Горнай олохтооҕо Александр Максимов Уһук Илиҥҥи гектар сокуонугар киирсэн, сир ылла

    189

    Аҕыйах хонуктааҕыта улуустааҕы типографияҕа уһун кэмҥэ үлэлээбит А.Ф.Максимов редакцияҕа кэлэ сылдьарын көрүстүм. Кэм биир идэлээх дьон быһыытынан, күннээҕи олох-дьаһах туһунан сэһэргэстибит. Кэпсэтиибит улам Уһук Илиҥҥи гектарга тиийбитин, бэйэбит да билбэккэ хааллыбыт.


    Александр Филиппович Максимов бэйэтэ ырыа куттаах дьонноох Бүлүү Тыымпытыттан төрүттээх. Кэргэнин Тамара Егоровна дойдутун — Горнайы — иккис дойду оҥостон, түөрт оҕолонон, үс сиэннэнэн Бэрдьигэстээх биир сис ыала буолан олороллор.

    Кини билигин төһө да биэнсийэҕэ таҕыстар, үлэ үөһүгэр сылдьар. Иллэҥ кэмигэр балыктыырын, сир астыырын ордорор.

    Александр Филиппович «Уһук Илиҥҥи 1 гектар» 119 Федеральнай Сокуон тахсыбытын бэркэ сонургуу ылыммыт.

    Мин кэргэмминээн, икки оҕобунаан 4 гектар сири Бэрдьигэстээххэ «Уу хаайар быһыт» кэннинэр суруттарбыппыт. «Уһук Илиҥҥи 1 гектар» сокуон туһунан телевизортан, хаһыаттан көрөн, билбиппит. Бастаан саарбахтааһын баара. Оттон дьиэ кэргэн сүбэтинэн, ыларга соруммуппут. Докумуонун Тамара Егоровна бэйэтэ сүүрэн-көтөн биэрбитэ. Түмүгэ кэлэрин син өр күүппүппүт. Улахан ыарахаттары көрсүбэтэхпит.

    Ылбыт сирим Ходуһа толооно диэн. Тоҕо онно ыллыҥ диэтэххэ? Бэйэм оҕо сааспыттан дьиэ кыылын-сүөлүн тутуохпун баҕарарым. Бэрдьигэстээххэ кэлиэхпиттэн, уопсай дьиэҕэ олоробун. Ол иһин, хаһаайыстыба тэринэр тоҕо эрэ кыаллыбат курдук этэ. Сир да суоҕа. Билигин биэнсийэҕэ саҥа таҕыстым. Быстах үлэ элбэх. Итиччэ түгэн көстүбүтүгэр, баҕа санаабын толорбут киһи.

    Билиҥҥитэ «Эн сириҥ бу» диэн кээмэйдээн биэрэ иликтэр. Ыллахпытына, бастатан туран, бүтэй тутуом. Онтон көстөн иһиэ. Сылгы ииппит киһи диэн былаанныыбыт. Кус-хаас да тутар куһаҕана суох буолуо этэ. Уу чугас буоллаҕына, хортуоппуй ыһыытынан дьарыктанар санаа эмиэ баар. Онон барыта иннибитигэр.

    Киһи барыта бас билэр сирдээх буолуохтаах диэн толкуйдуубун. Атыттар кэлэн ыллахтарынааҕар бэйэтит сирбит бэйэбитигэр бэриллэрэ ордук. Онон олохтоох дьон дойдуларын сирин бэйэлэрин ааттарыгар ылалларыгар сүбэлиэм этэ, — диэн Александр Филиппович бэйэтин санаатын үллэстэр.

    А.Ф.Максимов, кырдьык да, туруу үлэһит киһи. Ону бииргэ үлэлээбит дьоно туоһулууллар. Хайдах күүскэ, тахсыылаахтык оттообуттарын билигин да сөҕө-махтайа кэпсииллэр.

    Хаһаайыстыба тэринэр баҕатын толорон, кини ааспыт сайын куруолук кытары ииттибитэ. Хомойуох иһин, ыалларын ыта тутан кэбиһэн, салгыы сайыннарбатах. Онон кини инникитин туруоруммут былаанын ситиһэн, хаһаайыстыбата сайдарыгар баҕарабын.