Хадаҥҥа үөрэҕирии 105 сылыгар уонна Аҕа Дойдуну көмүскүүр Улуу сэрии кыттыылааҕа, «Бойобуой Кыһыл Знамя», икки «Кыһыл Сулус» уордьаннар кавалердара Дормидонт Данилов төрөөбүтэ 100 сылыгар аналлаах «Даниловскай ааҕыылар» улуустааҕы НПК Г.Т. Семенов аатынан Хадан орто оскуолатыгар буолан ааста.
Кэмпириэнсийэни үөрүүлээх-быһыыга майгыга арыйыы «Оһуохай» култуура киинигэр буолла. Хадан орто оскуолатын үөрэнээччилэрэ, үлэһиттэрэ СӨ, Сунтаар улууһун өрөгөй ырыаларынан саҕалаатылар. Поэт Николай Сергеев Дормидонт Данилов туһунан айбыт хоһоонугар Хадан оскуолатын муусукаҕа учуутала, СӨ үөрэҕириитин туйгуна, СӨ үөрэҕириитин Бочуоттаах бэтэрээнэ Николаева Т.Д. матыып суруйан, ырыа буолан сүрэхтэннэ.
Үрдүкү кылаас уолаттара байыаннай таҥастаах стройунан хаамыынан киирэн, Дормидонт Григорьевич олоҕун кэрчиктэрин туһунан саалаҕа мустубут дьоҥҥо кэпсээтилэр. Сунтаардааҕы үөрэх управлениетын начаалынньыга Гаврил Еремеев, Хадан орто оскуолатын дириэктэрэ Михаил Тимофеев ыраахтан-чугастан кэлбит ыалдьыттарга кэмпириэнсийэ кыттыылаахтарыгар эҕэрдэ тылларын эттилэр.
Кэмпириэнсийэҕэ Дормидонт Григорьевич аймахтара – СӨ норуот эмчиттэрин ассоциациятын салайааччыта, алгысчыт Яковлева А.И., ХИФУ ФЭИ преподавателэ Федорова О.А., Сунтаардааҕы үөрэх управлениетын методическай киинин сүрүннүүр исписэлииһэ, СӨ үөрэҕириитин туйгуна, Хадан нэһилиэгин Бочуоттаах гражданина, «СӨ мэтэдьииһэ» бэлиэ хаһаайына Попова М.И., Сунтаардааҕы «Кыталык» оҕо саадын сэбиэдиссэйин иитэр-үөрэтэр үлэҕэ солбуйааччы, СӨ үөрэҕириитин туйгуна Егорова С.И., улуустааҕы пенсионнай управление дьону кытта үлэлиир сулууспатын салайааччыта Саввинова Д.П., Сунтаардааҕы үөрэх управлениетын сүрүннүүр исписэлииһэ Ананьева Ю.М., СӨ тыа хаһаайыстыбатын туйгуна, Туойдаах нэһилиэгин Бочуоттаах гражданина Копылова Л.П., Сунтаардааҕы «Березка» оҕо саадын иитээччитэ Данилова Н.А., «Сунтаравтодор» тэрилтэ үлэһитэ Соловьев А.И., Копылова Н.П. кэлбиттэр. Кинилэр бары сиэксийэлэринэн арахсан экспердиир хамыыһыйаҕа үлэлээтилэр.
Эдэр ыччаты патриотическай өйгө-санааҕа, аҕа көлүөнэҕэ ытыктабылы, Ийэ дойдуга тапталы иитэр сыаллаах «Даниловскай ааҕыылар» НПК-ҕа улуус уон оскуолатыттан, уопсайа, 60 киһи кытынна. Кэмпириэнсийэ биэс сиэксийэнэн үлэлээтэ – «Данилов Д.Г. – хорсун буойун, сатабыллаах салайааччы», «Улуу Кыайыы саллааттара», «Кинилэр Кыайыыны уһансыбыттара», «Саһарбыт хаартыскалар, буорах сыттаах суруктар, кэриэс хаалбыт өйдөбүнньүктэр», учууталларга «Буойуннар хорсун суолларынан иитии, үөрэтии тула».
