Хамаҕаттаҕа Аҕа сыла түмүктэннэ

    0
    33

    Нам улууһун Хамаҕаттатыгар “Түһүлгэ” сынньалаҥ киинигэр Аҕа сылын түмүктүүр үөрүүлээх тэрээһинэ буолан ааста. Биллэрин курдук, 2017 сыл нэһилиэккэ Аҕа сылынан биллэриллибитэ. Манна сыллааҕы үлэ түмүгүн, нэһилиэк олоҕуттан туора турбат, көхтөөх кыттыыны ылар аҕалары чиэстээтилэр, боччуоттаатылар.


    Маннык таһымнаах тэрээһиннэргэ нэһилиэк бары түөлбэлэрэ көхтөөх кыттыыны ылалларын дьаһалта үлэһитэ Евгений Ушницкай этэр. Ол курдук биэс түөлбэ бары сахалыы таҥас таҥнан, сахалыы мааны аһын остуолларга ууран, дьоҥҥо-сэргэҕэ нэлэччи тартылар, быыстапка туруордулар. Бары биир сомоҕо күүс буолан көхтөөх кыттыыны ылаллара, кинилэр салайааччыларын үчүгэй үлэлэрэ буолар.

    Аҕа сылын түмүктүүр күҥҥэ ыҥырыылаах ыалдьыттарынан Өрөспүүбүлүкэтээҕи Аҕалар түмсүүлэрин салайааччыта Габышев Айхал Иванович уонна кини солбуйааччыта Стрекаловскай Албан Иннокентьевич буоллулар. Кинилэр бары аҕаларга бэйэлэрин баҕа санааларын эттилэр, эҕэрдэлээтилэр. Дьиэ кэргэн тутулун үрдэтэллэригэр уонна бөҕөргөтөллөрүгэр өрөспүүбүлүкэтээҕи таһымнаах наҕараадалары урбаанньыт Захаров Алексей Николаевич, Нам улууһун “Коммунтеплоэнерго” үлэһитэ, нэһилиэк дьокутаата Тарбахов Михаил Николаевич, Хамаҕатта дьаһалтатын үлэһитэ Уодай Владимир Георгиевич уонна бэтэрээн Никитин Яков Петрович туттулар.

    Россияҕа 85 субъект баар, кинилэри барыларын дьиэ кэргэн ситимниир. Оттон дьиэ кэргэн иллээх-эйэлээх олохтоох буоларыгар аҕа уонна ийэ истиҥ сыһыана, кинилэр тапталлара улахан оруоллаах. Кинилэр тапталлара оҕолоругар бэриллэн дойдуларыгар, өрөспүүбүлүкэлэригэр туһалаах дьон буола улаатыахтара. Ол курдук, дьиэ кэргэн бигэ туруктаах буолуутугар аҕа суолтата улахан”, – диэн Айхал Габышев эҕэрдэ тылын эттэ. Кини бүгүҥҥү күҥҥэ өрөспүүбүлүкэҕэ 445 нэһилиэк баарыттан 224 нэһилиэгэ чөл олох политикатын ылыммытын эттэ. Ил Дархан Егор Борисов Саха сирин нэһилиэнньэтин чөл олоххо сирдиир араас хайысхалары олоххо киллэрэн, норуотун сөптөөх суолга салайбытын санатта.

    Үөрүүлээх тэрээһиҥҥэ Нам улууһун дьаһалтатын наҕараадаларын үс аҕаҕа туттардылар. Онтон нэһилиэк дьаһалтатыттан бочуоттаах наҕаарадаларын биэс, махтал суруктары тоҕус киһи ылла. Ону таһынан, биэс баһаарынай чаас сулууспалаахтара үчүгэй таһаарыылаах үлэлэрэ бэлиэтэннэ.

    Бырааһынньыктааҕы киэһэни Петр Емельянов, Сандр Находкин салайааччылаах тыыннаах доҕуһуолунан ыллыыр оскуола үөрэнээччилэрин “Ракета” уонна “Уоланнар” бөлөхтөрө, “Түһүлгэ” сынньалаҥ киин фольклорнай бөлөҕө уонна хас биирдии түөлбэ айар куттаах дьоно бэйэлэрин нүөмэрдэрин бэлэх уунан киэргэттилэр.

    “Маннык таһымнаах тэрээһиннэргэ нэһилиэкпит биэс түөлбэтэ куруук кыттыыны ыларыгар ыҥырабыт. Нэһилиэк дьонун барытын хабарга уонна түмэргэ үлэлэһэбит. Ол курдук бу күн сынньанар кииҥҥэ уопсайа 96 киһи кыттыыны ылла. Биллэрин курдук, бу сыл нэһилиэкпитигэр Аҕа сыла биллэриллэн, араас элбэх субуотунньуктар ыытыллыбыттара. Мас кэрдиитэ буоллун, муҥха буоллун, ыытыллар бары тэрээһиннэргэ кэлэр ыччаппытын, оҕолорбутун куруук илдьэ сылдьан олох мындырдарыгар үөрэтэбит. Аҕалар түмсүүлэрин бэрэссэдээтэлэ оскуола учуутала Захаров Руслан Афанасьевич буолар. Хамаҕаттабыт бастыҥ Аҕатын аатын Колпашников Ариан Васильевич ылла”, – диэн Евгений Сергеевич кэпсиир.

    Аҕа сылын сабыытын күнүгэр биэс түөлбэни хабан күрэхтэр ыытыллыннылар. Тоҥ балык кыһыытыгар Василий Сивцев түргэнник уонна хаачыстыбалаахтык туттан, бастыҥ кыһааччы буолла, ойбонтон уулааһыҥҥа биир сантиметрдаах кумааҕыны Афанасий Назаров ылан тэҥнээҕин булбата. “Моҕустар” күрэхтэригэр Андрей Охлопков саамай аһастаах киһинэн ааттанна. Ол курдук кини биир мүнүүтэ иһигэр икки улахан балыгы, биэс алаадьыны биирдэ охсон кэбистэ. Быаны туомтуу баайааһыҥҥа үчүгэй бириэмэни Айсен Васильев көрдөрөн, маҥнайгы нүөмэрдээх буоларын дакаастаата.

    Олохтоохтор үөрүүлээх күнү оһуохайынан түмүктээтилэр.