никитина салайар. АККОР бэрэсидьиэнэ А.Е.Артемьев Саргылаана Ивановнаҕа Тыа хаһаайыстыбатын уонна ас-үөл бэлиитикэтин министиэристибэтин аатыттан тыа хаһаайыстыбатын туйгуна буоларын туоһулуур докумуону кытта анал бэлиэни туттарда.

    Эдэр исписэлиис, отделение управляющайа Мария Янкова хаһаайыстыба саҥа хотоннорун көрдөрөр

    Ыалдьыттары Үҥкүргэ таһааран, “Өлүөхүмэ кыладабыайа” хаһаайыстыбаҕа сырытыннардылар. Амма-Өлүөхүмэтээҕи отделение управлящайа, Дьокуускайга Тыа хаһаайыстыбатын академиятыгар үөрэнэн, мэхээнньик-инженер идэтин ылбыт, эдэр исписэлиис дуогабарынан үлэлиир Мария Янкова саҥа тутуллан үлэҕэ киирбит хотоннору көрдөрдө. Министиэристибэ көмөтүнэн манна 240-нуу ыанньык ынах турар икки комплекс утуу-субуу тутуллан, үлэлии турар. Сүөһүлэр саҥа, сылаас, сырдык, киэҥ-куоҥ хотоҥҥо быр-бааччы кыстаан туралларын көрөн, үйэлээх тутууга көмөлөспүт “Туймаада” ҮХАПХ бэрэстэбиитэллэрэ астыннылар.

    Аныгы ирдэбилгэ толору эппиэттиир, механизациялаах хотоҥҥо киирбит хаһаайыстыба көрдөрүүтүн сылтан сыл тупсаран иһэр. Ааспыт сыл түмүгүнэн хас биирдии ынахтан ортотунан 3 тыһ. тахсалыы киилэ үүтү ыабыттар. Ол иһигэр бастыҥ ыанньыксыт Людмила Бояркина хас биирдии ынаҕыттан 4070 киилэ үүтү ыыры ситиспит. Үлэ дьоно үөһэттэн өйөбүлгэ ити курдук бородууксуйаны үрдэтиинэн хардараллар.