Элгээйигэ Угут Күөл уутун түһэрии үлэтэ түмүктэннэ

    0
    15

    Бу күннэргэ Элгээйигэ хас да сыллаах үлэ түмүктэннэ. Ол курдук, уонча сыллаах туруорсуу, сэттэ сыллаах үлэ кэннэ Угут Күөл уута түстэ.


    Угут Күөл сиригэр ойуур саҕатыгар диэри сыппыт уу сорҕото былырыын ыытыллыбыта. Мелиорация Ньурбатааҕы ГБУ уолаттара экскаватор көмөтүнэн хорууну эбии хаһан биэрэн, үлэлэрин түмүктээн туттардылар. Үлэни тута улуустааҕы тыа хаһаайыстыбатын управлениетын начаалынньыга Иван Тихонов, быйылгыттан саҥа үлэлии кэлбит эдэр исписэлиис, мелиоратор Сандал Кириллин, өр сылларга мелиораторынан үлэлээбит, билигин даҕаны сүбэ-ама биэрэн сүүрэ-көтө сылдьар Исидор Петров тахса сырыттылар.

    Мелиоратордар сүүнэ улахан экскаваторынан Угут Күөлтэн тахсар 5 км усталаах хорууну бүөлүү сытар буору ыраастаатылар. Хаалла сыппыт уу босхо баран хоруу устун сүүрэ турда. Бу хас да сыллаах үлэҕэ Мелиорация Ньурбатааҕы ГБУ тэрилтэни сэргэ бэтэрээн мелиоратор Исидор Николаевич Петров, Элгээйи нэһилиэгин дьокутаата, ньурбалар мелиорация «внештатнай сотруднига» диэн ааттаабыт Борис Иннокентьевич Габышев сүүрэн-көтөн үлэлэстилэр, хонтуруол ыыттылар.

    Сунтаар сиригэр хаһыс да сылларын үлэлиир кэлэктиип салайааччыта Алексей Васильев туттарбыт үлэтигэр сөбүлэһэн, Элгээйи нэһилиэгин өттүттэн баһылыгы солбуйааччы Олег Попов, улуустан Иван Тихонов үлэни тутуу докумуонугар илии баттаатылар.