НПК түмүгүнэн «Буойуннар хорсун суолларынан иитии, үөрэтии тула» сиэксийэҕэ I миэстэни Устье орто оскуолатын учуутала Мотрена Тихонова, II миэстэни Туойдаах оскуолатын учуутала Юлия Анисимова, III миэстэни Аллыҥа орто оскуолатын учуутала Наталья Антонова ыллылар. Дормидонт Данилов аймахтара туруорбут 4000 солк. Гранынан Сунтаар алын сүһүөх оскуолатын учуутала Раиса Матвеева, 5000 солк. Граннарынан Хадан орто оскуолатын учууталлара Евдокия Павлова, Тамара Николаева наҕараадаланнылар.
«Саһарбыт хаартыскалар, буорах сыттаах суруктар, кэриэс хаалбыт өйдөбүнньүктэр» сиэксийэҕэ I миэстэ Валерий Григорьев (10-с кыл., Хадан), II миэстэ Аида Данилова (11-с кыл., СПТЛ-И), III миэстэ Николина Павлова (9-с кыл., СПТЛ-И) ыллылар. Валерий Григорьев Дормидонт Данилов аймахтара туруорбут 5000 солк. Грант, Аида Данилова СӨ үөрэҕириитин туйгуна Архипова Римма Ионовна аатынан 3000 солк. Грант хаһаайыннара буоллулар.
«Данилов Д.Г. – хорсун буойун, сатабыллаах салайааччы» сиэксийэҕэ I – Ньургуйаана Николаева (9-с кыл., Хадан), II – Лена Чойнова (11-с кыл., Хадан), III – Нарыйаана Ераскумова (8-с, кыл., Туойдаах). Аймахтар туруорбут Граннарын Ньургуйаана Николаева ылла.
«Улуу Кыайыы саллааттара» сиэксийэҕэ 19 үлэттэн кыайыылааҕынан Устье орто оскуолатын 11-с кылааһын үөрэнээччитэ Валерия Корякина буолла. II миэстэни Кристина Иванова (9-с кыл., СПТЛ-И), III миэстэни Сахаайа Петрова (9-с кыл., Хадан) ыллылар. Хадан оскуолатыгар үлэлээн ааспыт, үлэлии сылдьар учууталлар туруорбут 2000 солк. бириэмийэни Кристина Иванова, аймахтар Граннарын Давид Федоров (СПТЛ-И), Альберт Иванов (Туойдаах) ыллылар.
«Кинилэр Кыайыыны уһансыбыттара» сиэксийэҕэ I миэстэ Павел Алексеев (7-с кыл, Устье), II миэстэ Ньургуйаана Ераскумова (7-с кыл., Туойдаах), III миэстэ Милана Петрова (6-с кыл., СПТЛ-И) буоллулар. Бу сиэксийэҕэ бастыҥ дакылааттарынан Павел Алексеев Дормидонт Григорьевич аймахтара туруорбут Гранынан, Ньургуйаана Ераскумова Хадан оскуолатыгар 40 сыл устата үлэлээбит Римма Ионовна аатынан 2000 солк. Гранынан наҕараадаланнылар.
Маны таһынан «Даниловскай ааҕыылар» НПК «Бастыҥ дакылаата» номинация хаһаайкатынан Хадан орто оскуолатын муусукаҕа учуутала Тамара Николаева буолла. Туойдаахтан сылдьар Арнольд Соловьев саамай эдэр кыттааччы аатын ылла. Кыайыылаахтар грамотанан, тылдьытынан, энциклопедиянан, Дормидонт Данилов мэтириэттээх анал кубоктарынан наҕараадаланнылар.
Сообщить об опечатке
Текст, который будет отправлен нашим редакторам: