Туһаныллыбатах кыахтар

331

660470XXXI сайыҥҥы Олимпийскай оонньуу көҥүл тустууга күрэхтэһиитигэр биир сылы быһа араас түһүлгэлэргэ сүүмэрдэнэн, саамай күүстээхтэр кытыннылар. Түөрт сылга биирдэ ыытыллар киһи-аймах сүдү оонньуутугар саха тустууга кыһатын икки иитиллээччитэ кыттыбыта, биһиги өрөспүүбүлүкэбитигэр көҥүл тустуу спорт бастакы нүөмэрдээх көрүҥэ буоларын туоһулуур.

Өссө Белоруссияттан Владислав Андреев, Кыргызстантан Иннокентий Иннокентьев, Таджикистантан Тимур Пестерев уонна табыллыбыта эбитэ буоллар Израильтан Евгений Коломиец – Риоҕа кыттыахтарын сөп этэ. Кинилэр кыттыбатахтарын биричиинэтэ аҥардас тустар маастарыстыбаларыгар эрэ буолбатах, ону ааһан, тэрээһин, ситимнээх үлэ кыаллыбата диир сөп буолуо. Туох буолуой, тустуубут уонна спорпут салалтатыгар бу кытаанах уруок буолуоҕа. Өскөтүн ону кинилэр сөптөөхтүк ылыннахтарына.

Владислав Андреевы Белоруссия тренердэрэ аан дойду чөмпүйэнээтин иннинэ аҕай туох даҕаны суолтата суох турнирга кытыннаран (өссө 61 киилэҕэ), улахан эчэйии ылан сыл аҥарыттан ордук кэмҥэ тустууттан туоруу сылдьыбыта. Оттон сааһыары Олимпиадаҕа сүүмэрдиир күрэхтэһиилэргэ табыллыбатаҕа. Сэрэйдэххэ, эчэйиитин ситэ оһоруммакка, бэлэмэ суох кыттан хотторбута. Оттон аны Белоруссия хамаандатыгар олимпийскай путевка бэриллибитигэр, уолбут Асадулла Лачиновтыын олимпиец аатын ким ыларын быһаарсыытыгар өрөспүүбүлүкэ, федерация аатыттан туох эмэ үлэ ыытыллыбыта дуу, суоҕа дуу?

Тимур Пестерев – талааннаах тустуук, сөптөөх өйөбүлэ суох буолан, кыаҕын ситэ көрдөрбөтөҕө хомолтолоох. Кинини кытта эрдэттэн ситимнээх үлэ ыытыллыбыта эбитэ буоллар, Олимпиадаҕа киирэр кыахтаах этэ. Евгений Коломиец – бэйэбит уолбут, саха тустууга кыһатын иитиллээччитэ. Ону эмиэ тоҕо эрэ чугастык ылыммаппыт. Израилы кытта үлэлэһэригэр күттүөннээхтик көмөлөспөтүбүт. Оннооҕор быйыл Дьокуускайга ыытыллыбыт Россия чөмпүйэнээтигэр үһүс призер буолбутугар, тоҕо эрэ бэйэбит бөҕөспүт диэн ахтыбатыбыт.

Уопсайынан, олимпийскай бырагыраамаҕа киирбит бөҕөстөргө судаарыстыба, өрөспүүбүлүкэ өттүттэн аҥардас харчынан эрэ буолбакка, кинилэр көмүскэллээх буолалларын туһугар дипломатическай өйөбүллээх үлэ ситэтэ суох ыытыллар дии саныыбын. Ардыгар бөҕөстөрбүт тулаайах оҕо курдук бэйэлэринэн эрэ тиийэн быһаарса, киирсэ сатыылларын Владислав Андреев, Евгений Коломиец холобурдарыттан көрөбүт.

Ити сыыһалар-халтылар, итэҕэстэр-быһаҕастар кэлэр олимпийскай циклга туоратыллыахтарын наада.

Петр ПАВЛОВ.

2
0