Кэбээйи улууһун күнүгэр чурапчылар собону, куобаҕы, андыны хото атыыластылар

    0
    26

    Кэбээйилэр быыстапка-дьаарбаҥкалара Чурапчы улууһун дьонун-сэргэтин болҕомтотун күүскэ тарта. Хоту дойду ураты аһын-үөлүн, оҥоһуктарын көрүөн-истиэн, атыылаһыан баҕалаахтар этиллибит чааска „Айылгы“ култуура уонна духуобунай сайдыы киинигэр хото муһуннулар.


    Кыра күүттэриилээх да буоллар, ыалдьыттарбыт аатырар Кэбээйи соботун кыратыттан улаханыгар тиийэ, куобах, анды, балык арааһын таһырдьа тардан кэбистилэр. Иһирдьэ быыстапка саалатыгар бэйэлэрин уратыларын көрдөрөр маллары-саллары, иистэри, түүлээх, ас арааһын көрдөрүүгэ, атыыга туруордулар.

    Быыстапканы аһыыга Чурапчы улууһун баһылыгын бастакы солбуйааччы А. А. Ноговицын уонна Кэбээйи улууһун баһылыга И. Н. Спиридонов икки улуус доҕордуу сибээһэ бөҕөргөөн иһэрин бэлиэтээтилэр. Игнатий Николаевич салайар улууһун уратытын, быыстапкаҕа кэлбит дьонун-сэргэтин билиһиннэрдэ. Дьахталлар „Күбэйэ“ вокальнай ансамблларын толоруута дохсун ытыс тыаһынан доҕуһуолланна.

    Быыстапка саалатыгар киирээт, түүлээх арааһын көрдөрөр, атыылыыр „Лүксүгүн“ ТХПК салайааччыта С. Н. Аржакованы көрсөн кэпсэтистибит. Светлана Николаевна: „Кооперативпыт 2013 сыллаахха тэриллибитэ. 15 үлэһиттээхпит.Сүрүн үлэбит — кыыл иитиитэ. Саһыл, кырса иитэбит. Барыта 345 төбөлөөхпүт. Дьокуускайдааҕы түүлээх фабрикатын кытары сибээстэһэбит. Килиэп буһарыытынан эмиэ дьарыктанабыт—бэкээринэлээхпит. Мас бэлэмнээһинигэр, балыктааһыҥҥа эмиэ үлэлиибит. Быйыл 20 тоннаҕа квота ылбыппыт. Сибиинньэ, куурусса эмиэ ииттэбит. Эһиги улуускут Алаҕар нэһилиэгэр кыылы иитэр ферманы кытары сибээстэһэр этибит. Ити ферма эстибитэ. Саҥаттан тэриниэхтэрин баҕараллар. Көмөлөһүөхпүтүн сөп. Нэһилиэк баһылыгыныын кэпсэтиилэр бардылар. Бүгүн икки улуус салалтата бииргэ үлэлэһии сөбүлэҥэр илии баттаһыахтаахтар“, — диэн үлэтин-хамнаһын билиһиннэрдэ.

    Бэйэлэрин национальнай таҥастарын, балык тириититтэн тигиллибит суумкалар, тимир оҥоһуктар (анньыылар, быһахтар, хомустар) быыстапкаларын дьон олус сэргээтэ. Национальнай таҥастара таба тириитин имитэн оҥоһуллубут, оһуора-мандара олус сиэдэрэй.

    Чурапчылар быыстапканы сэргии көрдүлэр, балык арааһын, ордук собону, куобаҕы, хааһы, андыны хото атыыластылар.