Хаҥаластар тыыннаах музыканы дуоһуйа иһиттибит

    0
    34

    Сергей Зверев-Кыыл Уола аатынан Үҥкүү театрын саха национальнай инструменнарын оркестра Хаҥалас улууһун Дьэр нэһилиэгэр кэлэн, оскуола үөрэнээччилэригэр уонна олохтоохторго музыка бырааһынньыгын тэрийдилэр. Тыа дьоно маннык кэнсиэри анаан-минээн куоракка киирэн мээнэ көрбөт буолан, бу күн бүтүн оркестр тахсан кэнсиэрдээбитин бэрт сонургуу уонна дуоһуйа көрдүбүт, иһиттибит. 


    Саха национальнай инструменнарын оркестрын тыыннаах доҕуһуолларын хаҥаластар көрөн-истэн астынныбыт. Оркестр толоруутугар сахалыы, нууччалыы уонна атын да норуоттар ырыаларын, музыкальнай айымньыларын бу тутан олорон истэр ураты эйгэни үөскэтэрин эппитинэн-хааммытынан ылынан бэркэ сэҥээрдибит. Артистар бэйэлэрин маастарыстыбаларын толору баһылаабыт дьон буолан, толоруулара да үчүгэйэ киһини сөхтөрөр буолар эбит. Бу эдэр оҕолор, оркестр солистара Владимир Боярский, Виктор Винокуров-Дабайаан байааҥҥа оонньууллара эриэккэһин! Хомусчуттар Василена Шарина уонна Георгий Слепцов-Чаҕылхан толорор маастарыстыбалара үрдүгүн, кырдьык да виртуоз-хомусчут аатын ылыахтарын ылбыттар эбит. Театр үҥкүүһүттэрэ толоруулара бу кэрэтин!

    Манна даҕатан эттэххэ, бу оркестр солистарын кэргэннии Анна уонна Афанасий Томскайдар айар үлэлэрин уруккуттан сэргиибин. Бу музыкальнай дьиэ кэргэн театр тутаах дьоно буола үүнэн-сайдан тахсыбыттара киһини үөрдэр. Афанасий үлэтиттэн ураты нотанан оркестровка оҥорорун истэбит, билэбит. Анна саҕалааһынынан, салалтатынан «Кыл Саха» диэн оркестр иһинэн бөлөх тэринэн айымньылаахтык үлэлииллэринэн, дьоһун ситиһиилэрдээхтэринэн киэн туттабыт. Бу кэнсиэргэ «Кыл саха» бөлөх дэҥҥэ көрөр төрүт инструменнарбыгар сахалыы матыыптары толорбуттара омуна суох хас биирдии көрөөччү дууһатын кылын таарыйда.

    Биир үөрүүлээҕэ бу ааттаах-суоллаах оркестр доҕуһуолунан оскуолабыт үөрэнээччилэрин «Дьэрэлий» академическай вокальнай ансамблын толоруутугар ырыаны иһиттибит. Бу ансамбль салайааччыта И.В. Протопопова бэйэтин идэтин толору баһылаабыт профессионал эрэ буолбатаҕын, улахан тэрийэр, көҕүлүүр дьоҕурун көрдөрүүтэ. Оҕолорбут ырыаны толорор маастарыстыбалара үрдээн иһэриттэн үөрэбит уонна ситиһиилэрин чиҥэтэн иһиэхтэрэ диэн эрэнэбит. «Биһиги оҕолорбут «Музыка для всех» өрөспүүбүлүкэтээҕи бырайыак чэрчитинэн бу саха оркестрын кытта кэнсиэргэ бииргэ кыттар дьоллоннулар. Оҕолор оркестр тыыннаах доҕуһуолунан композитор Кирилл Герасимов «Сахам сирин халлаана» ырыатын толордулар. Оркестр иһинэн хаһыс да сылын ыытыллар «Саха оркестрын кытта музыка кэрэ эйгэтигэр» бырайыак баара көрөөччүнү үөрдэр. Кэнсиэри тэрийэн, иилээн-саҕалаан ыыппыт ааптардарга оркестр музыканнарыгар Валентина Колесоваҕа уонна Анисия Габышеваҕа махталбытын тиэрдэбит«, — диэн «Дьэрэлийдэр» төрөппүттэрэ бэйэлэрин ис санааларын эттилэр.